Ձեր վստահելի աղբյուրը

«Ժառանգություն» խմբակցության պատգամավոր Անահիտ Բախշյանը ՀՀ Աշխատանքի և սոցիալական հարցերի նախարար Արթուր Գրիգորյանին այսօր հարցում է ուղարկել, որի համար հիմք են հանդիսացել Panorama.am-ի հունվարի 17-ի «Երբ զիջում ես հերթդ, պետությունը երկրորդ շանս չի տալիս. Մանկատան սան դառը փորձը» վերտառությամբ հրապարկման մեջ ներկայացված փաստերը:
 

Հիշեցնենք, հրապարակման մեջ անդրադարձել էինք «Զատիկ» մանկատան շրջանավարտ, 24-ամյա Հայկ Սիմոնյանի ճակատագրին, ով, փաստորեն, իր իսկ բարոյականության զոհն էր դարձել. 2006թ-ին մանկատնից դուրս գալուց հետո, երբ պետությունից պետք է բնակարան ստանար, ավելին` անգամ գիտեր, որ բնակարանը Կոմիտաս պողոտայի վրա է, նրան հավաստիացրել են, թե քանի որ գնում է բանակ, թող այդ բնակարանը զիջի մանկատան շրջանավարտ մի երիտասարդ կնոջ, որը երեխա է սպասում ու մի երեխա էլ արդեն ունի, իսկ երբ բանակից վերադառնա` արդեն իր բնակարանը կստանա: Սակայն 2008թ-ին վերադառնալով` մինչ օրս թակում է տարբեր գերատեսչությունների դռներ ու բացի չոր խոսքերից` «նախարարությունը գումար չի հատկացրել, որ բնակարան ստանաս» ու նրանից, որ ինքը նույնիսկ հերթի մեջ էլ չի այլևս` ոչինչ չունի:

Ա.Բախշյանը նախարարին ուղղված նամակում գրել է.
««Panorama.am» կայքէջում հրապարակվել է «Երբ զիջում ես հերթդ, պետությունը երկրորդ շանս չի տալիս. Մանկատան սան դառը փորձը» վերնագրով հոդված, որտեղ նկարագրված է 2006 թ-ին շահառու Հայկ Սիմոնյանի բնակարանից զրկվելու պատմությունը: Այն կարելի է որակել որպես նախարարության կողմից մանկատան սանին նենգորեն խաբելու կամ նրա նկատմամբ անսիրտ ու անխիղճ վերաբերմունքի պատմություն: Հոդվածից ակնհայտ է դառնում, որ այդ գործընթացի պատասխանատուները անխղճորեն օգտվել են մանկատան սան Հայկ Սիմոնյանի անօգնական վիճակից, իրավական անգրագիտությունից և չօրինականացնելով իրենց առաջարկը` երկու տարի հետո տեր չեն կանգնել իրենց խոսքին»:

Իսկ նախարար Գրիգորյանին ուղղված հարցերն էլ հետևյալն են.

1. Քննարկվե՞լ է արդյոք նախարարությունում այս հոդվածը և ի՞նչ արձագանք է ստացել:
2. Ո՞վ է այն երիտասարդ կինը, ով ստացել է Հայկի համար նախատեսված բնակարանը, հերթացուցակում ո՞ր համարն է ունեցել, ո՞ր մանկատան շրջանավարտն է եղել:
3. Եթե այդ կինը նույնպես եղել է շահառուների ցուցակում, ապա ինչո՞ւ չի օրինականացվել մանկատան շրջանավարտներին բնակարաններով ապահովման հերթացուցակում հոդվածում նշված երիտասարդ կնոջ հերթի փոխատեղումը Հայկ Սիմոնյանի հերթի հետ:
4. Ինչպե՞ս, ինչո՞ւ և ո՞ւմ պատճառով է Հայկը դուրս մնացել հերթից:
5. Ինչո՞ւ է Լալա Ղազարյանը (նախարարության Ընտանիքի, կանանց և երեխաների հիմնահարցերի վարչության պետ) նման պատասխան տվել այդ երիտասարդին այն դեպքում, երբ ի պաշտոնե այս պատմության պատասխանատուն տարիներ շարունակ հենց ինքն է, որի գործունությունից բազմիցս դժգոհել են մանկատան շրջանավարտները:
6. Ի՞նչ է լինելու Հայկ Սիմոնյանի բնակարանի ճակատագիրը:
«Հիմա Հայկն արդեն ունի իրենով հետաքրքրվողներ, ովքեր ցանկացած օրինական ճանապարհով պաշտպանելու են Հայկի բոլոր իրավունքները և թույլ չեն տալու հերթական խաբեությունը»,- հավելել է իր նամակը պատգամավոր Բախշյանը:

Հիշեցնենք` «ԱԺ կանոնակարգ» օրենքի 7-րդ հոդվածի համաձայն նախարարությունը պարտավոր է պատգամավորին 10-օրյա ժամկետում տրամադրել բարձրաձայնած հարցերի պատասխանները:
Panorama.am-ը դեռ կանդրադառնա այս պատմությանը` ներկայացնելով ամենին նաև Աշխատանքի և սոցիալական հարցերի նախարարության տեսակետն ու բացատրությունները: