Ձեր վստահելի աղբյուրը

ԱԳ նախարար Էդվարդ Նալբանդյանը հունվարի 23-ին Սոչիում Հայաստանի, Ռուսաստանի, Ադրբեջանի նախագահների հանդիպումը հայաստանյան հեռուստաընկերություններին տված հարցազրույցում գնահատել է կարևոր ու արդյունավետ:
«Դա արտահայտվեց նաև այն եռակողմ հայտարարության մեջ, որն արվեց նախագահների մակարդակով: Առաջինը, հայտարարության մեջ նախագահները նշեցին, որ վերջին տարիներին մեծ ծավալի աշխատանք է կատարվել հիմնախնդրի կարգավորման հիմնարար սկզբունքների համաձայնեցման ուղղությամբ»,-ընդգծել է նախարարը:

Նալբանդյանն ասել է, որ չնայած Բաքվից հնչում էր, որ ընդհանրապես ոչ մի բան էլ չի ստացվում եռանախագահների մոտ և այլն, նշվել է, որ եռանախագահները արդյունավետ աշխատանք են տարել:
«Եվ Հայաստանի և Ադրբեջանի Նախագահները, բարձր գնահատելով այդ աշխատանքը, հույս հայտնեցին, որ եռանախագահները՝ Միացյալ Նահանգները, Ռուսաստանը, Ֆրանսիան, նույն ձևաչափով, նույն կարգավիճակով կշարունակեն իրենց ջանքերը հիմնախնդրի կարգավորման ուղղությամբ»,-ասել է Է. Նալբանդյանը:

Նա նաև հիշեցրել է, որ Բաքվում վերջին շրջանում շատ ավելի ակտիվ ձևով հնչում է, որ պետք չէ ժամանակ կորցնել հիմնարար սկզբունքների համաձայնեցման շուրջ բանակցություններ անցկացնելու վրա, ապա շեշտել, որ եռակողմ հայտարարության մեջ նշվել է, որ նախագահները կարևորում են հիմնարար սկզբունքների շուրջ համաձայնության գալը և կողմերը՝ եռանախագահների հետ համատեղ, պետք է ակտիվացնեն աշխատանքն այս ուղղությամբ:

«Սա շատ կարևոր դրույթ է հայտարարության մեջ, քանի որ շեշտվում է, և դա ընդունում է Ադրբեջանը, որ այո, պետք է շարունակել բանակցությունները հենց հիմնարար սկզբունքների շուրջ և արագացնել հիմնարար սկզբունքների համաձայնեցումը՝ հաշվի առնելով մինչ այժմ իրականացված աշխատանքը, որպեսզի հնարավոր լինի անցնել բուն համաձայնագրի նախագծի մշակմանը»,-ասել է նախարարը:

Նալբանդյանը նաև կարևորել է փաստը, որ հայտարարության մեջ ասվում է, նախագահները հանձնարարեցին շարունակել աշխատանքը շփման գծում միջադեպերի հետաքննության մեխանիզմների ստեղծման ուղղությամբ: Նախարարը հիշեցրել է, որ նման նախագիծ ընդունվել է նաև անցած տարվա մարտին Սոչիում, մինչդեռ ադրբեջանական կողմը անընդհատ ժխտում էր դրա գոյությունը, անգամ սպառնացին վետո կիրառել, երբ դեկտեմբերին Վիեննայում քննարկվում էր ԵԱՀԿ բյուջեն ու եռանախագահներն առաջարկով հանդես եկան՝ լրացուցիչ հատկացում նախատեսել այս մեխանիզմի ստեղծման համար:

Ինչ վերաբերում է փոխվստահության մթնոլորտի բարելավմանը, ապա նախարարը կարևորել է այն թե բանակցությունների ընթացքի համար, թե հիմնարար սկզբունքների համաձայնեցման փուլում, թե հետո:
«Եթե անգամ մենք գանք համաձայնության հիմնարար սկզբունքների շուրջ, իսկ բնականաբար համապատասխան դրական մթնոլորտի ստեղծումը կնպաստի դրան, անգամ դրանից հետո դեռ մեծ աշխատանք է սպասվում բուն պայմանագրի տեքստի մշակման ուղղությամբ տարվելիք աշխատանքի և իհարկե համապատասխան դրական մթնոլորտը, ոչ թե խանգարիչ, սադրիչ մթնոլորտը, որը ստեղծվում է ադրբեջանական կողմից և խանգարում այս գործընթացին, իհարկե կարևոր կլինի»,-ասել է ԱԳ նախարարը: