Ձեր վստահելի աղբյուրը

Մայրաքաղաքի կենտրոնից հեռու ապրողների համար ասֆալտապատ, լուսավոր փողոցներն ու նմանատիպ այլ «հաճույքներ» դեռևս անհասանելի են: Կարծես թե դրանց բնակիչները դեռ երկար կսպասեն: Գաղտնիք չէ, որ ընտրությունից ընտրություն քաղաքային իշխանություններն ու տվյալ տարածքից մեծամասնական ընտրակարգով խորհրդարան մտած պատգամավորն առավել ակտիվ են դառնում ու ինչ-ինչ բարեգործություններ անում:

Օրինակ, ԱԺ նախորդ ընտրություններին ընդառաջ, Մալաթիա-Սեբաստիա վարչական շրջանի կազմի մեջ մտնող Հաղթանակ թաղամասի որոշ փողոցներ ասֆալատապատվեցին: Ընտրությունների հետ այդ աշխատանքներն էլ ավարտվեցին: Որոշ ժամանակ առաջ էլ թաղամաս մտնող կենտրոնական փողոցի մի հատվածի լուսավորության խնդիրն է լուծվել: Բնակիչները հուսով են, որ մայիսին ընդառաջ իրենց մի շարք խնդիրներ լուծում կստանան: Իսկ խնդիրները շատ են…

Շենգավիթ համայնքի Շարուրի փողոցի /Չարբախ/ բնակիչներից մեկը դիմել է խմբագրություն, դժգոհելով, որ փողոցի լուսավորությունը շատ վատ է, մի քանի լապտեր է լուսավորում փողոցը, իսկ վերջում դրանք էլ չկան:
«Մասնավորապես, 9 հարկանի շենքերն ընդգրկող 26 շենքը (3 մուտքով), 28 շ. (2 մուտք), 28/1 (1 մուտք), 28/2 շ. (4 մուտք)՝ ամբողջությամբ զրկված են բակային լուսավորությունից, ինչի արդյունքում, գիշերային ժամերին գողության դեպքեր են գրանցվում»,-պատմեց մեզ թաղամասի բնակիչը, հիշեցնելով, որ ավագանու ընտրությունների ժամանակ հայտարարվում էր, թե մայրաքաղաքի լուսավորության խնդիրը գերակա է, իսկ ընթացքում դրան ուղղված քայլեր, գոնե բնակության իր տարածքում քաղաքացին չի նկատել:

«Սովետի ժամանակ լուսավորության հարցը լուծված էր, հետո, նախորդ ընտրությունների ժամանակ, բակերի կեսի լուսավորության հարցը լուծվեց, իսկ հիշյալ շենքերին մոտ, որտեղ մոտ 270 ընտանիք է ապրում, առհասարակ ոչինչ չի արվել»,-պատմեց քաղաքացին: Նա նաև դժգոհություն հայտնեց, որ շենքերի տանիքի վերանորոգմամբ էլ բնակիչներն են զբաղվում, իսկ այդ շենքերի վերելակների վիճակն ուղղակի անմխիթար է: «Մարդիկ վախենում են լիֆտ նստել»,-ասում է բնակիչն ու մեջբերում համատիրության պատասխանը` «փող չկա»:

Աջափնյակ թաղամասի Նազարբեկյան փողոցի բնակիչներից մեկի խոսքով, թիվ 25, 26 շենքերը բնակեցվել են 1980-ականների վերջերին, որևէ անգամ վերելակները չեն փոխվել: «Մենք ցածր հարկում ենք ապրում, վերելակից չենք օգտվում, բայց այնպես աղմուկ-աղաղակով է աշխատում, մարդ կարծում է` հիմա փուլ կգա»,-ասաց նա:

Քաղաքապետարանի հասարակայնության հետ կապերի վարչության պետ Արթուր Գևորգյանն այս հարցի կապակցությամբ Panorama.am-ին ասաց. «Վերելակները մեր թեման չեն: Դրանով զբաղվում են Արտակարգ իրավիճակների նախարարությունը և համատիրությունը: Համատիրության սեփականությունն է, թող տիրություն անեն: Բնակիչները թող համատիրությանը դիմեն»:
Նշենք, որ ավագանու ընտրությունների ժամանակ կոնկրետ ԲՀԿ-ն  խնդիր էր դրել անել հնարավորինը, որ համատիրությունը դեմքով շրջվի դեպի բնակիչը և տարատեսակ վճարներ պահանջելուց զատ նաև իր պարտականությունները կատարի: Առայժմ համատիրությունները քաղաքացիներին մեջքով են կանգնած:

Նախորդ տարի Արտակարգ իրավիճակների նախարարության տեխնիկական անվտանգության ազգային կենտրոնի տնօրեն Աշոտ Պետրոսյանը հայտարարեց, թե վտանգավոր օբյեկտների 43-45% վերելակներն են։ Նրա տվյալներով, Երևանում ընդհանուր առմամբ գրանցված է 4833 վերելակ, որոնցից 2010թ.-ին փորձաքննություն են անցել 2898-ը, իսկ բացասական եզրակացություն են ստացել 361-ը: Ի դեպ բացասական եզրակացության ստացած վերելակների մեծամասնությունը` 312-ը, գտնվում են Մալաթիա-Սեբաստիա վարչական շրջանում: Պետրոսյանը նաև ասել էր, որ իրենց կառույցը ստուգող, վերահսկող չէ, իրենք տնտեսվարող սուբյեկտի հետ պայմանագիր կնքելուց հետո միայն անցկացնում են փորձաքննություն: Ստացվում է, որ վերելակների համար միակ պատասխանատուն համատիրությունն է, որին չեն վերահսկում:

Աջափնյակ վարչական շրջանի Նազարբեկյան փողոց 25 և 26 շենքերից մեկի բնակիչը նաև նշեց, թե միակ բանը, որից չեն դժգոհում լուսավորությունն է: Խմբագրությանը դիմած քաղաքացին բողոքեց, թե հիշյալ շենքեր տանող հատվածում առհասարակ ասֆալտապատ ճանապարհ չկա:

«Մի քանի տարի առաջ այդ տարածքում սկսեցին եռահարկ շենքի շինարարություն իրականացնել, ինչի հետևանքով վատ վիճակում գտնվող ճանապարհները հայտնվեցին վատթար վիճակում: Հետո շենքը մնաց կիսաավարտ, ճանապարհներն էլ` քանդված»,-պատմեց բնակչուհին, ավելացնելով, որ այն հատվածում, որտեղով մարդիկ են քայլում, բացվել է ավտոտեխսպասարկման կետ ու հիմա անցնելու համար միակ քիչ թե շատ նորմալ վիճակում գտնվող ճանապարհի վրա ջարդուխուրդ եղած կամ փչացած մեքենաներ են կայանում:

«Հայտարարում էին, որ քաղաքապետարանը նաև բակային տարածքներում է ասֆալտապատման աշխատանքներին հետամուտ լինելու, բայց ոչ մի փոփոխություն չկա` փոսերն ու «լադոգները» տասնամյակի պատմություն ունեն»,-դժգոհեց մեզ դիմած բնակչուհին: Նրա խոսքով, այդ տարածքում ոչ մի կանաչ ծառ ու թուփ էլ չկա, իսկ ամռանը «շոգից ու փոշուց խեղդվում ենք»:
Շարուրի փողոցի բնակիչը պատմեց նաև, որ հիշյալ շենքերի բնակիչները մոտ մեկ տարի առաջ նամակեն գրել քաղաքապետարան` մտահոգություն հայտնելով շենքի կոյուղատարի վիճակի վերաբերկալ: Բնակիչների պատմելով, կեղտաջրերը լցվում են շենքերի նկուղները: «Քաղաքապետարանն անպատասխան է թողել նամակը, իսկ երբ բնակիչները գնացել են թաղապետարան, մի ներքին հեռախոսահամար են տվել, որ ողջ օրը զբաղված է»,-դժգոհեց քաղաքացին:

Մալաթիա-Սեբաստիա համայքի Հաղթանակ թաղամասը, որն այժմ ընդգրկված է Երևանի կազմում, շատ «հաճույքներից» է զրկված: Այստեղ սեփական տներ են, թաղամասի բնակելի տարածքն արագորեն ընդարձակվում է, սակայն խնդիրներն այդպես էլ մնում են չլուծված: Վերջին փողոցներում մարդիկ զրկված են հանրային ծառայություններից օգտվելու հնարավորությունից անգամ, չկա բնական գազ, ֆիքսված հեռախոսակապ, փողոցների վատ վիճակի մասին խոսելն ավելորդ է, վերջին մի քանի փողոցներում նույնիսկ ընդհանուր կոյուղատար չկա, դրանց փոխարինում են բակերում արված փոսերը:

Չնայած բնակելի տարածքն, ինչպես ասացի, ընդարձակվել է, սակայն թաղամաս մտնող երկու երթուղայինները չեն երկարացրել իրենց երթուղին: Թիվ 23 երթուղայինի վարորդներից մեկը մասնավոր զրույցում ասաց, թե իրենց գծի տերը ցանկացել է մի քիչ առաջ գնալ, ինչին ընդդիմացել է թիվ 56 երթուղայինի գծի տերը, հարցը փակվել է ի վնաս բնակիչների: Իսկ աշխատանքից վերադարձող քաղաքացիները հատկապես ձմռան ամիսներին ստիպված են մութ ու քարքարոտ փողոցներով դեպի տուն շարժվել`թափառող շների հարձակման վախը սրտներում:

Նշենք, որ այստեղ բարձրացված խնդիրների ու դրանց լուծման ուղղությամբ անելիքներ վերաբերյալ Panorama.am-ը գրավոր կարգով հարցեր է ուղարկել Երևանի քաղաքապետարանին: Դրանք ստանալուն պես կներկայացնենք մեր ընթերցողներին:
Միայն հիշեցնենք, որ Երևանի զարգացման 2010-2013 թվականների քառամյա ծրագրի հիմնական գերակայություններից է նաև մայրաքաղաքի ջրամատակարարման, աղբահանության, սանմաքրման, կանաչապատման և բարեկարգման, բազմաբնակարան բնակելի շենքերի կառավարման ոլորտներում իրական բարեփոխումները և նախատեսված ծրագրերի արդյունավետ իրականացումը, բակային տարածքների բարեկարգման միջոցառումների շարունակականությունը:

Իսկ այդ ծրագրի իրականացման կայուն երաշխիքներն են հանդիսանում Հայաստանի Հանրապետության Սահմանադրությունը, Երևանի՝ որպես համայնքի նոր իրավական կարգավիճակը, Երևան քաղաքում ժողովրդավարական ընտրությունների միջոցով ձևավորված տեղական ինքնակառավարման մարմինները՝ Երևանի քաղաքապետը և Երևանի ավագանին: