Ձեր վստահելի աղբյուրը

Վերջին մի քանի օրերին քաղաքական գործիչների ու լրատվամիջոցների քննարկման հիմնական թեման ոչ այնքան իշխանություն-ընդդիմություն հարաբերություններն են, որքան ՀՀԿ-ԲՀԿ հարաբերություններում նկատվող լարվածությունը, ինչն առավելապես արտահայտվում էր փոխադարձ կսմթոցներով, կոչերով ու խորհուրդներով: Ընդ որում, երկու կողմ էլ պնդում է կոռեկտության սահմաններից դուրս չգալու անհրաժեշտության մասին: «Կրակին յուղ» լցրեց նաև Վարդան Օսկանյանի հայտարարությունը, որը ոմանք շտապեցին որակել որպես Ռոբերտ Քոչարյանի միջամտության փորձ հատկապես ԲՀԿ գործերին: Բարգավաճականները մի քանի անգամ հայտարարեցին, թե իրենք Քոչարյանի հետ որևէ կապ չունեն, բայց դրանից խոսակցությունները չնվազեցին: Արդյունքում լրատվամիջոցներում լուրեր շրջանառեցին, թե շուտով կոալիցիան ստիպված է լինելու նոր հուշագիր ստորագրել` հատկապես կապված 2013թ. նախագահական ընտրությունների հետ:

Եվ ահա, այսօր շատ հարցերի պատասխաններ տրվեցին ԱԺ ԲՀԿ-ական պատգամավոր Վարդան Բոստանջյանի մամուլի ասուլիսում: Մասնավորաբար, խոսելով նոր կոալիցիոն համաձայնագրի ստորագրման հնարավորության մասին, բանախոսն նշել է, որ այն կարող է ստորագրվել, եթե նման փաստաթղթի կարիքը լինի. «Բոլոր պարագաներում նոր փաստաթղթի առաջ գալն իր մեջ ծանր բան չի կրում: Եթե հայտարարության ու նոր հուշագրի կարիք լինի, դա ծանր բան չէ: Դրա կարիքը չեմ կարծում հիմա կա, բայց եթե լինի, թող ստորագրեն ի՞նչ է եղել որ: Կարծում եմ որևէ փաստաթղթի ստորագրումը դատապարտելի չէ» (http://panorama.am/am/politics/2012/02/01/v-bostanjyan/):

Ինչ վերաբերում է 2013թ. նախագահական ընտրություններում ԲՀԿ դիրքորոշմանը, ապա ըստ Բոստանջյանի, «մենք պարզապես առիթ չունենք չսատարելու Սերժ Սարգսյանին: Ես զերծ եմ մնում իմ ղեկավարի անունից խոսել, բայց մենք ունենք փաստաթուղթ, որը ենթակա չէ փոփոխման»: Ճիշտ է, Բոստանջյանը սա ներկայացնում է որպես իր տեսակետը, սակայն հասկանալի է, որ նման պատասխանատու հայտարարություններ նա հազիվ թե աներ առանց Գագիկ Ծառուկյանի հետ համաձայնեցնելու:
Ուրեմն` ինչ կարող է սա նշանակել:

Առաջին. ԲՀԿ-ն փաստացի հայտարարում է, որ առնվազն մինչև խորհրդարանական ընտրությունները կոալիցիայից դուրս գալ չի պատրաստվում, չնայած, որ այս թեմայով ևս քիչ չեն եղել քննարկումները: Իսկ դուրս գալու պարագայում անգամ շարունակում է հավատարիմ մնալ մոտ մեկ տարի առաջ ստորագրված կոալիցիոն հուշագրին: Ի դեպ, մենք առիթ ունեցել եք նշել, որ այդ հուշագիրը ոչ միայն կոնկրետ կոալիցիոն համագործակցության, այլև կոալիցիայի մեջ մտնող քաղաքական ուժերի` առաջիկա երկու ընտրությունների ժամանակ ունենալիք պարզ պարտավորվածությունների մասին հուշագիր է, որն իր ուժը չի կորցնում, եթե նույնիսկ կոալիցիան դադարի գոյություն ունենալ:

Երկրորդ. ԲՀԿ-ն ըստ էության նշում է, որ նոր համաձայնագրի անհրաժեշտություն չի զգում, քանի որ նախորդին հավատարիմ են, սակայն եթե կարիք լինի, ապա պատրաստ են ստորագրել:

Հասկանալի է, որ շուտով կսկսվեն նոր հարձակումներ ԲՀԿ ուղղությամբ, ընդ որում` առավելապես այն ուժերի կողմից, որոնք կամ ռևերանսներ էին անում ԲՀԿ հանդեպ, կամ այդ քաղաքական ուժին «պաշտպանում» ՀՀԿ-ից (առավել հաճախ` արջի ծառայություն մատուցելով), կամ ուղղակի ավելի էին փորձում սրել ներկոալիցիոն հարաբերությունները: Սակայն ակնհայտ է, որ ԲՀԿ-ն այս կամ այն կերպ պետք է կողմնորոշվեր և հստակեցներ իր դիրքորոշումը: Մնում է միայն մեկ բաց. մայիսին կայանալիք խորհրդարանական ընտրություններն ու դրանից հետո այս կուսակցության դիրքորոշումը: Սակայն, կարծում ենք, այդ հարցերի պատասխաններն էլ շուտով կտրվեն: Ընդ որում, հազիվ թե շատ հեռու ապագայում: