Ձեր վստահելի աղբյուրը

Այսօր «Հայկական ժամանակ» օրաթերթի խմբագրությունը հանդես է եկել հայտարարությամբ` թերթի պատասխանատու Հայկ Գևորգյանի կալանավորման վերաբերյալ, որը քիչ առաջ լրագրողների հետ հանդիպմանը ներկայացրեց ՀԺ-ի գլխավոր խմբագիր Նիկոլ Փաշինյանը:

Ըստ հայտարարության, Հ. Գևորգյանին կալանավորվելու և «Նուբարաշեն» քրեակատարողական հիմնարկ տեղափոխվելու ընթացքում զանգ կատարելու հնարավորություն չի տրվել և որևէ պետական մարմին նրա հարազատներին տեղյակ չի պահել, թե որտեղ է գտնվում Հայկ Գևորգյանը: Ոստիկանութան աշխատակիցները, ըստ Փաշինյանի հայտարարության, լրագրողին կալանավորելու որոշումը բացատրել են նրանով, որ դեռևս հունվարի 23-ից Հայկ Գևորգյանը գտնվում էր հետախուզման մեջ իր կողմից վարվող մեքենայի հետ կապված ճանապարհատրանսպորտային պատահարի առնչությամբ:
 
«Հայաստանի Հանրապետության օրենսդրության համաձայն, քաղաքացուն կարելի է հետախուզում հայտարարել, եթե նրա գտնվելու վայրը հայտնի չէ և նա խուսափում է ներկայանալ: Հայկ Գևորգյանը, ինչպես դրանից առաջ, այնպես էլ դրանից հետո ամենօրյա ռեժիմով շարունակել է ծավալել իր լրագրողական գործունեությունը, վարել է նույն ավտոմեքենան, այդ մեքենայով ներկայացել աշխատանքի, վերադարձել տուն, մասնակցել կառավարության նիստերին, լուսաբանել բարձրաստիճան պաշտոնյաների ասուլիսներ: Հայկ Գևորգյանն այդ ընթացքում նաև մի շարք հեռախոսազրույցներ է ունեցել ճանապարհային ոստիկանության պաշտոնյաների հետ, նրա նկատմամբ հետախուզում հայտարարած քննիչի հետ, և ասել, որ պատրաստ է ներկայանալ հարցաքննության, եթե իրեն պատշաճ, Հայաստանի օրենսդրությանը համապատասխան ծանուցագիր ուղարկվի: Խիստ իրավաչափ այդ առաջարկությունները, սակայն, չեն ընդունվել: Իրադարձությունների այսօրինակ ընթացքը հիմք է տալիս ենթադրելու, որ «Հայկական ժամանակ» օրաթերթի ներկայացուցչի նկատմամբ ոստիկանության կողմից իրականացվում է պատվիրված հետապնդում կապված իր լրագրողական գործունեության հետ»,-ասված է «Հայկական ժամանակ» օրաթերթի տարածած հայտարարության մեջ:
 
Հայտարարության մեջ նաև նշվում է, որ հունվարի 12-ին Հայկ Գևորգյանը ներկա է եղել Վովա Գասպարյանի և լրագրողների միջև տեղի ունեցած հարցուպատասխանին և առաջադրել «սուր հարցեր»:

«Այդ հարցուպատասխանի արդյունքում Հայկ Գևորգյանը հանդես է եկել Վովա Գասպարյանի մասին խայտառակ բովանդակություն ունեցող հրապարակմամբ:

«Հրապարակման խայտառակ բնույթը պայմանավորված է ոչ թե լրագրողի կանխատրամադրվածությամբ, այլ Հայաստանի ոստիկանության պետի հետ կապված մի քանի ուղիղ և լրագրողական մեկնաբանության չտրվող փաստի արձանագրմամբ: Այդ հրապարակման լույս ընծայման օրը, երեկոյան փորձ է արվել վրաերթ միջադեպ սադրել Հայկ Գևորգյանի վարած մեքենայի մասնակցությամբ: Գևորգայնի սթափության արդյունքում, սակայն, դա չի իրագործվել: Դրան հաջորդող զարգացումները` Հայկ Գևորգյանի ձերբակալությունը և շինծու քրեական հետապնդումը, թելադրված են անձամբ Հայաստանի ոստիկանության պետ Վովա Գասպարյանի կողմից: Ենթադրում ենք, որ վերջինիս նյարդերը տեղի են տվել «Հայկական ժամանակի» 2012 թվականի փետրվարի 3-ին համարի առաջին էջում տպագրված «Մի պուճուր նվեր» հրապարակման պատճառով»,-հայտարարեց Փաշինյանը:

Հայկական ժամանակ օրաթերթի խմբագրակազմը հայտարարում է` Հայկ Գևորգյանի ձերբակալությունը Հայաստանի իշխանությունների և մասնավորապես ոստիկանապետ Վովա Գասպարյանի կողմից հրահանգավորված ապօրինի և լկտի հետապնդում է, որի նպատակը Գևորգյանի նկատմամբ անձնական վրեժ լուծելն է և նրա լրագրողական գործունեությունը կասեցնելն է: Վովա Գասպարյանը և իշխանության ներկայացուցիչները նպատակ ունեն խոչընդոտել «Հայկական ժամանակի» գործունեությունը: Այսպիսով, ՀԺ-ի խմբագրակազմը պահանջում է ազատ արձակել Հայկ Գևորգյանին` միաժամանակ հայտարարելով շարունակել պայքարը Հայաստանում կոռուպցիայի, ամենաթողության, սանձարձակության դեմ»:



Թեմայի մասին` Փաշինյան. Հայկ Գևորգյանի նկատմամբ պատվիրված հետապնդում է իրականացվում

Վրաերթ. Ոստիկանությունը մեղադրում է Հայկ Գևորգյանին

«Հայկական ժամանակ»-ի լրագրողի նկատմամբ քրեական գործ է հարուցվել