Ձեր վստահելի աղբյուրը

«Բռնեցին, նստացրին…Շատ տաք էի հագնված ու չեմ մրսել», -«Նուբարաշեն» քրեակատարողական հիմնարկում 72-ժամյա կալանքից հետո տված առաջին ճեպազրույցում հայտարարեց քիչ առաջ ազատ արձակված «Հայկական ժամանակ» օրաթերթի լրագրող Հայկ Գևորգյանը:

«Կասկած չունեի, որ ինձ բռնելու են, որովհետև այդ համակարգի ինտելեկտուալ մակարդակը լավ գիտեմ: Իրանք էդ ձերբակալությունը պատրաստել են 20 օր ու նույնիսկ այդ պայմաններում իրանք դա իրականացրել են ահռելի խախտումներով, ինչը իմ երազանքն էր, որը կատարվեց», -հավելեց Գևորգյանը:

Հարցին, թե դրանով ի՞նչ խնդիր էր լուծում ոստիկանապետը, լրագրողը պատասխանեց. «Եթե ինչ-որ մեկը ուզում էր խնդիր լուծել…չգիտեմ, ես ավելի լուրջ լուծումներ էի սպասում, բայց դրանք չիրականացան: Ես սպասում էի, որ իրենք ավելի լուրջ կվերաբերվեն իրենց գործին»:

Նրա խոսքով, իր դեմ կատարվածը ոչ թե պատիժ էր, այլ ուղղակի զգուշացում: «Մեծ ներկայացումներ են սարքում և փորձում են ստեղծել «սուպերպոլիցեյսկիի» կերպար, և ուզում են ցույց տալ, թե ինչ է լինում այն մարդու հետ, ով ոստիկանապետի մասին բացասական բան է գրում։ Բայց ինչպես տեսնում եք, ողջ առողջ ձեր դիմաց կանգնած եմ»», -նկատեց Հայկը:

Նա նաև ասաց, որ իր համար ազատ արձակումը անակնկալ էր:
Լրագրողները հետաքրքրվեցին` իրականում ի՞նչ է եղել հունվարի 13-ին, վրաերթ է եղել, թե այլ բան, Հայկն ի պատասխան ասաց, «դա յուղոտ պատառ է» և դրա մասին կխոսի ավելի ուշ: «Այս ընթացքում իրենք թույլ են տալու սխալներ և եթե ես այդ ամենը պատմեմ, ապա նրանք կօգտվեն դրանից ու այդ սխալները թույլ չեն տա», -հավելեց լրագրողը:

Ինչ վերաբերում է «Նուբարաշեն»-ում անցկացված ժամանակին, ապա Հայկ Գևորգյանի խոսքով, հետաքրքիր է անցկացրել: «Խցում գտնվել է 8 կալանավորվածի հետ, 8 տարբեր ճակատագրեր էին, 8 մարդկային տարբեր տիպաժներ և շատ հետաքրքիր էր` խոսում էին, պատմում էին և քանի որ ինձ թուղթ ու գրիչ չէին թողել վերցնեի, այդ բոլոր պատմությունները ես պահել եմ իմ հիշողության մեջ», -ասաց Հայկը:

Լրագրողները հետաքրքրվեցին նաև, թե իսկապե՞ս իրեն տուժող համարող Աշոտ Ֆրանգուլյանին ռուսերենով (բլյատ) հայհոյանք է տվել, Հայկ Գևորգյանը պատասխանեց. «Ես բացառապես օգտագործում եմ հայկական հայհոյանքներ: Որևէ մեկին չեք գտնի, որ ես էդ բառն ինձանից լսի»:

ՀԺ-ի գլխավոր խմբագիր Նիկոլ Փաշինյանն իր հերթին նկատեց, որ որևէ մեկի համար սպասելի չէր, որ Հայկի ձերբակալությունը այդպիսի արձագանք կստանա:

Դատախազության լրատվական ծառայությունից տեղեկացնում են, դատավարական ղեկավարում իրականացնող դատախազը փետրվարի 6-ին որոշում է կայացրել փոփոխել Հ.Գևորգյանի նկատմամբ ընտրված խափանման միջոցը: Նկատի ունենալով, որ Հ.Գևորգյանը մեղադրվում է ոչ մեծ ծանրության հանցանք կատարելու մեջ, նախկինում դատապարտված չի եղել, ունի մշտական բնակության վայր՝ դատախազի գնահատմամբ նման պայմաններում բացակայում է նրան կալանքի տակ պահելու անհրաժեշտությունը: Ուստիև որոշում է կայացվել նրա նկատմամբ որպես խափանման միջոց ընտրել ստորագրություն չհեռանալու մասին: