Ձեր վստահելի աղբյուրը

ԱԺ ԲՀԿ խմբակցությունը, այսօր չի մասնակցել «Կանխիկ գործառնությունների սահմանափակման մասին» նախագծի քվեարկությանը, ինչի արդյունքում քվեարկությունը տապալվել է: Այս և մի շարք հարցերի շուրջ, Panorama.am-ը զրուցեց ԱԺ ֆինանսավարկային և բյուջետային հարցերով մշտական հանձնաժողովի նախագահ Գագիկ Մինասյանի հետ:

-Օրինագիծն ունի ընդգծված հակակոռուպցիոն էություն, այն սահմանափակում է կանխիկ գործարքները: Մասնավորապես, առաջին, ցանկացած մեկ գործարք, որը գերազանցում է 3 միլիոն դրամը պետք է իրականացվի փոխանցման ճանապարհով: Ըստ էության, մեր քաղաքացիները նման գործարք կատարում են հիմնականում երկու պարագայում, երբ բնակարան կամ ավտոտրանսպորտային միջոց են վաճառում: Իհարկե, կան մեծահարուստներ, ովքեր այդ գնի սահմաններում զարդեր կամ այլ ապրանքներ են գնում: Այդ տեսնակյունից, միգուցե ոմանց համար ցանկալի չէ, որ հասարակությանը տեսնի այդ ճոխությունները: Եթե օրենքը ուժի մեջ մտնի, ապա այն մարդիկ, ովքեր բավականին մեծ հաճախակիությամբ իրականացնում են, այսպես ասած, ճոխ գնումներ, դրանք իրենց գործարքներում կլինեն թափանցիկ:

Բազմաթիվ զեկույցներ են եղել այն մասին, որ երկու թիրախային կոռուպցիոն ոլորտեր կան՝ առողջապահոթյունն ու կրթությունը, և ահա այս օրինագիծն այդ երկու ոլորտներին մեծ ուշադրություն է դարձնում: Մասնավորապես` նշվում է, որ եթե առողջապահության ոլորտում վճարը 3 հարյուր հազար դրամից բարձր է, ապա այն պետք է իրականացվի փոխանման միջոցով: Իսկ ահա կրթության ոլորտում, ցանկացած ուսման վարձի վճարում պետք է տեղի ունենա անկանխիկ ձևով:
 
Սրանք այն հիմնական շեշտադրումներն են, որոնք ցույց են տալիս, որ այս օրենքի ուժի մեջ մտնելուց հետո էապես կնվազի կոռուպցիոն երևույթներն  նշված ոլորտներում: Եվս մեկ կարևոր դրույթ. խոսքս վճարման քարտերի կիրառման հնարավորության մասին է: Օրենքով պարտադրվում է Երևանում, հետո մարզկենտրոններում, այնուհետև քաղաքական համայնքներում, ցանկացած առևտրային օբյեկտ, որը գերազանցում է 200 քմ տարածք, որոշակի ժամանակային սանդղակով, պետք է տեղադրի «Պոս տերմինալներ»:

Դրանք այն սարքերն են, որոնք թույլ են տալիս վճարողին կամ գնորդին, անկանխիկ ձևով իրականացնել իրենց առևտուրը: Սակայն սա պարտադրանք չի գնորդի համար, նա կարող է դրանց առկայության պայմաններում ևս, իր առևտուրն անել կանխիկ: Սա միայն պարտադրանք է խոշոր խանութներին կամ հասարակական օբյեկտներին, որպեսզի նրանք պարտադիր ձևով այդ ծառայությունը մատուցեն հաճախորդներին: Ըստ էության, սա է օրենքի ողջ տրամաբանությունը և բոլոր քննարկումների ժամանակ, որևէ մեկը չի առարկել առ այն, որ օրենքն իսկապես հակակոռուպցիոն բնույթ ունի:

Քանի որ լիագումար նիստերում օրենքը քննարկվել է նախորդ նստաշրջանի ժամանակ, իսկ քվեարկությունը տեղափոխվել էր այս նստաշրջան, ԱԺ նախագահը առաջարկեց գլխադասային հանձնաժողովին (ԱԺ ֆինանսավարկային և բյուջետային հարցերոց մշտական հանձնաժողով) ևս մեկ քննարկում ծավալել՝ բոլոր խմբակցությունների ներկայացուցիչների մասնակցության: Այդ քննարկումը տեղի ունեցավ, որին մասնակցեցին նաև օրինագծի հեղինակները: Մի քանի ժամ տևած քննարկման արդյունքում ամրապնդվեց այն տեսակետը, որ առաջին ընթերցման համար օրինագիծը լրիվ պատրաստ է:

-Պարոն Մինասյան, այդ դեպքում, ինչո՞վ էր պայմանավորված ԲՀԿ խմբակցության քայլը:

Ես արդեն ասացի, որ ավելի վաղ եղած քննարկումների ժամանակ ԲՀԿ-ն որևէ սկզբունքային առարկություն չի ներկայացրել: Սովորաբար, երբ որևէ խմբակցություն չի մասնակցելու քվեարկությանը, այդ խմբացության ղեկավարը, նախորօք, որպես քաղաքական դիրքորոշում, տեղեկացնում է այդ մասին, ինչն առավել ընկալելի է դարձնում նրանց ապագա քայլերը:

Այս քվերակության ժամանակ նման բան տեղի չի ունեցել, ինչն արդարացիորեն առաջացրեց մեր վրդովմունքը: Փաստի առնչությամբ խորհրդարանում ելույթեր եղան, որոնք դատապարտելի էին համարում այդ կեցվածքը:

Եթե իրենք դեմ էին այդ օրինագծին, ապա պետք է դեմ քվեարկեին դրան: Այդ դեպքում օրինագիծը կանցներ հաջորդ փուլ և երկրորդ ընթերցման ռեժիմով իրենք հնարավորություն կունենային իրենց տեսակետներն արտահայտելու: Սակայն նրանք գնացին բավականին անհասկանալի ճանապարհով և ուղղակի չմասնակցեցին քվերակությանը, ինչի արդյունքում օրինագիծը տապալվեց: Կարելի է հասկանալ մի քաղաքական ուժի, որը դեմ է ինչ-որ օրինագծի, կարելի հասկանալ, որ ձեռնպահ է, իսկ երբ քաղաքական ուժը չի մասնակցում քվեարկությանը, դրա մասին նախորօք քաղաքական հայտարարություն չանելով, մի բան կարող է նշանակել. նման որոշումները կայացվում է խմբակցությունից դուրս, քանի որ այդ խմբակցության որևէ անդամ, այդպես էլ չասած, թե ինչով էր պայմանավորված իրենց այդ դիրքորոշումը: