Ձեր վստահելի աղբյուրը

Նախօրեին ԱԺ «Օրինաց երկիր» խմբակցության անդամ Գագիկ Բաղդասարյանը ԱԺ նախագահ Սամվել Նիկոյանին դիմում է ներկայացրել պատգամավորական մանդատը վայր դնելու վերաբերյալ: Panorama.am-ի հետ զրույցում պատգամավորը, ում դեռևս նախկին համարելը սխալ է, քանի որ նա իրավունք ունի առաջիկա 14 օրերի ընթացքում կա’մ հաստատել որոշումը ու վայր դնել մանդատը, կա’մ հետ վերցնել դիմումը ու շարունակել օրենսդրական գործունեությունը, ներկայացրեց որոշման նախապատմությունն ու այն, թե ի՞նչ է պատրաստվում անել առաջիկայում:

Նախ, սկսենք դրդապատճառներից. «Որոշումը վաղուց էի կայացրել, քանի որ կուսակցության այսօրվա վարած քաղաքականությունն ինձ այլևս հոգեհարազատ չէ: Կուսակցությունում էլ, հավանաբար զգում էին, որ ես այսօր կամ վաղը հայտնելու եմ իմ որոշումը իրենց շարքերը լքելու վերաբերյալ, քանի որ քանի ամիս է, այս նախընտրական զարգացումների ֆոնին, ինձանից որևէ հստակ բան չէին կարողանում լսել, թե ինչ եմ պատրաստվում անել: Այնպես որ այն, ինչ եղավ երկու օր առաջ, ուղղակի հարմար առիթ էր իբր իրենց կողմից հարցերը լուծելու համար»,-նշեց Գ. Բաղդասարյանը:
Պատգամավորը նկատի ունի երկու օր առաջ կայացած քվեարկությունը, որն առիթ հանդիսացավ, որպեսզի ՀՀԿ-ի ու ԲՀԿ-ի միջով էլ սև կատու անցնի. «Կանխիկ գործառնությունների սահմանափակման մասին» օրինագծին ԲՀԿ-ն, ինչպես հիշում ենք, դեմ քվեարկեց, ինչով տապալեց դրա ընդունումը, իսկ Գ.Բաղդասարյանն էլ, ի տարբերություն իր արդեն նախկին կուսակից գործընկերների, պարզապես ձեռնպահ մնաց: Սա էլ ՕԵԿ-ն օգտագործեց, ինչպես նշեց մեր զրուցակիցը, հապշտապ քաղխորհրդի նիստ գումարել ու Գագիկ Բաղդասարյանին հեռացնել կուսակցությունից` «անպարկեշտ պահվածքի» համար:

«Իրականում հենց կուսակցությունն է շեղվել «Օրինաց երկիր» անունը կրող քաղաքական ուժին հարիր պահվածքից և ոչ թե ես, ու ոչ թե նրանք են ինձ հեռացրել, այլ ես եմ հրաժարվում իրենց հետ այլևս գործ ունենալուց: Պարզապես որպեսզի իրենց համար այդքան էլ ցավոտ չլինի, այդ քաղխորհրդի նիստի բեմադրությունը կայացրեցին, ինչին ես սպասում էի, որովհետև Հեղինե Բիշարյանն ինձ մոտեցավ ու փորձ արեց կշտամբել, թե իմ պատճառով (քվեարկությանն այդպես մասնակցելու հետևանքով) իրենք թուքումուր են կերել, բայց դա էլ չհաջողվեց. Իրականում ինձ համար օրինաց երկիր կառուցելու գաղափարն է հոգեհարազատ, այլ ոչ թե չգիտեմ ինչ գաղափարներ դավանելով այդ անվան տակ պաշտոններ ու աթոռներ զբաղեցնելը…դե իսկ ո՞ւմ է դուրեկան լսել իր մասին ճշմարտությունը» ,-պատմեց Գ.Բաղդասարյանը:

Մեր զրուցակիցը նշեց, որ թերևս Ս.Նիկոյանին ուղղված դիմումը հնարավոր է ետ վերցնի ու պատգամավորական մանդատն էլ վայր չդնի, քանի որ հիմա հասկանում է` դա ավելի շատ նահանջի կնմանվի, իսկ ինքը ոչ միայն չի պատրաստվում նահանջել (ո՞ւմ համար), այլ պատրաստվում է իր կենսագրությունն ու փորձը կիրառել այս երկրին օգուտ բերելու համար: Սա նշանակում է, որ պատգամավոր Գ.Բաղդասարյանը չի բացառում նաև համագործակցությունն այլ ուժերի հետ, կարևորը, որ նրանց քաղաքականությունը լինի իր սկզբունքներին հոգեհարազատ` մտածել ոչ թե տաքուկ աթոռների, այլ երկրի մասին:

Մեր հարցին ի պատասխան, որ աղմկահարույց այդ օրինագծի քվեարկությունից ու իր կուսակցության շարքերը լքելուց հետո նրա անունը գուցե կապեն ԲՀԿ-ի հետ, Գ.Բաղդասարյանը նշեց, որ արդեն իսկ նման շշուկներ իրեն հասել են: Բայց այս պահին որևէ կոնկրետ քայլի մասին նա ասել չի կարող, քանի որ առարկայական քննարկում այս կամ այն կուսակցության հետ չի եղել ու ինքն էլ դեռ, ամենակարևորը, որևէ որոշում չի կայացրել. «Կարևորն այն է, որ վերջին ամիսներին ես հասկանում էի, որ այդ մարդկանց հետ չեմ կարող շարունակել ճանապարհ գնալ, իսկ հիմա էլ հասկանում եմ, որ ինձ մանդատը պետք է, որպեսզի նրանց կարողանամ դուրս մղել քաղաքականությունից… Ես չեմ ուզում Ազգային Ժողովից դուրս գալ, ես ուզում եմ այդ մարդկանցից ձերբազատվել, ինչը հաջողվեց ու նաև, որ նրանք ԱԺ-ից հեռանան»,- ընդգծեց նա ու հավելեց` հիմա շատ նպաստավոր պայմաններ են ստեղծվել թե’ մեկին, թե’ մյուսին հասնելու համար և գուցե 14 օրից իր դիմումի մասին վերջնական մոռանան: