Ձեր վստահելի աղբյուրը

Հայաստանի բոլոր գումարումների Ազգային ժողովները աչքի են ընկել Հակոբ Հակոբյանների առատությամբ: Պարզվում է նրանք, որոնց լայն հանրությունը տարբերում է միայն տիրապետած սեփականությամբ կամ մականուններով, մտադիր են մասնակցել նաև խորհրդարանական գալիք ընտրություններում և վերստին օրենսդրական գործունեություն ծավալել: Panorama.am-ը զրուցել է Հակոբ Հակոբյանների հետ ու պարզել նրանց մտադրությունները:

ԱԺ Սոցիալական հարցերի մշտական հանձնաժողովի նախագահ Հակոբ Հակոբյանը, ում հանրությունը գիտի «Թունելի Հակոբ» անվամբ, մտադիր է կրկին առաջադրվել իր հայրենի Մարտունու տարածաշրջանն ընդգրկող թիվ 24 ընտրատարածքում: Այս տարածաշրջանում նա մեծամասնական ընտրակարգով երեք անգամ հաղթելու փորձ ունի և վստահ է, որ չորրորդ փորձը ևս հաջողությամբ կպսակվի: ՀՀԿ-ական գործիչը նաև չի կասկածում, որ կստանա կուսակցության աջակցությունը. «Եթե ես առաջադրվելու եմ, կուսակցությունն էլ պետք է պաշտպանի ինձ, տրամաբանական չէ՞»:
Պոտենցիալ հակառակորդների մասին Հակոբ Հակոբյանը տեղեկություններ չունի: Առայժմ նա պատկերացում չունի, թե ովքեր կլինեն իր մրցակից թեկնածուները, սակայն վստահ է, որ կհաղթի նաև այս անգամ: Իսկ խոսակցություններն այն մասին, թե նա իր որդուն ևս ամեն կերպ ջանում է խորհրդարան մցնել, Հակոբ Հակոբյանի վստահեցմամբ` միտումնավոր հորինված թեմա է:

Գործող պատգամավորներից մյուս Հակոբ Հակոբյանը, ով առավելապես հայտնի է «Պիվի Հակոբ» անվամբ, նույնպես մտադիր է առաջադրվել ու կրկին` իր նախկին ընտրատարածքում: «Երևանի գարեջուր»-ի նախկին ղեկավարը 2007թ. խորհրդարանական ընտրություններում առաջադրվել ու հաղթել էր Տավուշի մարզի թիվ 41 ընտրատարածքում, որն ընդգրկում Բերդի ու Դիլիջանի տարածաշրջանները: Այս անգամ ևս անկուսակցական պատգամավորը` որպես անկախ թեկնածու, մտադիր է առաջադրվել նույն ընտրատարածքում, սակայն չի բացառում, որ որոշ քաղաքական ուժեր կսատարեն իրեն: «Ենթադրում եմ, որ կլինեն ինձ սատարողներ, իսկ թե որ ուժը կոնկրետ, դժվարանում եմ ասել: Կարծում եմ` այն կուսակցությունը, որը նույն ընտրատարածքում չի առաջադրի իր թեկնածուին»,- նշեց նա:

Պոտենցիալ հակառակորդների մասին Հակոբ Հակոբյանը տեղեկություններ ունի միայն մեկից: Նրա խոսքով, մամուլից իմացել է, որ թիվ 41-ում հնարավոր է առաջադրվի մարքսիստ Դավիթ Հակոբյանը: Բայց այդ փաստը նրան չի մտահոգում.

«Մեծամասնականով իմ դեմ դնողներ, բնականաբար, կլինեն` և կուսակցություններից, և անկուսակցականներ: Բայց անկեղծ ասած ես ոչ մի մտավախություն չունեմ: Ի վերջո խոսքը ժողովրդինն է, իսկ ժողովուրդը ինձ ճանաչում է, գիտի թե 5 տարի ես ինչպես եմ աշխատել»: Հակոբ Հակոբյանի վստահեցրեց, որ վերընտրվելն իր համար «պարտադիր պայման չի», և ինքը փող չի բաժանելու. «Ոչ էն ժամանակ եմ ընտրվելուս համար գումար բաժանել, ոչ էլ հիմա եմ բաժանելու: Վստահաբար հայտարարում եմ, որովհետև գտնում եմ, որ գումար բաժանելը մարդկանց խաբել է, իսկ ես երբեք ոչ մեկին չեմ խաբում: Գումարով ընտրվեմ, որ հետո ոչ մեկը ինձ չտեսնի, դա իմ ոճը չէ: Ճիշտն ասած, առանձնապես մի մեծ քարոզարշավի կարիքն էլ չունեմ, քանի որ իմ ընտրատարածքում ինձ բոլորն էլ ճանաչում են»:

Հակոբ Հակոբյաններից մյուսը, որն հայտնի է «Ճոյտ» մականվամբ, գործող խորհրդարանում ընդգրկված չէ, սակայն նախկինում երկու անգամ պատգամավոր է դարձել հարազատ Էջմիածինն ընդգրկող ընտրատարածքից: 2007-ի ընտրություններում նա նույնպես առաջադրվել էր, սակայն պարտվեց` մանդատին տիրացավ Սեդրակ Սարոյանը` գեներալ Սեյրանը:

Այս անգամ էլ նա մտադիր է առաջադրվել նույն ընտրատարածքում և ըստ ամենայնի կպայքարի գեներալի դեմ:
Թե քաղաքական ուժերից որն իրեն կսատարի, Հակոբ Հակոբյանը դժվարացավ պատասխան ասել` հիշեցնելով միայն, որ ինքը ՀՀԿ անդամ է և պատրաստ է մրցել ոչ միայն գեներալ Սեդրակ Սարոյանի, այլև ցանկացած այլ թեկնածուի հետ:

«Ես կուսակցության սատարելու խնդիր չունեմ, կուսակցությունները իրենք իրենց պիտի սատարեն, ցանկացած կուսակցություն իրենց խնդիրներն ունեն: Ես ՀՀԿ անդամ եմ և իմ գաղափարներով շատ մոտ եմ կանգնած իմ կուսակցությանը, սատարում եմ ՀՀԿ-ին: Իսկ եթե ՀՀԿ-ում կգտնեն, որ ինձ սատարելով իրենց հեղինակությունը կբարձրանա, թող ասեն, եթե գտնում են, որ չի բարձրանա, իրանք էլ խնդիր ունեն ընտրություններին, ուրեմն թող չհայտարարեն»:

Հարցին, որ եթե այնուամենայնիվ կուսակցությունը որոշի չսատարել իրեն և մեկ այլ թեկնածուի առաջադրել նույն ընտրատարածքում, ինչ որոշում կկայացնի նա` Հակոբ Հակոբյանը պատասխանեց.

«Եթե ՀՀԿ-ն որոշի իմ դեմ թեկնածու առաջադրել, ես միևնույն է այդ կուսակցության անդամ եմ, պաշտպանելու եմ ՀՀԿ-ի շահերը և կգնամ ընտրություններին: Հանրապետական կուսակցությունը դա անձերի սեփականություն չի, դա գաղափարների հավաքատեղի է, իսկ ես իմ գաղափարից ուր պետք է փախչեմ, ես ընտրել եմ այդ ուղին: Ես ուր պետք է գնամ, ես հո ինձնից չեմ նեղանա»:

ՀՀԿ-ական գործչին հիշեցրեցինք նաև այն մասին, որ ամիսներ առաջ նա Էջմիածնում ՕԵԿ գրասենյակներ է բացել: Այդ փաստը նա վերագրեց որդուն.

«ՕԵԿ-ի հետ աշխատում էր իմ տղան, իր ընկերները ՕԵԿ-ական են, և ինքն աջակցում էր այդ կուսակցության ծրագրերին, և դա բնական, գեղեցիկ շփում էր: Ես իրեն ասել եմ՝ շփվի, բացի գրագետ դառնալուց, բացի քաղաքականապես զարգանալուց, դու ոչ մի բան չունես կորցնելու: Որովհետև ինքը ոչինչ չի ներդնում ընդեղ, բայց շփվում ա լուրջ, կայացած մարդկանց հետ, ինչին ես կողմնակից եմ: Ինքը հետո կորոշի` ՕեԿ-ին, թե ում է սատարելու: Բայց ես ՀՀԿ անդամ եմ, խնդիր չկա, մանավանդ որ ՕԵԿ-ը կոալիցիոն գործընկեր ա ու ՕԵԿ-ականները էնպիսի բաներ չեն արել, որ ես իրենց համարեմ էս երկրի թշնամի»: Նրա վստահեցմամբ` այս պահին, երբ առկա է կոալիցիոն հուշագիր, իրենք Հանրապետության նախագահի կողքին են: «Անկախ նրանից, թե ինչ արդյունքներ կլինեն ԱԺ ընտրություններից հետո, կմտնեմ խորհրդարան, թե ոչ, միևնույն է մենք պետք է աջակցենք հանրապետության նախագահին»:

Հակոբ Հակոբյաններից մյուսի հետ, ով առավել հայտնի է «Լեդի Հակոբ» մականվամբ, Panorama.am-ին կապվել չհաջողվեց: Նրա հնարավոր առաջադրման մասին առայժմ որևէ պաշտոնական տեղեկատվություն չկա, սակայն մեզ հասած լուրերի համաձայն` Հակոբ Հակոբյանը առաջադրվելու մտադրություն չունի: Հիշեցնենք, որ նա երեք անգամ պատգամավոր է ընտրվել Երևանի` Մալաթիա-Սեբաստիա համայնքն ընդգրկող ընտրատարածքից: 2008-ի մարտյան իրադարձությունների հետ կապված դատապարտման հետևանքով նրա պատգամավորական լիազորությունները վաղաժամկետ դադարեցվել էին: