Ձեր վստահելի աղբյուրը

Համաներման մասին որոշումը կատարելիս աշխատանքում թերացած 7 դատավորների հարցով Հայաստանի Արդարադատության խորհրդում (ԱԽ) նիստ դեռ չի կայացել: Այդ մասին Panorama.am-ին տեղեկացրեց Արդարադատության խորհրդի աշխատակազմի ղեկավար Շողեր Վարդանյանը: «Խորհրդի որոշումները հրապարակային են, կտեղադրվեն կայքում», -հավելեց Վարդանյանը` հրաժարվելով ներկայացնել դատավորների անունները:

Արդարադատության խորհրդի կարգապահական հանձնաժողովը դեռ նախորդ տարվա վերջին հայտարարել էր, որ դեկտեմբերի 28-ին հարուցվել են թվով 7 կարգապահական վարույթներ, իսկ երկու դատավորների վերաբերյալ նյութերն ուղարկվել են ՀՀ դատարանների նախագահների խորհրդի էթիկայի հանձնաժողովի քննարկմանը: Պատճառը, ըստ նույն հայտարարության, այն էր, որ որոշ խախտումներ են կատարվել «Հայաստանի Հանրապետության անկախության հռչակագրի 20-րդ տարեդարձի կապակցությամբ համաներում հայտարարելու մասին» Հայաստանի Հանրապետության Ազգային ժողովի որոշման կիրառման պրակտիկայում: Արդարադատության նախարարությունը այնուհետև տեղեկացրեց, որ իրենց կատարած ուսումնասիրությունների արդյունքում պարզվել է, որ 15 դատապարտյալի նկատմամբ համաներման ակտը չկիրառելը իրավաչափ չի եղել: Հիշեցնենք, որ արդարադատության նախարարությունն համապատասխան հանձնարարական էր ստացել Հանրապետության նախագահից` ուսումնասիրել համաներման կիրառման արդյունքում ծագած խնդիրները:

Ըստ ընթացակարգի, ԱԽ կարգապահական հանձնաժողովը հարուցում է վարույթ, հետո դատավորներից վերցվում են բացատրություններ, այնուհետև գործը ներկայացվում է Արդարադատության խորհրդի քննարկմանը:

Տարեսկզբին, մասնավորապես, արդարադատության նախարար Հրայր Թովմասյանը հայտարարել էր, որ մինչև փետրվարի կեսերը հայտնի կլինեն` որ դատավորներն են խախտում կատարել և ինչ պատիժ է սահմանվել նրանց նկատմամբ:

Panorama.am-ը ավելի վաղ հրապարակել էր  աշխատանքում թերացած դատավորներից երկուսի անունները. նրանք էին` Լևոն Բեգլարի Ավետիսյանը, որը 2008 թվականից մինչ այժմ աշխատում է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի դատավոր և Տիգրան Շահենի Պետրոսյանը, որը 1999 թվականից առ այսօր զբաղեցնում է Երևան քաղաքի Մալաթիա-Սեբաստիա վարչական շրջանի ընդհանուր իրավասության դատարանի նախագահի պաշտոնը։

Աշխատանքում թերացած դատավորների նույն ցանկում է հայտնվել նաև Արմավիրի մարզի ընդհանուր իրավասության դատարանի դատավոր Վահե Խալաթյանը: «Համաներումը պետք է կիրառվեր այլ դատարանի կողմից, ինքն է կիրառել», -Panorama.am-ի թղթակցի հետ զրույցում մեկնաբանելով իր ղեկավարած դատարանի դատավոր Վահե Խալաթյանի գործողությունները ասաց ՀՀ դատավորների միության նախագահ, Արմավիրի մարզի ընդհանուր իրավասության դատարանի նախագահ Հրաչիկ Սարգսյանը։

Նրա խոսքով, Խալաթյանին ԱԽ-ից դեռ չեն կանչել, և նա նկատողություն չի ստացել: «Խորհրդի նիստ են նշանակում, նախապես տեղեկացնում են: Ես գիտեմ, որ նրան (Վահե Խալաթյանին-հեղ.) չեն կանչել, ուրեմն նորություն չունեն», -նկատեց Դատավորների միության նախագահը:

Նրա խոսքով, դատավորին կարգապահական վարույթ հարուցելը դեռ չի նշանակում, որ նա պետք է դադարեցնի աշխատանքը: «Վարույթ հարուցելը չի նշանակում, որ դատավորին պետք է հեռացնեն աշխատանքից: Էդ ի՞նչ ա արել, որ հեռացնեն: Նկատողություն կամ զգուշացում պիտի տան, որը դեռ չեն արել: Այնպես որ, լուրջ խախտում նա թույլ չի տվել», -հավելեց Հրաչիկ Սարգսյանը:

Նշենք, որ «Դատական օրենսգրքով», դատավորին կարգապահական պատասխանատվության ենթարկելու մասին Արդարադատության խորհրդի որոշումները, ինչպես նաև դատավորին կալանավորելու, նրա լիազորությունները դադարեցնելու, նրան որպես մեղադրյալ ներգրավելու, դատական կարգով վարչական պատասխանատվության ենթարկելու համաձայնություն տալու մասին Հանրապետության Նախագահին առաջարկ ներկայացնելու վերաբերյալ Արդարադատության խորհրդի որոշումները վերջնական են, ուժի մեջ են մտնում Արդարադատության խորհրդի նիստում հրապարակման պահից և բողոքարկման ենթակա չեն: