Ձեր վստահելի աղբյուրը

Փետրվարի 11-ին Փաստաբանների պալատի (ՓՊ) անդամները ընդհանուր ժողով կգումարեն: Պալատի նախագահ Ռուբեն Սահակյանը մտահոգ է` քվորում ապահովելն է դժվար: «Ձեր միջոցով բոլորին հորդորում եմ գալ ժողովի», -Panorama.am-ի թղթակցի հետ զրույցում նկատեց ՓՊ նախագահ Ռուբեն Սահակյանը:

Այստեղ մտադիր են փոխել հաջորդ ժողովների մասնակցության ձևերը` կներկայանան ընտրության քվեարկություն կանեն:
Այս տարի Փաստաբանների պալատում նախատեսում են կյանքի կոչել նախորդ տարեվերջին «Փաստաբանների մասին» օրենքում կատարված փոփոխությունները, և այսուհետև յուրաքանչյուր փաստաբան պետք է պարտադիր վերապատրաստվի:

«Եթե երկու տարվա ընթացքում փաստաբանը այդ 48 ժամյա վերապատրաստում չունենա, կարող է ենթարկվել կարգապահական պատասխանատվության», -ներկայացրեց ՓՊ նախագահը` ընդգծելով, որ վերապատրաստումը փաստաբանը պետք է կատարի իր ֆինանսական միջոցներով:

Մյուս փոփոխությամբ, փաստաբանի արտոնագրումն այսուհետ լինելու է փաստաբանական դպրոցում սովորելու միջոցով: «Եթե առաջ մարդը կարող էր ունենալ երկու տարվա աշխատանքային ստաժ, գալ հանձնել քննություններ և ստանալ արտոնագիր, ապա այսօր արդեն բուհն ավարտած ուսանողը պետք է գա ընդունվի դպրոց, վճարովի հիմունքներով, հանձնել որակավորման քննություններ և ստանալ արտոնագիր», -կարգը ներկայացրեց Ռուբեն Սահակյանը:

Դպրոցում, որը այս տարվա ընթացքում պետք է կառուցվի, ապագա փաստաբանը վեց ամիս շարունակ կսովորի փաստաբանական հմտություններին հատուկ կանոնները, այնուհետև փորձառու փաստաբանի մոտ կանցնի փորձաշրջան` մեկ տարվա ընթացքում, և հետո միայն կհանձնի որակավորման քննություն: Այս ամենից հետո միայն արժանի փաստաբանը արտոնագիր կստանա:
Ինչ վերաբերում է որակավորման հանձնաժողովի ձևավորմանը, ապա դրա իրավասությունը դպրոցին չի հանձնվելու, այլ` Փաստաբանների պալատին: «Որովհետև եթե դպրոցն ունենա այդ իրավունքը, չի բացառվում, որ ցույց տա, որ հավակնորդը լավ է սովորել, աշխատել ու մի քիչ բարձրացնի գնահատականը: Մենք շահագրգռված ենք արտոնագրել միայն լավ գիտելիքներ ցուցաբերած անձնաց: Մեզ մոտ ոչ ոք չի կարող գնահատական ստանալ մեր աջակցությամբ: Դա բացառված է», -վստահեցրեց ՓՊ նախագահը:

Այս գործընթացների արդյունքում, Ռուբեն Սահակյանը հույս ունի, որ փաստաբանության որակը Հայաստանում կբարձրանա:
«Մենք ունենք փաստաբաններ որոնք դժգոհություն են առաջացնում հասարակության շրջանում, և մեր վարկանիշը չի կարող բարձրանալ քանի դեռ այդպիսի ոչ կրթված, ոչ բարեկիրթ փաստաբանների քանակը շատ է», -ասաց Պալատի ղեկավարը:
Այդպիսի փաստաբանները, ըստ Սահակյանի, Պալատից չեն հեռացվում, քանի որ նրանց փաստաբանության արտոնագիրը տրվում է անժամկետ: Պալատն ուղղակի կարող է կամ կարգապահական վարույթ հարուցել նրանց նկատմամբ, կամ կարգապահական վարույթի միջոցով որոշել` կա՞ նրա գործողություններում վարքագծի կանոների խախտում, թե՞ ոչ: Եթե պարզվում է, որ փաստաբանը խախտել է վարքագծի կանոնները, ապա նրա նկատմամբ հայտարարվում է նկատողություն կամ խիստ նկատողություն: Եթե շատ է դաժան եղել փաստաբանը վարքագծի կանոնների խախտման մեջ, ապա հնարավոր է, որ նրա արտանագիրը դադարեցվի:

«Արտոնագիրը դադարեցվում է այն դեպքում, երբ փաստաբանը ներգրավվել է քրեական գործով վարույթին, վարույթ իրականացնող անդամի` այսինքն քննիչի, դատախազի, դատարանի առաջարկությամբ: Հետևաբար նա ներկայացնում է ոչ թե իր վստահորդի շահերը, այլ վարույթ իրականացնող մարմնի շահերը: Մենք այդպիսի փաստաբաններին անվանում ենք գրպանի փաստաբաններ: Այդպիսի բան չպետք է լինի: Այդպիսի փաստաբաններից մենք ազատվելու ենք առաջին դեպքում», -ներկայացրեց Փաստաբանների պալատի նախագահը:

2011-ին Փաստաբանների պալատում փաստաբանների նկատմամբ շուրջ 40 կարգապահական վարույթ է հարուցվել, որից ավարտվել է 33-ը: Ընդհանրապես, Պալատի նախագահի խոսքով, վերջին երեք տարում կարգապահական վարույթների միջին թիվը տատանվել է 31-ի և 33-ի միջև: Այժմ Փաստաբանների պալատն ունի 1133 փաստաբան: