Ձեր վստահելի աղբյուրը

Արարատի մարզի թիվ 18 ընտրատարածքում թեժ մրցակցություն է սպասվում: Նման ենթադրություն կարելի է անել` հաշվի առնելով հավակնորդների առատությունը: Այս օրերին շրջանառվող տեղեկությունների համաձայն` առնվազն չորս հոգի հավակնում են պատգամավոր դառնալ այս ընտրատարածքից. Արայիկ Գրիգորյան, Գրիգոր Գրիգորյան (Շերիֆ), Արամ Սարգսյան և Ռազմիկ Թևանյան:
Panorama.am-ը զրուցեց նշված գործիչների հետ, ինչի արդյունքում պարզվեց, որ նրանցից առնվազն մեկն այս ընտրատարածքում առաջադրվելու մտադրություն չունի:

Ավելի վաղ հայտնել ենք, որ նախկին փոխոստիկնապետ, ԲՀԿ Արարատի մարզային շտաբի ղեկավար Գրիգոր Գրիգորյանի առաջադրման վերաբերյալ դեռևս վերջնական որոշում չկա: Նա հայտնել էր, որ սպասում է կուսակցության որոշմանը:

«Ավշար ալկո» ընկերության սեփականատեր Արայիկ Գրիգորյանը, ով նախորդ ընտրություններում պատգամավոր էր դարձել ՀՅԴ համամասնական ցուցակով, մեզ հետ զրույցում հրաժարվեց որևէ պարզաբանում տալ` պատճառաբանելով, որ զբաղված է: Փոխարենը ՀՅԴ Բյուրոյի անդամ Վահան Հովհաննիսյանը հայտնեց, որ կուսակցությունը մեծամասնական առաջադրումների վերաբերյալ որոշում դեռևս չի կայացրել, բայց Արայիկ Գրիգորյանի թեկնածության հարցը քննարկվում է. «Հնարավոր է ՀՅԴ-ն մեծամասնականով առաջադրի իր թեկնածուները` ինչպես Արարատի մարզում, այնպես էլ մյուս ընտրատարածքներում»:

Հարկ է նկատել, որ Արայիկ Գրիգորյանի անվան շուրջ տեղեկությունները նրան առաջադրումը կապում են ոչ թե ՀՅԴ-ի, այլ` ՀՀԿ-ի հետ: Ենթադրվում է, որ այս ընտրատարածքում անկուսակցական Արայիկ Գրիգորյանին կառաջադրի ու կսատարի հենց ՀՀԿ-ն: Վահան Հովհաննիսյանը ոչինչ չբացառեց` նշելով, որ անգամ այդ դեպքում հնարավոր է իրենք սատարեն «Ավշար ալկո»-ի սեփականատիրոջը: Անգամ չի բացառվում, որ ՀՅԴ-ն այդ դեպքում որոշի առաջադրել Արայիկ Գրիգորյանի եղբորը` Արամայիս Գրիգորյանին, ով նախկինում մեծամասնականով ընտրակարգով մասնակցության ու հաղթանակի փորձ ունի:

Հայրենի Արարատում առաջադրվելու փաստը` Panorama.am-ի հետ զրույցում, ժխտեց «Հանրապետություն» կուսակցության առաջնորդ Արամ Սարգսյանը: «Արարատի մարզում մեծամասնական ընտրակարգով ընտրություններին ես չեմ մասնակցի»,- վստահեցրեց Արամ Սարգսյանը` նշելով, որ որոշումը վերջնական է:
Պատճառն ըստ ամենայնի` նույն ընտրատարածքում ընկերոջ` Ռազմիկ Թևանյանի հնարավոր առաջադրումն է: «Ռազմիկ Թևանյանն իմ ընկերն է, և ես կողմ եմ, որ ինքն առաջադրվի: Ես պաշտպանելու եմ նրա թեկնածությունը»,- նշեց նա: Նա վստահեցրեց, որ այդ դեպքում աջակցությունը չի լինի միայն անհատական. «Ես համոզված եմ, որ Ռազմիկ Թևանյանի թեկնածությունը ՀԱԿ-ն էլ կպաշտպանի»:

Ինչ վերաբերում է հավանական մրցակիցներին, ապա Արամ Սարգսյանի վստահեցրեց. «Ռազմիկ Թևանյանը Արցախյան պատերազմին մասնակցած, Երասխի սահմանին 15 տարի կանգնած, հասարակության մոտ բարի համբավ ունեցաղ մարդ է: Ավելի հեղինակավոր մարդ այդ տարածքում դժվար է գտնել: Ես էլ այդ տարածքի բնակիչ եմ: Ես չեմ տեսնում մարդ, որ կկարողանա իրեն հաղթել»:

Սեփական հնարավորությունները բարձր է գնահատում նաև անձամբ Ռազմիկ Թևանյանը: «Ինձ խանգարող հանգամանք չկա, իհարկե Արայիկ Գրիգորյանը մրցակից է, բայց ես շատ ավելի լուրջ մրցակից եմ համարում Գրիգոր Գրիգորյանին (Շերիֆին)՝ իր անցած ճանապարհի, հեղինակության առումով: Վերջապես այդ մարդը որպես ներքին զորքերի հրամանատար մեր երկրի նորագույն պատմության մեջ մեծ դեր է ունեցել»,- հաստատելով իր առաջադրման մասին լուրերը:

Ինչ վերաբերում է ՀԱԿ-ի կողմից աջակցությանը, նա հրաժարվեց այդ մասին խոսել` չթաքցնելով Վազգեն Սարգսյանի ընտանիքի հետ ունեցած կապերն ու ըստ այդմ ենթադրվող աջակցությունը. «Մեր մարզը երբեք այնքան քաղաքականացված չի եղել, որքան հիմա, իսկ Սարգսյանների ընտանիքի հետ ունեցած իմ կապը, ինձ համար սրբություն է: ս չեմ կարող ինձ թույլ տալ քաղաքական դիվիդենտներ սպասել այդ հարաբերություններից, Վազգեն Սարգսյանն իմ մարտական ընկերն էր: Արամ Զավենիչը իմ ընկերն է, իմ կողքին կկանգնի անպայան, եթե իր ժամանակը ների՝ կողքիս կլինի նաև նախընտրական հանդիպումների ժամանակ»: