Ձեր վստահելի աղբյուրը

Նախընտրական այս շրջանում թեև հասարակությանը դեռ հստակ չեն ներկայացվել խորհրդարանական ընտրությունների մասնակցության հայտ ներկայացրած կուսակցությունների վերջնական ցուցակները, բայց և այնպես որոշակի անուններ արդեն հնչել են: Մասնավորապես` հաջորդ Ազգային Ժողովում հավանաբար շատ կլինեն լրագրող-պատգամավորներ:

«Շատ դրական եմ վերաբերում այն հանգամանքին, որ օրենսդիրում լրագրողներ ներկայացված կլինեն, որովհետև որքան, որ  ուրախացնում է լրագրողների մուտքը Ազգային Ժողով, այնքան իրատեսական է դառնում գործարարների առջև մուտքը փակելը. Լրագրողները բիզնեսմեններ չեն, նրանք որևէ անձնական շահ չունեն խորհրդարան գալու համար և ճիշտ հակառակը` լրագրողը միշտ այնտեղ է, որտեղ թեժ է ու պայքարում է ազատ խոսքի համար անվախ »,- Panorama.am-ի հետ զրույցում նշեց Ժուռնալիստների միության նախագահ Աստղիկ Գևորգյանը:

Ամենակարևորը թվարկածի մեջ տիկին Գևորգյանն առանձնացրեց այն հանգամանքը, որ վերջապես Ազգային Ժողովի ամբիոնից կհնչի մաքուր մայրենի լեզու և դա իր դրական ազդեցությունը կունենա` մյուսները այսպես թե այնպես անհարմար կզգան իրենց ու կփորձեն գոնե հնարավորինս մայրենին առանց աղավաղելու ներկայացնել:

Ինչ վերաբերում է կոնկրետ անուններին, որոնք շրջանառվում են մամուլում, ապա.
«Եթե դա իսկապես այնպես է, ինչպես ներկայացնում են լրատվամիջոցները ու հենց այդ լրագրողները լինեն ապագա օրենսդիրում, ապա դա միմիայն ողջունելի է` բոլորը մարդիկ են, որոնց ձեռագիրը ծանոթ է հանրությանը, նրանք ճանաչված են ու նրանք հաստատ այն մարդիկ չեն, որ գնալու են խորհրդարան իրենց ցույց տալու համար միայն»,- նշեց Ժուռնալիստների միության նախագահը:

Ավելին` նա մեծ ակնկալիքներ ունի լրագրողների խորհրդարան մուտքից, քանի որ այդպես հնարավոր կլինի ստեղծել ինչ-որ «գիլդիյա», որոնք տոն կտան անկաշառ, անողոք ու սկզբունքային վեճերին ու մոտեցումներին:

Արդյո՞ք մտավախություն չունի, որ լրագրողները, հատկապես նրանք, որ համամասնական ցուցակներում ընդգրկված լինելու հաշվին կգան խորհրդարան, այդպիսով կկորցնեն իրենց ձեռագիրը` ի վերջո ամեն ուժ սեփական գաղափարախոսությունն է պարտադրում.

«Վստահ եմ, որ նման բան չի կարող լինել: Ես ինքս կուսակցական չեմ, բայց ՀՀԿ-ի ցուցակով, գիտեք, Երևանի ավագանիում եմ ներկայացված, բայց դա էլ բնավ չի նշանակում, որ եթե կուսակցությունը մի բան ասում ու ուզում է ուրեմն… »,- եղավ պատասխանը:

Գերխնդիրը նա է, որ բոլորս գիտակցենք երկրի գերակա շահը, նաև կուսակցականները և քանի դա չկա, առաջ չենք գնա: Բայց լրագրողները, վստահություն հայտնեց տիկին Գևորգյանը, դա շատ լավ գիտակվում են:

Հիշեցնենք, ըստ մամուլի հրապարակումների ԲՀԿ նախընտրական ցուցակում, օրինակ, ընդգրկվելու է «Կենտրոն» հեռուստաընկերության մեկնաբան Պետրոս Ղազարյանը, «Ժամ» կայքի Երվանդ Բոզոյանը, ՀՀԿ ցուցակում ` «Սլաք» կայքի տնօրեն Մենուա Հարությունյանը, «168 ժամ» թերթի խմբագիր Սաթիկ Սեյրանյանը, «Արմենպրես» գործակալության տնօրեն Արամ Անանյանը, Հանրային հեռուստաընկերության լրատվական հաղորդումների խմբագիր Սամվել Ֆարմանյանը և այլոք: