Ձեր վստահելի աղբյուրը

«Կես ժամից կգամ», -այս խոսքով Երևանի ոստիկանապետ Ներսես Նազարյանը Ռոբերտ Մելքոնյանի ու մի խումբ ոստիկանների հետ լքեց Մաշտոցի այգին, որտեղ այս պահին էլ շարունակվում է բնապահպաների, սովորական քաղաքացիների, պատգամավորների ու քաղաքական գործիչների մասնակցությամբ այգու տարածքում իրականացվող շինարարության դեմ ակցիան:

Հիշեցնենք, որ Նազարյանը հեռացավ պատգամավորներ Ստյոպա Սաֆարյանի, Զարուհի Փոստանջյանի, «Կանաչների միության» նախագահ Արմենակ Դովլաթյանի, ՄԻՊ ներկայացուցչի ու այլոց հետ առանձին խորհրդակցությունից հետո:
Փոստանջյանը հետո լրագրողներին հայտնեց, որ Ներսես Նազարյանը այստեղ վերադառնալու է քաղաքապետ Տարոն Մարգարյանի ու ոստիկանապետ Վլադիմիր Գասպարյանի հետ խորհրդակցությունից հետո: Զ. Փոստանջյանը ու նաև մի քանի ակտիվիստները պնդեցին, որ քաղաքապետարանի իրավաբանական վարչության պետ Զավեն Առաքելյանի ներկայացրած իրավական հիմքերն ապօրինի են:

Ինչ վերաբերում է Առաքելյանի խորհրդին, թե դատարան դիմեք, ապա Զ. Փոստանջյանը արձագանքեց. «Մենք շատ տեղեր կարող ենք դիմել, դատարանի տեղն էլ գիտենք, դատարան դիմելու կարգն էլ գիտենք»: Նրա խոսքով, իրենք դատարան դիմելու են, եթե ոստիկանությունը իրենց` հանցագործության վերաբերյալ տված հաղորդմանը ընթացք չտա: Փոստանջյանը նշեց, որ կարող են դատի տալ Հանրապետական կուսակցության ներկայացուցիչ Տարոն Մարգարյանին, «ով թույլ է տվել այս շինարարության իրականացումը»: Պատգամավորի խոսքով, տեղի ունեցածի մասին ինքը հաղորդում է ներկայացնելու Եվրոպայի ժողովրդավարական կուսակցությանը, որի անդամ է ՀՀԿ-ն: Փոստանջյանը խոստացավ նաև դատի տալ ոստիկանապետին:

Իսկ մինչ այդ, ինչպես արդեն հայտնել ենք, այգու տարածքում իրավիճակը խիստ լարված էր: Նախ ոստիկաները մի քանի մետրանոց պատ կազմած արգելում էին հավաքվածներին մտնել տաղավարի տարածք, որտեղ այս պահին էլ երեք բանվորներ շինարարական աշխատանքներ են իրականացնում: Տեղ-տեղ ոստիկանների հետ ընդհարումներ եղան, այս ամենն ուղեկցվում է պիկետի մասնակիցների բացականչություններով, հայրենասիրական երգերով, ամոթ-ամոթ և այլ բացականչություններով:
Քիչ անց այգի ժամանեց նաև «Սահակյանշին» ընկերությանը պատկանող մեքենան: Ակտիվիստները միանգամից վազեցին դեպի այն ու փակեցին ճանապարհը: Մեքենան կանգնեց:

Արդեն Երևանի ոստիկանապետի ու քաղաքապետարանի ներկայացուցիչների ներկայությամբ Փոստանջյանը բացատրեց, որ ծառերը բանտարկված են, մինչդեռ օրենքով սահմանվում է, որ շինությունը պետք է ծառերից գտնվի 5 մ հեռավորության վրա: Ի պատասխան Զ. Առաքելյանը հայտարարեց, որ 1հա 981 քմ գրանցված է «Կենտրոն» ՓԲԸ-ի կառուցապատման իրավունքով, իսկ դա նշանակում է, որ տվյալ ընկերությունը կարող է իրականացնել կառուցապատում քաղաքաշինական նորմերի համապատասխան: Նա պատգամավորին հանձնեց նախագիծ ու հայտարարեց, որ «բոլոր քաղաքաշինական նորմերը պահպանված են»: «Ես հիմա իմ աչքերով տեսնում եմ, որ շինության մեջ ծառ կա»,-ի պատասխան հայտարարեց Փոստանջյանը:

Առաքելյանը շարունակեց, որ 2011-ի դեկտեմբերի 13-ին ճարտարապետաշինական նախագիծ է հաստատվել, որտեղ ասված է, որ այստեղ պետք է կատարվի տաղավարների արդիականացման, նորերի տեղադրման, կանաչ տարածքների վերականգնման աշխատանքներ: Սրա հիման վրա էլ մշակվել է ոչ հիմնական շինությունների տեղադրման նախագիծ, էլի օրենսդրության սահմանված կարգով, և դեկտեմբերի 15-ին էլ ընկերությանը տրամադրվել է դրանց տեղադրման իրավունք:

Սրան ի պատասխան, մասնակիցները դժգոհեցին, թե այստեղ ոչ հիմնական կառույցների մասին չէ խոսքը, բետոնապատում է տեղի ունենում: Զ. Փոստանջյանն էլ նկատեց, թե հիմնական նախագիծը չի համընկնում կադաստրի տրամադրած վկայականի հետ:
«Եթե կլինեն որոշակի շեղումներ, ապա մենք տեր կկանգնենք, մենք դա ասել ենք»,-ասաց Առաքելյանը, նշելով, որ գոտիավորման նախագծով ընթացող շինարարության ծավալը նախատեսված է:

«Հարգելի Զավեն, հաջորդ հարցը: Շրջակա միջավայրի փոփոխության վերաբերյալ փորձաքննություն եղել է, թե ոչ: Ունեք նման փաստաթուղթ, հանրային լսումներ եղե՞լ են»,-Փոստանջյանի այս հարցին ի պատասխան Առաքելյանը հստակ պատասխան չտվեց: «Այո կամ ոչ պատասխանեք: Ձեր երեխային, որ բերեք այս այգի, շրջակա միջավայրը չի՞ փոխվել, ձեր երեխան ձեզ նույն հարցն է տալու, ինչ իմ երեխան»,-բղավեց Փոստանջյանը:

«Թրանսփերենսի ինթերնեյշնլ» կազմակերպության հայաստանյան գրասենյակի ղեկավար Սոնա Այվազյանն էլ վրա բերեց, թե քաղաքապետարանում իրենց բացատրել են, որ տաղավարները ոչ հիմնական կառույցներ են, սակայն ոչ մի տեղ գրված չէ, որ դրանք պետք է կառուցվեն արտոնյալ պայմաններով:

Ներսես Նազարյանը խորհուրդ տվեց, որ ցիվիլ լինեն, որ իրենք այստեղ են, որպեսզի ակցիայի մասնակիցները ուժ չկիրառեն բանվորների վրա: «Բայց մենք ուժ չենք կիրառում»,-ասացին  բնապահպաները: Նազարյանն էլ վրա բերեց, որ ոստիկանները ապօրինի չեն այստեղ, չեն էլ պատրաստվում «կոլցո» օպերացիա իրականացնել, ինչպես պնդում են ակտիվիստները:
«Այս ամենը տեղի է ունեցել օրենքի կոպիտ խախտումներով, մենք խնդրում ենք, անմիջապես դադարեցնել այս գործողությունը»,-Փոստանջյանի այս խոսքերից հետոո էլ Նազարյանը հեռացավ նախ` ոստիկանապետի, ապա մյուսների հետ խորհրդակցության:

Լուսանկարները` Լիլիան Գալստյանի