Ձեր վստահելի աղբյուրը

Փետրվարի 26-ին լրանում է Խոջալու (Իվանյան) բնակավայրի ազատագրման 20-ամյակը: Ամեն տարի, ադրբեջանական կողմը թեմայի շուրջ մեծ աղմուկ է բարձրացնում, ապատեղակտվություն տարածում: Ինչպես հայտնի է, դեռևս 2011 թվականի վերջին Մեքսիկայի օրենսդրական գերագույն մարմնի երկու պալատները ընդունել են «Լեռնային Ղարաբաղի շուրջ հայ-ադրբեջանական հակամարտության» վերաբերյալ բանաձևեր, որոնցից հատկապես երկրորդն աչքի է ընկնում բացահայտ հակահայկական ուղղվածությամբ: Օրեր առաջ, ԱԺ նախագահ Սամվել Նիկոյանը նամակ է հղել Մեքսիկայի խորհրդարանի երկու պալատների ղեկավարներին: Այս մասին ԱԺ նախագահը հաստատեց Panorama.am-ի հետ զրույցում:

Վերոնշյալ նամակը ներկայացնում ենք ստորև.

«Հարգելի պարոն Նարանխո, հարգելի պարոն Մորֆին: Վերջերս տեղեկացանք, որ Մեքսիկայի օրենսդրական գերագույն մարմնի երկու պալատները` Սենատը (2011 թ. նոյեմբերի 4-ին) և Պատգամավորների պալատը (2011 թ. դեկտեմբերի 5-ին), ընդունել են «Լեռնային Ղարաբաղի շուրջ հայ-ադրբեջանական հակամարտության» վերաբերյալ բանաձևեր, որոնցից հատկապես երկրորդն աչքի է ընկնում բացահայտ հակահայկական ուղղվածությամբ:

Հայկական կողմն անընդունելի է համարում, որ նման բարդ խնդրին անդրադառնալիս մեքսիկական օրենսդիրները, որոնք այլ պարագաներում բազմիցս ցուցաբերել են քննարկվող հարցերի մեջ խորապես թափանցելու, խնդրի էությունը ճիշտ ըմբռնելու ունակություն, հնարավոր են գտել բավարարվել բացառապես Մեխիկոյում Ադրբեջանի դեսպանության տրամադրած ապակողմնորոշիչ տեղեկատվությամբ, չեն փորձել նույնիսկ անկողմնակալության պատրանք ստեղծելու նպատակով հետաքրքրվել հայկական կողմի տեսակետներով և դիրքորոշումներով: Արդյունքում ծնվել են փաստաթղթեր, որոնցում զոհերի և բռնության ամբողջ պատասխանատվությունը բարդվել է հայկական կողմի վրա, իսկ ադրբեջանականը ներկայացվել որպես անմեղ զոհ:

Ցավալի է, որ բանաձևում հիշատակվում է այսպես կոչված «Խոջալուի ցեղասպանությունը», և ամբողջությամբ լռության են մատնված Սումգայիթում, Կիրովաբադում, Բաքվում և Ադրբեջանի այլ քաղաքներում 1988-91 թթ.-ին տեղի ունեցած հայերի զանգվածային կոտորածները, որոնք վայրագ օտարատյացության և էթնիկ զտման առաջին դեպքերն էին ամբողջ Արևելյան Եվրոպայում: Խոսելով ադրբեջանցի փախստականների և տեղահանված անձանց մասին` բանաձևի ուշադրությունից անհասկանալի կերպով «վրիպել» են Ադրբեջանի նախկին բնակիչներ` հարյուր հազարավոր հայ փախստականները: Կցանկանայի Ձեր ուշադրությունը հրավիրել այն հանգամանքի վրա, որ նավթի վաճառքից գերշահույթներ ստացող Ադրբեջանը հեշտությամբ կարող էր լուծել իր փախստականների ինտեգրման խնդիրը, սակայն շարունակում է գիտակցաբար պահել նրանց անմարդկային պայմաններում օտարների մոտ հակահայկական տրամադրվածություն բորբոքելու համար:

Մենք խորապես համոզված ենք, որ միջազգային բարձր հեղինակություն վայելող երկրի` Մեքսիկայի օրենսդիրները չպետք է իրենց թույլ տային դառնալ հակամարտության մեջ ներգրավված պետության տեղեկատվական պատերազմի զոհը, առավել ևս գիտակցաբար և պատրաստակամորեն դառնալ այդ պատերազմի գործիքը, կրկնել իրենց սնանկությունն ու ստահոդությունը բազմիցս ապացուցած քարոզչական կլիշեները:

Վերջապես, չեմ կարող չնշել, որ բանաձևում հակամարտության էությունն ամբողջապես հակասում է հակամարտության կարգավորմամբ զբաղվող ԵԱՀԿ Մինսկի խմբի երեք համանախագահների բազմիցս արտահայտած տեսակետներին և դիրքորոշումներին, հակառակ այն բանի, որ Մեքսիկական Միացյալ Նահանգների օրենսդիր մարմինն առնվազն խոսքով հավանություն է տալիս նրանց գործունեությանը և կոչ անում շարունակել խաղաղ կարգավորմանն ուղղված ջանքերը:

Հարգելի պարոն նախագահ, մենք, այնուամենայնիվ, շարունակում ենք համոզված մնալ, որ բարեկամական հարաբերությունները մեր երկու պետությունների միջև չեն կրի այս ամենի բացասական ազդեցությունը և կշարունակեն զարգանալ և խորանալ` ի շահ մեր ժողովուրդների:

Ընդունեք, խնդրեմ, պարոն նախագահ, հարգանքներիս հավաստիքը»: