Ձեր վստահելի աղբյուրը

Հարցազրույց ԱԺ նախկին պատգամավոր, ՀՀԿ-ական Հակոբ Հակոբյանի (Ճոյտ) հետ

-Պարոն Հակոբյան, ինչպիսի՞ն է Ձեր տրամադրությունը նախընտրական այս շրջանում:
-Նորմալ, ափսոս, որ երգ-երաժշտություն դեռ չկա, այնպես որ դեռ տրամադրությունս լավ է:

-Այսինքն` գտնում եք, որ դեռ երաժշտական հատվածին չե՞նք հասել:
-Հենց այդպես` դեռ երաժշտություն չկա ու դրա համար էլ տրամադրություններս դեռ լավ է:

-Բայց դա չի խանգարում, կարծում եմ, որ հստակ կողմնորոշված լինեք, թե ո՞ր կուսակցության շարքերում եք հանդես գալու մայիսյան ընտրություններին: Խոսակցությունները, թե ՕԵԿ-ի հետ կապ ունեք, չեն մարում…
-Ես ՀՀԿ անդամ եմ , ընտրություններին էլ մասնակցելու եմ մեծամասնական ընտրակարգով:

-Որոշ ժամանակ առաջ Զվարթնոց`ի Ձեզ պատկանող հյուրանոցային համալիրի պատին փակցված էր «Օրինաց Երկիր» կուսակցության պաստառը, բայց հիմա այն հանել եք: Ինչո՞վ է դա բացատրվում:
-ՕԵԿ-ն այն ժամանակ տեղ չուներ գրասենյակի համար, ինձ խնդրեցին, ես տարածքը տրամադրեցի…

-Վարձակալությա՞մբ:
-Ոչ, ուղղակի տրամադրել եմ տարածքը: Հետագայում, երբ ՕԵԿ-ը Էջմիածնում գրասենյակը բացեց, իրենք իրենց գրասենյակային գործողությունները սկսեցին արդեն այնտեղ իրականացնել:

-Խոսակցություններ էին պտտվում, որ ՕԵԿ-ը պատրաստվում էր Ձեզ` կուսակցությունից հեռացված Գագիկ Բաղդասարյանի փոխարեն ԱԺ տանել, այդպիսով վերջնական վերջակետ դնելով Ձեր` ՕԵԿ-ում լինել-չլինելու հարցին:
-Նման խոսակցություն ընդհանրապես չի եղել… մեր մեջ չի եղել նման խոսակցություն:

-Օրերս մամուլում հրապարակումներ եղան, թե գեներալ Մանվել Գրիգորյանը ցանկանում է իր որդուն` Էջմիածնի քաղաքապետ Կարեն Գրիգորյանին` տեսնել ոչ թե ԱԺ-ում, այլ Սյունիքի մարզպետի պաշտոնում, քանի որ մարզպետը ԱԺ պատագամավոր դառնալու հավակնություններ ունի: Իսկ Մ.Գրիգորյանն էլ Էջմիածնի քաղաքապետ դառնա: Ի՞նչ կասեք:
-Յուրաքանչյուր հայր էլ կուզենա իր որդուն մարզպետ տեսնի, երկրի նախագահ էլ տեսնի, ամեն ինչ էլ կուզենա տեսնի, նորմալ է: Բայց թե որքանով է դա իրատեսական իմ լուծվելիք խնդիրը չէ:

-Իսկ Դուք նման խոսակցություններ լսե՞լ եք:
-Ոչ, որովհետև ինձ չհետաքրքրող խոսակցություններ են դրանք: Եթե կոնկրետ մեր մարզին վերաբերվել գուցե ավելի ուշադիր կլինեի, բայց մարզից դուրս թե ինչ կլինի` հետաքրքիր չի:

-Իսկ որպես Էջմիածնի քաղաքապետ` գեներալ Գրիգորյանին տեսնելը հավանակա՞ն եք համարում:
-Ինչու` չէ, յուրաքանչյուրն էլ կարող է դառնալ քաղաքապետ` թե գեներալ Մանվելը, թե ուրիշը: Եթե ժողովուրդը քվեն կտա, թող դառնա…

-Ձեր հարաբերությունները հիմա ինչպիսի՞ն են:
-Շատ սովորական հարաբերություններ են: Մենք իրար չենք տեսնում, ցանկալի էլ չի, որ իրար տեսնենք:

-Դա սովորական հարաբերություններ եք անվանո՞ւմ:
-Այո-այո, շա~տ սովորական:

-Պարոն Հակոբյան, վերադառնալով ընտրություններին: Հավանաբար լսել եք, որ նախնական խոսակցությունների համաձայն` ՀՀԿ-ն Ձեր ընտրատարածքում պատրաստվում է սատարել Սեյրան Սարոյանին:
-Լսել եմ, բայց կրկնում եմ` առաջադրվելու եմ անկախ այն բանից, թե ով ում է սատարելու: Կարևորը, որ ինձ պաշտպանում է մեր շրջանի ժողովուրդը:

-Բայց այդ դեպքում որպես ՀՀԿ ներկայացուցիչ ե՞ք մեծամասնականով առաջադրվելու, թե..
-Որպես անհատ, ես գնալու եմ որպես անհատ, անկախ ամեն ինչից:

-Ի՞նչ եք ակնկալում, այս ընտրություններում Ձեր կուսակցությունը Ձեր կողքին, ի վերջո, կկանգնի՞:
-Չեմ կարող ասել, դա կախված է նրանից, թե ի՞նչ ձև են ինֆորմացված: Եթե նրանք ինֆորմացված են մարզպետ Ղահրամանյանի տեղեկատվությամբ, բնականաբար ՀՀԿ-ն իմ կողքին չի կանգնի, որովհետև մեր հարաբերությունները Արմավիրի մարզպետի հետ դրական չեն. ես միշտ խոսում եմ նրա կատարած անօրինական գործողությունների մասին: Իսկ եթե հարցումը պետք է ժողովրդից անեն… չնայած մարդիկ ոչ միշտ են կարողանում իրենց սրտի եղածն ասել, որովհետև ընկճված են, վախենում են ու վստահություն չունեն իշխանությունների նկատմամբ, թեկուզ իմ նկատմամբ:

-Գաղտնիք չէ, որ Հայաստանում ընտրությունները, այն էլ մեծամասնական ընտրակարգով առաջադրվելու դեպքում, մեծ ծախսերի հետ են կապված: Որքա՞ն գումար եք պատրաստվում ծախսել Դուք:
-Ինչքան օրենքով է նախատեսված, այնքան էլ պատրաստ եմ ծախսել: Օրենքից դուրս իհարկե չենք ծախսելու, որովհետև … դուք լավ էլ նշեցիք, որ եթե Հանրապետականը ուրիշ թեկնածուի սատարի, բնական է կբռնեն ու կընկնեն իմ յուրաքանչյուր ծախսած կոպեկի հետևից: Այնպես որ չեմ ծախսի:

-Ստացվում է, որ պատրաստ եք գնալ ընտրապայքարի գիտակցելով, որ դրական արդյունքի չե՞ք հասնի:
-Ոչ, այդպես չէ: Եթե ես օրենքից դուրս գումարներ ծախսեմ, այդ դեպքում դժվար կլինի: Հիշում եք` անցած անգամ ինձ նույնիսկ որպես թեկնածու չգրանցեցին, հինգ տարի առաջ խորհրդարանական ընտրություններին չեմ մասնակցել: Հիմա, կարծում եմ, այդ քաղաքական բլեֆները այլևս չեն լինի, ինձ կգրանցեն… կգնանք ընտրությունների կտեսնենք: Եվ ով էլ լինի իմ մրցակիցը` գեներալ Մանվելը, նրա որդին, թե Սեյրանը Սարոյան ես դնելու եմ իմ թեկնածությունը… հո չե՞նք թողնի մարզը միայն մեկ թեկնածուով գնա ընտրությունների, դա ճիշտ չի լինի: