Ձեր վստահելի աղբյուրը

«Արհեստական աժիոտաժը բուհեր ընդունվելու հետ կապված պետք է վերացվի: Բուհ ընդունվելը պետք է լինի շատ հեշտ, իսկ ավարտելը` շատ դժվար»,- այս մասին Արարատի մարզկենտրոն Արտաշատի Ամո Խարազյանի պետական թատրոնի շենքում հավաքվածների առջև հայտարարեց կառավարության ղեկավար, ՀՀԿ խորհրդի անդամ Տիգրան Սարգսյանը, ով ներկաների քննարկման է ներկայացրել իրենց  քաղաքական ուժի նախընտրական ծրագիրը:

 Ըստ վարչապետի, դա նշանակում, է որ հայաստանյան բուհերում պետք է ներդնել խիստ չափանիշներ, և վստահ լինել, որ եթե երիտասարդն ընդունվում է բուհ, ստանում է վկայական, ապա նա ունի համապատասխան գիտելիքներ: Վարչապետի խոսքով, այսօր, ցավոք սրտի, իրավիճակն այդպիսին չէ:

Տ.Սարգսյանը նշեց, որ կրթական համակարգում իրականացվող բարեփոխումների գործընթացի առաջին փուլում ձերբազատվել են այն բուհերից, որոնք ստեղծվել էին զուտ դիպլոմներ վաճառելու համար: «Էապես խստացվել է բուհերի գրանցման գործընթացը», -ասաց վարչապետը` նշելով, որ երկրորդ փուլում, ակրեդիտացիայի համակարգի միջոցով խստացվելու են որակի նկատմամբ վերահսկողական ֆունկցիաները:

«Դրա համար կառավարությունում ստեղծվել է մարմին, որն այսօր ղեկավարվում է կառավարության կողմից, հետո պետք է լինի անկախ կառույց: Այն պետք է հավաստիացնի, որ բուհերում օրենսդրությամբ սահմանված բոլոր չափանիշները պահպանվում են, և միայն այս դեպքում պետությունը կֆինանսավորի այդ բուհերը և պետպատվեր կիջեցնի դրանցում: Իսկ դա նշանակում է, որ չի լինելու խտրականություն մասնավոր ու պետական բուհերի նկատմամբ»,-ասաց վարչապետը:

Կրթության ոլորտի հաջորդ խնդիրը կայանում է նրանում, որ կրթությունն ու գիտությունը միավորվեն, և այդ միավորման օղակը պետք է լինի համալսարանը: Ըստ Տ.Սարգսյանի` դասախոսները պարտավոր են զբաղվել ոչ միայն դասախոսությամբ, այլև` գիտությամբ: Նա նաև կարևորեց գիտություն-կրթություն-արդյունաբերություն եռամիասնության վերականգնումը:

Հարց ու պատասխանի ժամանակ Արարատի մարզի Այգեստանի գյուղապետ Սոկրատ Հովսեփյանը դիմեց վարչապետին.

«Կրթական համակարգում խոսում եք բարեփոխումների մասին, բայց ստեղծեք այնպիսի պայմաններ, որ անկախ կուսակցական պատկանելիությունից, ցանկացած տաղանդավոր երեխա իր տեղը գտնի պետական ապարատում»:

Վարչապետը պատասխանեց` որևէ առարկություն չկա: «Մեր կուսակցությունն առաջնորդվում է այդ սկզբունքով, և այսօր կառավարությունում ունենք այդպիսի նախարարներ: Մասնավորապես դահլիճում է արդարադատության նախարարը, ով ոչ մի կուսակցության անդամ չէ, բայց տեսնելով Թովմասյանի մասնագիտական կարողություններն ու հաջողությունները ոլորտում` մենք հրավիրեցինք նրան կառավարություն: Վաչե Գաբրիելյանը ևս կուսակցական չէ, տեսնելով նրա պրոֆեսիոնալիզմը նա ևս հրավիրվեց կառավարություն: Ձեր առաջարկած սկզբունքը ամբողջությամբ ընդունելի է մեզ համար, և դրանով էլ առաջնորդվում ենք»:

Նշենք, որ Արտաշատի բնակիչների հետ հանդիպման ժամանակ վարչապետ Տիգրան Սարգսյանը ներկայացրեց գյուղատնտեսության, կրթության, առողջապահության ոլորտներում իրականացվելիք ծրագրերը: Մինչ այդ նա եղել է Վեդիում: