Ձեր վստահելի աղբյուրը

1988-ին ադրբեջանցիների կողմից իրականացրած սումգայիթյան ջարդերի տարելիցի կապակցությամբ ստեղծվելու է sumgayit.com կայք: Այստեղ կհրապարկվեն Սումգայիթի ջարդերի ժամանակ զոհվածների, անհայտ կորածների անունները, տվյալները:

Լրագրողների հետ հանդիպմանն այսօր նման հայտարարությամբ հանդես եկավ ԵՊՀ Երիտասարդ համալսարանականների միավորում կազմակերպության նախա գահ Գևորգ Մելքոնյանը:

Հիշեցնենք, որ 2010-ին գործարկվել է ՀՀ գլխավոր դատախազության ինտերնետային էջի «Սումգայիթ» բաժինը (www.genproc.am/sumgait ), որտեղ կարող եք ծանոթանալ 1980-ականների վերջերին Խորհրդային Ադրբեջանի տարածքում և 1990-ականների սկզբներին Լեռնային Ղարաբաղում հայերի նկատմամբ իրականացված ջարդերի կապակցությամբ հարուցված քրեական գործերի նյութերին: Մասնավորապես` կայքում տեղադրվել են ականատեսների, տուժողների, նրանց հարազատների եւ իրավահաջորդների վկայությունները, իրեղեն ապացույց ճանաչված լուսանկարներ ու փաստաթղթեր, սպանվածների, առևանգվածների և  անհայտ կորածների ցուցակները:

sumgayit.com կայքը լինելու է եռալեզու՝  հայերեն, անգլերեն և ռուսերեն: «Մենք պետք է ապացուցենք, որ այն կազմակերպվել է պետական մակարդակով: Սումգայիթյան ջարդերի չդատապարտումն էլ հիմք հանդիսացավ Մարաղայի և Բաքվի հայության ջարդերի համար»,- ասաց Գ.Մելքոնյանը, ապա կոչ արեց սումգայիթյան ոճրագործության ժամանակ անհետ կորած կամ զոհված մարդկանց նկարներ կամ տվյալներ ունեն, ներկայացնեն իրենց. «Սա շատ կարևոր է, որքան շատ լինեն դրանք, այնքան ավելի լայն ճանաչում կունենա»:

Նա նշեց, որ հայ ինտելեկտուալ երիտասարդների, նաև սոցցանցերի միջոցով պետք է կարողանալ համախմբվել և անել ամեն բան, որպեսզի ադրբեջանցիների կողմից իրականացված անիրավություներն ավելի ճանաչելի լինեն. «Քանի դեռ Ցեղասպանությունները չեն ընդունվել ու ճանաչվել, մենք ապահովագրված չենք Ադրբեջանի կողմից նման ցեղասպանություններից»:
Գ.Մելքոնյանը տեղեկացրեց նաև, որ վաղը ԵՊՀ-ում ցուցադրվելու է «Սովորական ցեղասպանություն» ֆիլմը:

Նշենք, որ շատերը Սումգայիթյան ոճրագործությունը Ցեղասպանություն են որակում:
«Իհարկե, այն ժամանակ խորհրդային Կրեմլը դա չէր ուզում տեսնել, Գորբաչովը սաստեց Վարդգես Պետրոսյանին, երբ նա Սումգայիթի ջարդերը կոչեց ցեղասպանություն: Բայց դա համապատասխանում է ցեղասպանության ամենասովորական սահմանմանը: Մարդկանց կոտորել են հայ լինելու համար: Ցեղասպանությունը հենց դա է»,- հայտարարել է  ԵՊՀ տեսական փիլիսոփայության և տրամաբանության ամբիոնի վարիչ, «Քաղաքական հետազոտությունների ակադեմիայի» ղեկավար, պրոֆեսոր Ալեքսանդր Մանասյանը: