Ձեր վստահելի աղբյուրը

Panorama.am-ը զրուցել է «Նուշիկյան ասոցիացիա»-ի նախագահ Գարեգին Նուշիկյանի հետ, ով ինչպես արդեն տեղեկացրել ենք, մտադիր է թիվ 10-րդ ընտրատարածքում առաջադրվել որպես պատգամավորության թեկնածու:

-Պարոն Նուշիկյան, ինչո՞ւ որոշեցիք առաջադրվել և ինչո՞ւ հենց 10-րդ ընտրատարածքում:

-Սա իմ բնակավայրն է, աստեղ եմ ապրել, ուսանել, այստեղ եմ ծավալում իմ հիմնական գործունեությունը: Սակայն միայն իմ հայրենի տարածքը լինելու հանգամանքով չէ պայմանավորբված թիվ 10 ընտրատարածքում առաջադրվելս: Կան հարցեր, մտահոգություններ, որոնք պետք է բարձրացնել, օրենքի ուժ տալ դրանց և հետևողական լինել օրինական դաշտում դրանց կյանքի կոչելուն: Կարծում, եմ ժամանակն է նաև, որ մենք քայլ անենք, չմնանք շարունակ դիտորդի կարգավիճակում ու դժգոհենք ամեն ինչից: Առաջին հերթին պետք է ինքներս մեզ հարցնենք` իսկ ի՞նչ ենք անում մենք և ի՞նչ ենք պատրաստ շտկելու: Մենք ինքներս պիտի փորձենք քայլ անել, որ հետո, ինքներս քիչ պահանջենք կամ գոնե ավելի շատ բարոյական իրավունք ունենանք պահանջելու:

-Դուք հաջողակ գործարար եք և հասարակության շրջանում հեղինակություն եք վայելում: Ձեր նշած քայլերին հասնելու և միջավայրի վրա ազդեցություն թողնելու կամ հասարակության մոտ այդ գիտակցումը տեսնելու համար Ձեր համար պատգամավոր դառնալն անհրաժե՞շտ պայման է:

-Բնականաբար փորձում ես որոշակիորեն ազդել միջավայրի վրա, բայց դա այնքանով, որքանով կարողանում ես: Կոնկրետ ԱԺ-ն ավելի մեծ հնարավորություններ է ընձեռում, ավելի լսելի լինելու, բազմաթիվ հարցերին գործնականում լուրջ մոտեցում, պետական մոտեցում ցուցաբերելու առումով: Հիմնականում դրանք բիզնես ոլորտին վերաբերող մտահոգություններ են, քանի որ մեր երկրի զարգացման հիմքում բիզնես ոլորտի զարգացումն է՝ իր տեմպերով: Ունեմ նաև կրթական ոլորտին առնչվող մտահոգություններ, ինչպես և այլ հարցեր, ուստի օրենսդիր մարմինը հենց այն կառույցն է, որը կտա հնարավորություն իմ ունեցած գիտելիքները, փորձը ծառայեցնելու հանուն այդ ամենի:

-Դուք լայն հանրության կողմից ճանաչված գործարար եք սկսած դեռ 90-ականներից: Ինչո՞ւ որոշեցիք քաղաքականությամբ զբաղվել միայն հիմա:

-Դեռ 2003-ին լուսահոգի վարչապետ Անդրանիկ Մարգարյանի կողմից ստացել եմ առաջարկ՝ ՀՀԿ համամասնական ցուցակով ԱԺ անցնելու: Ես այն ժամանակ հրաժարվեցի: Հրաժարվեցի առաջարկից այն պատճառով, որ մեր ընտանիքին պատկանող բիզնեսի զարգացումը ավելի շատ էի կարևորում: Ես այդ ժամանակ մտածում էի, որ մեկը մյուսին կխանգարի:
Ինչո՞ւ եմ հիմա ուզում դառնալ պատգամավոր: Հիմա մի պարզ ճշմարտություն եմ հասկանում, որ առաջին հերթին պետք է երկիրը զարգանա, իսկ դրա համար էլ պետք է երկրի տնտեսությունը զարգանա, մինչդեռ դրա համար էլ մենք պետք է ուշադրություն դարձնենք փոքր և միջին բիզնեսի զարգացմանը: Ի վերջո անգամ ԱՄՆ-ի պես հզոր երկրում ՀՆԱ-ի մոտ 70%-ն ապահովում են փոքր ու միջին ձեռնարկությունները, իսկ մեզ մոտ հակառակն է. մեզ մոտ խոշորներն են տալիս 60-70 տոկոսը, իսկ փոքրն ու միջինը` 30-ը: Բնականաբար, եթե այս պարագայում երկիրը զարգանա, ուրեմն կզարգանա նաև մեր ՓՄՁ-ի գործունեությունը:
Ես այսօր տեսնում եմ, որ ներկայիս ԱԺ-ն ունի պրոֆեսիոնալ ուժերի, կարող ուժերի կարիք, ես այդպես եմ տեսնում: Նկատի ունենալով իմ փորձը, շփումները 30-40 երկրների հետ, իսկ մեր կազմակերպությունը համագործակցում է շուրջ 200 ընկերությունների հետ` ուզում եմ իմ ողջ ներուժը, կապերն ու գիտելիքներն ավելի լայնածավալ ձևով ներդնել նաև մեր երկրի տնտեսական ոլորտի զարգացման գործում:

-Այսինքն այս ժամանակահատվածի ընտրությունը պայմանավորված էր միայն այն բանով, որ ներկայում ավելի կայուն հիմքերի վրա՞ է Ձեր բիզնեսը:

-Այո, մեր բիզնեսը դրված է հիմա ավելի կայուն հիմքերի վրա: Նաև ավելի պատրասըտ եմ համարում ինձ քաղաքական դաշտ մտնելու համար: Այսօր ես տեսնում եմ դրական միտումներ, որով մեր իշխանությունը պատրաստ է որոշակի դրական փոփոխությունների և ունի մարդկանց կարիք, որպեսզի միասին փոխեն ինչ որ բան:

-Տեսակետ կա, որ գործարարները մտնում են օրեսդիր մի պատճառով, որ կառրողանան անձեռնմխելիություն ձեռք բերեն՝ դրանով ապահովագրելու իրենց բիզնեսը: Ձեր պարագայում նման մոտիվացիա առկա՞ է:

-Իմ պարագայում չկա այդ մոտիվացիան առհասարակ, քանի որ մենք ավելի դժվար ժամանակներ ենք հաղթահարել, ընդ որում` առանց այդ մանդատի, առանց «կռիշայի», առանց կողմնակի ուժերի ազդեցության: Կհաղթահարենք նաև այսուհետ, այդ անձեռնմխելիությունը բացարձակ նշանակություն չունի իմ որոշման հետ, ուղղակի դրա անհրաժետությունը չկա մեր բիզնեսում: Ինքնագովասանք չլինի` մեր կազմակերպությունը այն քչերից մեկն է, որ աշխատում է լրիվ օրենքի դաշտում և այդ առումով մենք խոցելի չենք ու չկա անձեռնմխելիության կարիք:

-Ասացիք որ քաղաքական դաշտ մտնելու առաջարկ ստացել եք 2003-ին, իսկ մինչ այդ ինքներդ որևէ նախաձեռնություն չեք դրսևորե՞լ:

-Ստացել եմ առաջարկ մինչ այդ մասնակցել թաղապետի ընտրություններին, և փորձ արվել է ինձ քաղաքական դաշտ այսպես ասած ներքաշելու: Քանի որ խորհրդային տարիներին ես զբաղեցրել եմ բավականին բարձր պաշտոն, ինձ դրանից հետո պետական պաշտոնը չի գրավել, չի ձգել երբեք: Այն ժամանակն այդ առումով կարելի է ասել հագեցած էի, ամբիցիաներս բավարարել էի, դրա համար էլ չունեի նկրտումներ քաղաքական դաշտ մտնելու, պետական ծառայության անցնելու համար: Այսօրվա դրությամբ ինձ զուտ իմ մտահոգություներն են դրդել, որպեսզի ես քաղաքական դաշտ մտնելու հայտ ներկայացնեմ:

-Նկատենք, որ Ձեր անունը հիշատալկելիս հաճախ նշվում է Ձեր կապը ՀՀ գլխավոր դատախազ Աղվան Հովսեփյանի հետ, որի հետ Դուք խնամիական կապեր ունեք: Ձեր վերաբերմունքը սրան ինչպիսի՞ն է:

-Իսկ իմ վերաբերմունքն ինչպե՞ս պետք է լինի: Մենք ունենք հրաշալի թոռնիկ, այնպես որ ինչպես իմ անուն են կապում իր հետ, այնպես էլ իր անունն են կապում իմ անվան հետ: Բնական է նաև, բա ու՞մ հետ կապեն:

-Իսկ Ձեր քաղաքական քայլը համաձայնեցրե՞լ եք պարոն Հովսեփյանի հետ:

-Չասենք համաձայնեցնել, բայց նրա կարծիքը բնականաբար կարևոր է եղել ինձ համար և ոչ միայն առաջադրվելու հարցում, նաև շատ այլ հարցերում: Իհարկե, ես հարցրել եմ նրա կարծիքը, խորհրդակցել եմ, իմ մոտեցումներն եմ քննարկել:

-Գրեթե վստահաբար նշվում է, որ Աղվան Հովսեփյանի եղբայրը՝ Ռուբեն Հովսեփյանն էլ է մտադիր մեծամասնական ընտրակարգով առաջադրելու իր թեկանծությունը: Արդյոք կարելի է ասել, որ Ձեր և իր եղբոր միջոցով գլխավոր դատախազը ակտիվացնում է իր քաղաքական ներգրավվածությունը:

-Չէի ասի, որ նա քաղաքական ակտիվություն է սկսում դրսևորել: Ինչ վերաբերվում է Աղվան Հովսեփյանի եղբորը՝ Ռուբեն Հովսեփյանին, նա բավականին երկար ժամանակ է, ինչ Աջափնյակի թաղապետն է:

-Բայց դա գործադիր տեղական ինքնակառավարման մարմին է, պարոն Նուշիկյան:

-Դե այո, հիմա էլ նա փորձում է օրենսդիր տեղափոխվել: Դա էլ բնական է: Ինչ վերաբերվում է մեր քայլերը մեկը մյուսին կապելուն՝ բացարձակ տրամաբականան չեմ համարում, որովհետև ի վերջո ամեն մեկս ապրում ենք մեր կյանքով:

-Հաշվի առնելով գլխավոր դատախազի հարաբերությունները հանրապետության և ՀՀԿ առաջնորդ Սերժ Սարգսյանի հետ, հաշվի առնելով նաև այն, որ դեռևս 8 տարի առաջ առաջարկ եք ունեցել մտնել ՀՀԿ ցուցակ` կարելի՞ է ենթադրել, որ Դուք որոշակի հարաբերություն ունեք այս կուսակցության հետ և ընտրություններին կստանաք ՀՀԿ-ի աջակցությունը:

-Բավականին երկար ժամանակ` որպես գործարարների միության անդամ, սերտ համագործակցություն եմ ունեցել ՀՀ կառավարության հետ, ԱԺ մեծամասնության հետ: Ուստի բնական է, որ մեր կապը իշխող կուսակցության հետ եղել է միշտ սերտ: Բայց միշտ լավ հարաբերությունների մեջ եմ եղել նաև այլ ուժերի, անգամ ընդիմադիր կուսակցությունների լիդերների հետ:

-Խաչատուր Սուքիասյանի եղբայրը հայտարարել էր, որ չի բացառվում թիվ 10 ընտրատարածքում առաջադրվի նաև Խաչատուր Սուքիասյանը: Փաստորեն, այստեղ պայքարը գնալու է երկու գործարարների միջև: Դուք ինչպե՞ս եք պատկերացնում Ձեր ընտրապայքարը:

-Բայց Խաչատուր Սուքիասյանն անձամբ չի էլ հայտարարել, որ ինքն առաջադրվելու է: Ես շատ նորմալ եմ վերաբերվում մեր ընտրապայքարին, շատ դրական վերաբերմունք ու մեծագույն հարգանք ունեմ Սուքիասյանի և ընդհանրապես Սուքիասյանների ընտանիքի հանդեպ: Բայց ընտրությունը մնում է ընտրություն: Ինձ, իհարկե, մի քիչ դուր չի գալիս այն մոտեցումը, որ գրել էին նաև` Նուշիկյանն ընդեմ Սուքիասյանի: Ես ոչ մեկին ընդդեմ չեմ դնում, ես իր դեմ չեմ դնում, եթե ինքն էլ դնի իր թեկնածությունը, նույն հաջողությամբ ինքս էլ կարող եմ ասել, որ ինքն է իմ դեմ դնում: Համենայնդեպս` ես հիմա արդեն պաշտոնապես հայտարարում եմ իմ առաջադրվելու մասին:

-Իսկ հավանական համարու՞մ եք պարոն Սուքիասյանի առաջադրվելը, արդեն Ձեր հայտնը ներկայացնելու պարագայում:

-Ես չեմ կարող այդ հարցին պատասպանել: Չեմ ուզում ենթադրություններ անել:

-Իսկ դուք առչնվու՞մ եք, ունե՞ք հարաբերություններ Խաչատուր Սուքիասյանի հետ:

-Այո, շատ նորմալ հարաբերությունների մեջ եմ: Ասում եմ` ես բոլոր եղբայների հետ եմ շատ նորմալ հարաբերությունների մեջ, հատկապես նրանց հայրիկի հետ էի շատ լավ հարաբերությունների մեջ:

-Քաղաքականություն մտնելու թեմայով չեք խոսել Սուքիասյանի հետ:

-Չեմ խոսել, քանի որ ես իմ որոշումը կայացրել եմ մոտ 15 օր առաջ, այսինքն արտասահման մեկնելուցս առաջ: Իսկ ինքն այստեղ չի, երկրում չի, և ինքն էլ դեռ այդ մասին չի հայտարարել: Եթե ինքն իսկապես առաջադրվում է, մենք կքննարկենք այդ թեման միասին:

-Ընտրություններում` տարբեր գնահատականներով, լուրջ գործոնի վերացվել ընտրակաշառքը: Հաշվի առնելով Ձեր գործարար լինելու հանգամանքը, ինչպե՞ս եք պատկերոցնում Ձեր նախընտրական արշավն այս տեսանկյունից: Չունե՞ք մտավախություն, որ չեք կարողանա կոտրել այդ կարծրատիպը: Դժվար չի՞ լինի, եթե մարդիկ կոնկրետ ընտրակաշառքի սպասելիք ունենան:

-Ճիշտն ասած չգիտեմ, չեմ առնչվել այդ առումով: Գիտեք, մեր տնտեսական գործունեության ընթացքում մարդկանց, կազմակերպությունների համար շատ բաներ ենք արել մինչ այս: Եթե այն ժամանակ դրան չեր հաջորդում ընտրություներ, մարդիկ դա չէին համարում ընտրակաշառք, հիմա երբ դրա տակ դնում ես ընտրությունները, դա դառնում է ընտրակաշառք: Համենայնդեպս մենք շարունակելու ենք մեր բնականոն գործունեությունը:

-Իսկ եթե այնուամենայնվիվ մարդիկ կոնկրետ սպասելիք ունենա՞ն:

-Համենայն դեպս ես չեմ պատրաստվում ընտրակաշառք բաժանել; Ընտրակաշառք ինչի՞ համար բաժանեմ, որ ես ուզում եմ գնալ ԱԺ մեր ընդհանուրի շահերի համա՞ր: Ես իմ անձնական շահը անկեղծ եմ ասում, չեմ գերադասում: Ինձ ի՞նչ է տալու մեծ հաշվով ընտրակաշառքով ԱԺ մտնելը:

-Իսկ հաշվարկե՞լ եք` որպես պրոֆեսիոնալ ֆինանսիստ, ինչ է տանելու Ձեզնից քաղաքական դաշտ մտնելը, օրենսդիրում հայտնվելը: Մտավախություն չունեք, որ Ձեր բիզնեսում ինչ-որ տեղ նաև կթերանաք:

-Դե դա անպայման կլինի իմ ժամանակի, էներգիայի ու աշխատանքի հաշվին: Բայց ես չեմ պատրաստվում ընտրվել ու պասիվ գործունեություն ծավալել, զբաղվել իմ բիզնեսով: Իմ անձնական բիզնեսով կզբաղվի եղբայրս, մենք համատեղ են աշխատում: Միանշանակ ակտիվ օրեսդրական գործունեություն եմ ծավալելու, կողքից էլ խորհուրդներով կաջակցեմ եղբորս:

-Սովորաբար գործարարներն այս կամ այն կերպ նախընտրական շրջանում աջակցում են այս կամ այլ ուժի: Ձեր պարագայում նախկին նման դեպքեր եղե՞լ են:

-Այո, նախադեպեր եղել են: Թույլ տվեք չմասնավորեցնել:

-Հետաքրքիր է իմանալ, հասարակության շրջանում հայտնի անուններից ո՞ւմ հետ եք ավելի հաճախ շփվում, ովքե՞ր են Ձեր մտերիմները:

-Ասում են չէ, նմանը նմանի հետ կշփվի, ընկերություն կանի: Իմ շրջապատում շատ բազմաթիվ ու հետաքրքիր մարդիկ կան, իսկ գործարար շրջանակներից հիմնականում շփվում եմ մեր գործարարների և արդյունաբերողների միության անդամներից ոմանց հետ: Անուններ չեմ ուզում նշել:

Հարցազրույցը` Սյուզի Բադոյանի