Ձեր վստահելի աղբյուրը

faktxeber.com-ը գրում է. «Ադրբեջանի հյուսիսային Գուբա քաղաքում երեկ տեղի ունեցած աննախադեպ զանգվածային բողոքի ցույցը մասնակիցների թվով և կազմակերպվածությամբ համարվում է վերջին մի քանի տարիների ընթացքում այդ երկրում անցկացված նման ակցիաներից ամենահզորը: Տեղական իշխանությունների կամայականությունից, բնակչության թալանից, կաշառակերությունից և կոռուպցիայից, ինչպես նաև մարդկանց նկատմամբ անհարգալից և արհամարհական վերաբերմունքից գազազած ժողովուրդը հարձակվել է գործադիր իշխանության շենքի վրա, հրդեհել մի քանի սենյակները, հրդեհել գործադիրի ղեկավար Ռաուֆ Հաբիբովի առանձնատունը և սպառնացել, որ շրջանի ձերբակալված 200 ակտիվիստներին ազատ չարձակելու դեպքում կայրեն նաև պետական կառույցների շենքերը»:

Թեմայի հետ կապված` քաղաքագետ Զարդուշտ Ալիզադեն faktxeber.com-ի հետ զրույցում ասել է, «Գուբայի շրջանի գործադիր իշխանության անդամներն իրենց պաշտոններին արժանի մարդիկ չեն և այդ պաշտոններում նշանակվել են այս կամ այն օլիգարխի ծանոթ-բարեկամը լինելու համար, որոնք զբաղված են քաղաքի և շրջանի բարեկարկգման և զարգացման համար հատկացված գումարների թալանով և հարստացմամբ: Ադրբեջանում բոլոր շրջաններում էլ պաշտոնները բաժանվում են նման «առանձնահատկությունների» համար: Այդ պատճառով էլ ցանկացած պահի հնարավոր է նման բողոքի ակցիաներ անցկացվեն նաև Ադրբեջանի մյուս շրջաններում: Բոլորը գիտեն, որ Գուբայի գործադիր իշխանության ղեկավար Ռաուֆ Հաբիբովը Ադրբեջանի տրանսպորտի նախարար Զիա Մեմմեդովի մերձավորներից է: Այդ ակցիան կազմակերպվել է Զիա Մեմմեդովին հարվածելու և խայտառակելու համար: Իշխանությունը դրանով ազդանշան է տալիս բոլոր նրանց, ովքեր մտադիր են մրցակից լինել` առաջիկա նախագահական ընտրություններում: Մյուս կողմից, այդ ակցիաները ցույց են տալիս, որ Հեյդար Ալիևի ժամանակ աներեր և անխորտակելի երևացող իշխանությունը Իլհամ Ալիևի անհաջող կադրային քաղաքականության արդյունքում խորտակման եզրին է: Ժողովրդի մեջ այնպիսի տպավորություն է ստեղծվում, որ վերևից նշանակված ցանկացած մարդու կարելի է հեռացնել` ճնշումներով հրաժարական տալու և միտինգի միջոցով: 1989 թ-ին Ժողովրդական ճակատը Ադրբեջանի կոմկուսի առաջին քարտուղարին տապալեց Հեյդար Ալիևի հանձնարարությամբ: Այն ժամանակ այդ գործընթացներն սկսվեցին հենց շրջաններից: Այդ մարտավարությունը կարող է գործի դրվել նաև ներկայիս իշխանության համար: Նման գործընթացների վերջը կարող է մխիթարական չլինել վերին ատյաններում նստած մարդկանց համար», -ասել է քաղաքագետը:

Զարդուշտ Ալիզադեն չի բացառել նաև, քանի որ Գուբայում ամենաշատ հողատարածքները պատկանում են լեռնցի հրեաներին, հնարավոր է` բողոքի զանգվածային ակցիան կազմակերպվել է հրեական սփյուռքի կողմից:

«Չի բացառվում, որ տեղի ունեցող զանգվածային ակցիաները կյանքի են կոչվում հրեական սփյուռքի կողմից: Ընդհանուր առմամբ` վերջին շրջանում միանգամայն պարզ և հստակ կերպով է զգացվում է հրեաների, հատկապես Իսրայելի` Ադրբեջանի ներքին քաղաքականության վրա ազդեցությունը»,- ընդգծել է նա: