Ռուբեն Հայրապետյան. «Մոռացեք մելքոնյաններին և պաչաջյաններին»
Հայաստանի ֆուտբոլի ֆեդերացիայի նախագահ Ռուբեն Հայրապետյանն այսօր ֆեդերացիայի շտաբ բնակարանում մամուլի ասուլիս էր հրավիրել` պատասխանելու համար լրագրողների հարցերին: Վերջին օրերին մեծ աղմուկ բարձրացրած ֆեյսբուքյան քննարկումների վերջաբանն այն եղավ, որ Ռուբեն Հայրապետյանը հայտարարեց իր էջի փակվելու մասին: Նա խոսեց նաև Սերբիայի ու Կանադայի ընտրանիների հետ կայացած ընկերական հանդիպումների մասին: Հիշեցնենք, որ մեր հավաքականը նախ երիտասարդական կազմով 0:2 հաշվով պարտվեց սերբերին, այնուհետև 3:1 հաշվով կարևոր հաղթանակ տոնեց Կանադայի ընտրանու նկատմամբ:
«Ընկերական հանդիպումների ողջ իմաստը նրանում է, որ մարզիչները հնարավորություն ունենան` փորձարկելու մեծ թվով նորեկների: Ես ավելի շատ ուրախ եմ Սերբիայի հավաքականի հետ խաղի համար, քանի որ դա շատ ուժեղ թիմ են: Այդ խաղում մեր ընտրանու կազմում անփորձ ֆուտբոլիստներ հանդես եկան: Հրավիրվել էր նաև Իրանի բարձրագույն խմբում հանդես եկող դարպասապահ Գրիգոր Մելիքսեթյանը, ով 3 տարվա ընդմիջումից հետո Հայաստանի հավաքականի կազմում դուրս եկավ խաղադաշտ: Ֆեյսբուքում այս առիթով ես իմ կարծիքն եմ հայտնել: Տարիներ առաջ ինձ մեղադրում էին այն բանի համար, որ հավաքականը վատ է հանդես գալիս: Հիմա ես եմ պատասխանատու լավ խաղի ու լավ ֆուտբոլիստների համար: Ինչո՞ւ չպետք է պատասխանեմ վատ խաղացողների համար: Ճիշտ է` մարզիչն է որոշում, թե որ ֆուտբոլիստը պետք է հանդես գա, մարզիչն է ընտրում մարտավարությունն ու խաղաոճը, իսկ իմ գործն այն է, որ հեռու պահեմ այն ֆուտբոլիստներին, ովքեր չեն համապատասխանում հավաքականին ու նրա լավ մթնոլորտին: Եվ խոսքը միայն Գրիգոր Մելիքսեթյանը մասին չէ:
Ֆեյսբուքում յուրաքանչյուր ոք կարող է ինձ հարց ուցղել: Հարցրել են, ես էլ գրել եմ իմ կարծիքը: Այլ հարց է, որ որոշ լրագրողներ իրենց հոդվածներով փորձել են նսեմացնել հավաքականի մարզչի կատարած փայլուն աշխատանքը: Ես այդ գրողին շատ լավ գիտեմ: Անգամ գիտեմ, թե ում պատվերն է կատարում: Եթե մարզչին դուր գա Մելիքսեթյանի խաղը, ապա ես ինձ թույլ չեմ տա արգելել նրա մուտքը հավաքական:
Գեղեցիկ չէ, երբ մարդիկ, ովքեր նույնիսկ իրենց ընտանիքը չեն կարողանում կառավարել, մտնում են մի ընտանիք, որտեղ ընդգրկված են տասնյակ ֆուտբոլիստներ: Մեր ընտրանին շատ լավ ու համերաշխ կոլեկտիվ է: 20 տարի ֆուտբոլի մեջ եմ, երբևէ նման համերաշխ կոլեկտիվ չեմ տեսել: Որևէ մեկին թույլ չեմ տա քիթը խոթել իմ աշխատանքի մեջ, որը, ըստ իս, ես լավ եմ կատարում:
Չեմ թաքցնի, Սերբիայի հավաքականի հետ խաղից հետո ես դժգոհ էի Էդգար Մալլաքյանից, Գագիկ Դաղբաշյանից, Հովհաննես Համբարձումյանից և Վալտեր Պողոսյանից: Առաջին 3-ը գոնե պայքարել են, և նրանց մոտ ինչ-որ բան չստացվեց, Վալտեր Պողոսյանի մասին անգամ չգիտեմ` ինչ ասեմ: Նա պարզապես խուսափում էր պայքարից: Գուցե դուք չեք նկատել, բայց ես ամեն ինչ տեսնում էի: Նա 4 անգամ գնդակ ստանալու պահին ոտքերը փախցրեց: Նրա տարիքի տղաները սահման են պաշտպանում, իսկ նա Կիպրոսում ֆուտբոլ է խաղում և զինանշանը կրելով` ոտքերն է փախցնում:
Էդգար Մանուչարյանին 6 տարեկանից իմ երեխայի նման պահել եմ: Ոչ ոք չգիտի, թե ինչեր եմ արել նրա համար: Ներքին բաներ կան, որ ես չեմ կարող հրապարակել, քանի որ այդ տարբերակով ավելի շատ կվնասեմ ֆուտբոլիստներին: Սակայն չեմ կարող անտարբեր լինել 25 տարեկան տղայի նկատմամբ, ով գնում է կործանման: Մանուչարյանը ներկայումս Ամստերդամում բուժվում է, իսկ ինձ մեղադրում են նրա հարցում և սուտ լուրեր տարածում:
Ինչ վերաբերվում է Մելիքսեթյանին, ապա նա միակ խաղացողը չէ, որ խաղադաշտում սխալվել է, սակայն ֆուտբոլիստներին պետք է հետևել նաև պարապմունքների ընթացքում: Ո՞վ ասաց, որ ինձանից շատ դարպասապահի խնդրի մասին մտածող կա: Ամեն օր ես մտածում եմ 2-րդ դարպասապահի մասին: Անգամ գիշերն եմ մտածում, թե ինչպես լուծել այդ հարցը: Բոլոր մարզիչներին հանձնարարվել է հատուկ ուշադրություն դարձնել դարպասապահների նախապատրաստվածությանը: Բոյով ու գեղեցիկ Մելիքսեթյանին բերենք ու ասենք` նայենք, թե ինչ բոյ ունի, խնդրի լուծում չէ: Կասիլյասին ու Վալդեսին նայեք. հասակ չունեն, բայց տեսնում եք, թե ինչպես են խաղում:
Ինչ վերաբերում է ընկերական մյուս` Կանադայի ընտրանու հետ հանդիպմանը, արդեն հիմնական կազմի ֆուտբոլիստներն էին հայտավորված: Ասում էի, որ Օզբիլիսը խաղալու է, բայց, երևի, ոչ ոք չէր հավատում: Նա խաղաց և աչքի ընկավ փայլուն խաղով: Կանադայի ընտրանու հետ խաղը վարկանշային էր: Մենք էինք ցանկացել մեկ օր առաջ խաղալ Սերբիայի հավաքականի հետ: Ինչպես արդեն նշեցի, նպատակը երիտասարդ ֆուտբոլիստներին փորձարկելն էր: Սակայն մեր երկրպագուներին ոչ մի կերպ չի հաջողվում համոզել, որ հանգիստ վերաբերվեն ընկերական հանդիպումներին: Նրանք այլ կերպ են ընկալում, մտածում են, որ մենք անպայման պետք է ապահովեինք հաղթանակը: Արդեն հաստատված է մայիսին Հունաստանի հավաքականի հետ ստուգողական հանդիպումը: Մարզիչը որոշել է մայիսին 15-օրյա հավաք անցկացնել: Այդ ընթացքում կփորձենք ևս մեկ ընկերական խաղ կազմակերպել Հայաստանում: Օգոստոսին էլ Բելառուսի ընտրանու հետ խաղալու ենք Երևանում: Ցանկանում ենք մինչև բելոռուսների հետ խաղը պատրաստել «Հրազդան» մարզադաշտի խոտածածկը:
Հարցին, թե ինչ աշխատանքներ են կատարվելու «Հրազդան» մարզադաշտում, որտեղ պլանավորված է անցկացնել Իտալիայի հավաքականի հետ հանդիպումը, ՀՖՖ նախագահը պատասխանեց, որ կփոխվի խոտածածկը, կվերանորոգվեն հանդերձարանները, և լուսավորությունը կհամապատասխանեցվի միջազգային չափանիշներին: Ռուբեն Հայրապետյանը տեղեկացրեց, որ, ամենայն հավանականությամբ, ապրիլ ամսին մեր հավաքականին կտեսնենք «Ադիդաս» մարզահագուստով: Նա նաև նշեց, որ մտավախություններ ունի այդ առումով, քանզի այդ ֆիրման խոստացել էր մարզահագուստ տրամադրել արդեն փետրվարյան հանդիպումների համար:
Անդրադառնալով Հայաստանի ներքին առաջնությանը և նրա հետ կապված հարցերին` ՀՖՖ նախագահ Ռուբեն Հայրապետյանը նշեց, որ բարձրագույն խմբի առաջնությունում թիմերի քանակի ավելացումը ցանկալի չի համարում:
«Ցանկալի չէ, որ բարձրագույն խմբի մասնակից թիմերի քանակն ավելանա, քանի դեռ անհրաժեշտ քանակությամբ խաղացողներ չունենք: 2-3 տարի հետո դա հնարավոր կլինի: Նոր մրցակարգի վերաբերյալ շուտով գործկոմի նիստ է կայանալու, որի ժամանակ կքննարկվի մրցակարգը:
Անդրադառնալով մեր թղթակցի այն հարցին, թե ինչպես ընդունեց Ռոման Բերեզովսկու` Մոսկվայի «Դինամո» տեղափոխվելու մասին լուրը, Ռուբեն Հայրապետյանն ընդգծեց, որ շատ ուրախ է դրա համար և Բերեզովսկուն դասում է Եվրոպայի 10 լավագույն դարպասապահների շարքին:
«Անկեղծ ասած` վատ էի զգում, որ նա հանդես է գալիս «Խիմկիում»,- ասաց Ռուբեն Հայրապետյանը:- Անչափ ուրախ եմ, որ նա տեղափոխվեց «Դինամո»: Բերեզովսկին բարձրակարգ դարպասապահ է, լավ մարդ, շատ լավ անձնավորություն: Եվրոպայում նրա նման բարձրակարգ 10 դարպասապահ հազիվ թե լինի»:
Գրիգոր Մելիքսեթյանին, անկախ նրա հետ կապված վերջին որոշումներից, 3 տարվա ընդմիջումից հետո հնարավորություն տրվեց` հանդես գալու Հայաստանի հավաքականի կազմում: Իսկ հնարավո՞ր է, որ Սամվել Մելքոնյանին և Արարատ Առաքելյանին նույնպես նման շանս տրվի:
«Խնդրում եմ, սիրողական մակարդակով պետք չէ նայել հավաքականին: Պարզապես վստահեք մեզ: Եթե Մելքոնյանը նման լինի ֆուտբոլիստի, մենք նրան կհրավիրենք: սակայն դա այդպես չէ: Նա խայտառակ վատ ֆուտբոլիստ է, վատ մարդ: Պետք չէ ասածներիս համար կրկին քննադատել ինձ: Ես իրավացի եմ: Սամվել Մելքոնյանն այն մարդն է, ով ավագին ասում է. «Էսքան եմ կարում, էսքան եմ խաղում, արի դու իմ տեղը վազի»: Ինչպե՞ս կարող ենք նրա նման ֆուտբոլիստին հրավիրել հավաքական: Ես միշտ ասել եմ, որ այսօրվա հավաքականում նվիրյալներ են, ովքեր երբեք խաղադաշտ դուրս չեն գալիս միայն հոնորար ստանալու համար: Մոռացեք մելքոնյաններին, առաքելյաններին ու պաչաջյաններին: Մենք կարող ենք սխալվել, բայց վատ բան, ստոր բան չենք անի:
Ռուբեն Հայրապետյանը վերջում ավելացրեց, որ Նորայր Մամեդովը ևս կմիանա հավաքականին, սակայն ֆուտբոլիստը կաշկանդվում է իր ազգանվան համար և ցանկանում է այն փոխելուց հետո միայն ժամանել ազգային թիմ: Իսկ Ապուլա Բետեի վերաբերյալ հարցին նա պատասխանեց, որ Բետեն ցանկանում է վերադառնալ Հայաստան, սակայն նման նվիրյալների կողքին դժվար թե տեղ գտնվի նրա համար: «Շատ ավելի լավ տարբերակ է Մելիքսեթյանը, ով միայն փողի համար չի հավաքական գալիս»:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
