Ձեր վստահելի աղբյուրը

Աշխատանքային այցով Բելգիայում գտնվող ՀՀ նախագահ Սերժ Սարգսյանը մարտի 5-ի երեկոյան հանդիպել է այդ երկրի հայ համայնքի ներկայացուցիչների հետ: Ինչպես հայտնում է Panorama.am-ի թղթակիցը, հանդիպմանը մասնակցել են Բելգիայում ՀՀ արտակարգ և լիազոր դեսպան Ավետ Ադոնցը, բելգիահայ բազմաթիվ կազմակերպությունների ներկայացուցիչներ, ինչպես նաև ՀՀ նախագահի գլխավորած պատվիրակության անդամներ:

Հանդիպումը մեկնարկեց նախագահի ներածական խոսքով, որի ընթացքում Սերժ Սարգսյանը խոսել է Հայաստանի՝ Բելգիայի, Եվրոպական Միության և Հյուսիսատլանտյան Դաշինքի հետ ունեցած հարաբերությունների մասին, ինչպես նաև սփյուռքահայությանը հուզող խնդիրների և Հայաստանի արտաքին և ներքին օրակարգի մի շարք խնդիրների մասին:
Նախագահը նշեց, որ վերջին շրջանում Հայաստանը մեծ առաջընթաց է գրանցել ԵՄ հետ հարաբերությունների հարցում, և այսօր բանակցում է մի կողմից Ասոցացման համաձայնագրի, իսկ մյուս կողմից՝ Խորը և համապարփակ առևտրի համաձայնագրի ու մուտքի արտոնագրերի տրամադրման գործընթացը դյուրացնելու շուրջ:

Նախագահը նշել է, որ այս և մյուս ոլորտներում Հայաստանի խնդիրների լուծմանը նպաստելու առումով ակնկալում է նաև Սփյուռքի հայրենակիցների աջակցությունը: Նրա խոսքով, Սփյուռքը Հայաստաի համար անփոխարինելի ուժ է, որի միասնության դեպքում մեծ արդյունքների կարելի է հասնել: Սերժ Սարգսյանն ընդգծել է, որ յուրաքանչյուր երկրում հայկական համայնքը կամուրջ է տվյալ երկրի և հայրենիքի միջև, և ինքը ցանկանում է, որ այդ կամուրջը լինի ամուր և անսասան:

Հանդիպման մյուս հատվածում բելգիահայերը հարցերով դիմել են նախագահին ու ամենաբարձր մակարդակով պատասխաններ և պարզաբանումներ լսել իրենց հուզող խնդիրների շուրջ:Ինչպես և հայկական այլ գաղութներում, Բելգիայում ևս հայերը մտահոգված են տարածաշրջանային խնդիրներով. հայ-թուրքական հարաբերություններ, ղարաբաղյան հիմնախնդիր:
Պատասխանելով այս թեմաների շուրջ բարձրացված հարցերին ու մտահոգություններին՝ նախագահ Սերժ Սարգսյանը հայտնել է, որ Թուրքիայի հետ հարաբերություններում առաջընթաց չկա և գործընթացը տակավին կանգնած է, ինչպես նաև անդրադարձել է ղարաբաղյան կարգավորման բանակցությունների ընթացքին: Այս առումով բելգիահայերը հատկապես անհանգստություն են հայտնել Ադրբեջանի աճող լոբբիստական գործունեության վերաբերյալ, ինչի վերաբերյալ նախագահը հորդորել է լինել միասնական և հակազդել դրան՝ ներկայացնելով ճշմարտությունը: Նրա խոսքով, հայերը հակազդեցության ռեսուրսը պետք է փնտրեն ոչ թե դրսում այլ ներսում՝ համայնքներում և երկրի մեջ:

Այս առումով լրացուցիչ ռեսուրս են Հայաստանում գալիք ընտրությունները, որոնց՝ միջազգային չափանիշների անցկացման պարագայում կարելի է որակական առաջընթաց ունենալ երկրի հեղինակության ամրապնդման հարցում: Այս դիտարկումը հանդիպման ընթացքում կասկածի տակ չառնվեց և բելգիահայերը հետարքրություն ցուցաբերեցին նաև Հայաստանի ներքաղաքական զարգացումների վերաբերյալ, ինչի առթիվ նախագահ Սերժ Սարգսյանը հայտնեց, որ նպատակ կա հայաստանում ազատ և արդար ընտրություններ անցկացնել, ինչի նախադրյալները կան, քանի որ մի կողմից մշակված է միջազգային չափորոշիչներին համապատասխան Ընտրական օրենսգիքր, իսկ մյուս կողմից՝ որակյալ ընտրություններ անցկացնելու համար կազմակերպչական աշխատանքներ են իրականացվել ու իրականացվում:

Հայկական համայնքին բազմաթիվ հարցերին զուգահեռ հետաքրքրում էր նաև հայրենիքի հետ կապերի ամրապնդումը, ինչի կապակցությամբ նախագահը հիշեցրեց Սփյուռքի նախարարության կողմից իրականացվող ծրագրերի մասին՝ ընդգծելով, որ պետական այդ կառույցը դեռևս նոր է և կայացման փուլում, ուստի գործունեությունն առաջիկայում դեռ կկատարելագործվի:

Իսկ այն հարցին, թե աջակցություն ասելով Հայաստանում Սփյուռքից հատկապես ինչ են ակնկալում, նախագահ Սերժ Սարգսյանը պատասխանեց, որ գլխավորը համայնքային ակտիվ կյանքն է, քանի որ ակտիվությամբ արդեն յուրաքանյուր երկրում ապրող հայը ճանաչելի է դարձնում նաև իր պատմական հայրենիքն ու այդկերպ դյուրացնում երկրի ընկալելիությունն օտար հասարակության ու պետության աչքերում: