Ձեր վստահելի աղբյուրը

Մարտի 6-ին Բրյուսելում ՀՀ նախագահ Սերժ Սարգսյանը հանդիպումներ ունեցավ ԵՄ խորհրդի նախագահ Հերման վան Ռոմպոյի և Եվրահանձնաժողովի նախագահ Ժոզե Մանուել Բարոզուի հետ: Հանդիպումների ավարտին հետևեցին ճեպազրույցներ մամուլի ներկայացուցիչների հետ, որոնց ընթացքում ներկայացվեց քննարկված հարցերի շրջանակը: Դրանց զգալի մասը վերաբերում էր երկկողմ օրակարգի մի շարք հարցերում արդեն իսկ արձանագրված առաջխաղացմանը, իսկ մյուսը` հետագա անելիքներին:

Առաջընթաց Ասոցացիայի, առևտրի և մուտքի արտոնագրերի ոլորտներում

Կողմերի մատուցմամբ Հայաստան-Եվրամիություն երկկողմ հարաբերություններն այսօր վերընթաց զարգացում են ապրում, ինչի վկայությունը վերջին մի քանի ամիսներին նկատելի առաջընթացի արձանագրումն է Ասոցացման համաձայնագրի բանակցություններում, ինչպես նաև բանակցությունների մեկնարկի որոշումը ԵՄ երկրներ մուտքի արտոնագրի դյուրացման Խորը և համապարփակ ազատ առևտրի գոտու համաձայնագրի շուրջ:

Հանրապետության ղեկավար Սերժ Սարգսյանը Ասոցացման համաձայնագրի բանակցությունների մասին խոսելով Ժոզե Մանուել Բարոզուի հետ` մասնավորապես նշեց. «Այն նոր մակարդակը կբարձրացնի մեր իրավապայմանագրային հարաբերությունները և սերտ համագործակցության ուղենիշներ կսահմանի անվտանգության քաղաքականության, ժողովրդավարության, տնտեսական ինտեգրման, մարդու իրավունքների, էներգետիկայի և այլ բնագավառներում»:

Հաջորդ կարևոր քայլն, ըստ նախագահի, փետրվարի 27-ին Երևանում մեկնարկած ԵՄ երկրներ մուտքի արտոնագրերի դյուրացման համաձայնագրի շուրջ բանակցություններն են: «Ակնկալում ենք, որ հնարավորինս կարճ ժամկետներում բանակցությունները հաջողությամբ կավարտվեն, և ընդլայնված հնարավորություններ կստեղծվեն Հայաստանի ու ԵՄ քաղաքացիների միջև ամենատարբեր ոլորտներում շփումները խթանելու ուղղությամբ»,- նշեց նա:

 «Մեր փոխադարձ հաջողությունների հաջորդ հանգրվանը Խորը և համապարփակ ազատ առևտրի գոտու շուրջ բանակցությունները մեկնարկելու վերաբերյալ ԵՄ բոլոր անդամ պետությունների միաձայն որոշումն էր, ինչը վկայում է նաև այդ ուղղությամբ ՀՀ կառավարության ձեռնարկած քայլերի արդյունավետության մասին: Եվրոպական Միությունը ՀՀ ամենամեծ առևտրային գործընկերն է, և այս համաձայնագրի ստորագրումն էական ազդեցություն կունենա հետագա ինտեգրման, ներդրումների խրախուսման առումով, ինչպես նաև լուրջ խթան կհանդիսանա Հայաստանի տնտեսության հետագա զարգացման համար»,- ասաց հանրապետության ղեկավարը` անդրադառնալով երկկողմ օրակարգի հաջորդ կարևորագույն կետին:
Ի պատասխան, Ժոզե Մանուել Բարոզուն նշեց. «Մենք պատրաստ ենք սկսել Խորը և համապարփակ ազատ առևտրի գոտու համաձայնագրի շուրջ բանակցությունները, որն Ասոցացման համաձայնագրի բաղկացուցիչ մասն է, ինչի շուրջ մենք արդեն իսկ բանակցում ենք Հայաստանի հետ: Սա մեծմասամբ մեր նշած առանցքային հանձնարարականներին համապատասխանելու Հայաստանի ջանքերի արդյունքն է: Շնորհավորում եմ ձեզ այս գործընթացի առթիվ»:

Եվրահանձնաժողովի նախագահի վստահեցմամբ ևս այս համաձայնագրի շուրջ բանակցությունները շրջադարձային կլինեն երկկողմ առևտրա-տնտեսական հարաբերությունների զարգացման հարցում, և նոր հնարավորություններ կբացեն երկու կողմերում գործունեություն իրականացնող ձեռնարկությունների և քաղաքացիների համար, ու նաև կամրապնդեն երկկողմ կապերը:

ԵՄ խորհրդի նախագահի հետ հանդիպումից հետո Սերժ Սարգսյանն անդրադարձավ ու կարևորեց վերը նշված ձեռքբերումները և ընդգծեց. «Իմ գոհունակությունը հայտնեցի, որ Հայաստանին վերաբերող մասում ԵՄ դիրքորոշումը համահունչ է մեր մոտեցումներին, այն հստակ արտահայտում է մեր հարաբերություններում գրանցված առաջընթացն օրակարգային բոլոր հիմնական հարցերում»:

Ի պատասխան, Հերման վան Ռոմպոյը ողջունեց նախագահի հնչեցրած հանձնառությունն ու, իր հերթին, գոհունակություն հայտնեց գրանցված առաջընթացի վերաբերյալ:

Լեռնային Ղարաբաղ. Նախ` հիմնարար սկզբունքներ, ապա` խաղաղության համաձայնագիր

ԼՂ հիմնահարցը Հայաստան-ԵՄ օրակարգում կարևորագույն դեր ունի: Այս մասին իրենց հայտարարություններում նշեցին ինչպես Սերժ Սարգսյանը, այնպես էլ Հերման վան Ռոմպոյն ու Ժոզե Մանուել Բարոզուն: Վերջինիս խոսքով` « Հայաստանի եւ ԵՄ-ի ընդհանուր նպատակներին հասնելու համար Տարածաշրջանում խաղաղությունը և կայունությունն անհրաժեշտություն է»:

Խնդրի առնչությամբ Եվրահանձնաժողովի նախագահը նշեց, որ ՀՀ նախագահի հետ խոսել է խնդրի խաղաղ կարգավորման անհրաժեշտության մասին. «ԵՄ-ն շարունակում է սատարել ԵԱՀԿ Մինսկի խմբի ջանքերին, և մենք պատրաստ ենք Մինսկի խմբի հետ օժանդակություն ցուցաբերել վստահության ամրապնդման գործում, եթե կողմերն իրենք դա ցանկանան»: «Ես համոզված եմ, որ կողմերի մոտ ուժեղ քաղաքական կամքի առկայության դեպքում այս հակամարտությանը վերջ դնելու հնարավորություն կա»,- հայտարարեց Ժոզե Մանուել Բարոզուն ՀՀ նախագահի հետ ճեպազրույցում:

Իր հերթին Սերժ Սարգսյանը նշեց, որ քննարկումների ընթացքում Եվրահանձնաժողովի նախագահին ներկայացրել է Լեռնային Ղարաբաղի հիմնահարցի կարգավորման գործընթացի ներկա փուլը: «Հայկական կողմն այլընտրանք չի տեսնում ԵԱՀԿ ՄԽ շրջանակներում հարցի խաղաղ, բանակցային ճանապարհով լուծմանը: Անկախ Հայաստանում և ԼՂ խնդրի կարգավորման գործընթացում ներգրավված երկրներում ընթացող ընտրական գործընթացներից, հայկական կողմը հավատարիմ է մնում ԵԱՀԿ Մինսկի խմբի շրջանակներում կարգավորման գործընթացի շարունակմանը և Հիմնարար սկզբունքների շուրջ աշխատանքները ավարտելուց հետո նոր միայն խոսք կարող է գնալ «մեծ շրջանակային համաձայնագրի» շուրջ բանակցություններն սկսելու մասին»,- հայտնեց երկրի ղեկավարը: Նրա վստահեցմամբ` բանակցություններն անհամատեղելի են պատերազմի քարոզչության, ազգատյացության և աննախադեպ չափերի սպառազինությունների ձեռքբերման հետ. «Նրանք, ովքեր պատերազմ են «խաղում», պետք է արդեն վաղուց սովորած լինեին պատմության դասերը»:

«Հայաստանը մշտապես կարևորել է Լեռնային Ղարաբաղի իշխանությունների հետ ուղիղ շփումների և ԵՄ ներկայացուցիչների Ղարաբաղ պարբերական այցելությունների անհրաժեշտությունը: Մենք բազմիցս շեշտել ենք, որ Լեռնային Ղարաբաղը եվրոպական ընտանիքի մաս է, նույն արժեքների կրողն է և հետապնդում է ժողովրդավարության, մարդու իրավունքների պաշտպանության և օրենքի գերակայության վրա հիմնված հասարակարգ ձևավորելու նպատակներ»,- հավելեց հանրապետության ղեկավարը:

Հերման վան Ռոմպոյի հետ հանդիպումից հետո ևս հանրապետության ղեկավարն անդրադարձավ թեմային ու տեղեկացրեց, որ ԵՄ խորհրդի նախագահի հետ քննարկումներում նույնպես անդրադարձել է ԵՄ-ԼՂ ուղիղ շփումների անհրաժեշտությանը. «Լեռնային Ղարաբաղի հակամարտության վերաբերյալ եզրակացություններն առավել ողջունելի են, դրանք ևս մեկ անգամ վերահաստատում են այն փաստը, որ Հայաստանի և միջազգային հանրության, ներառյալ ԵՄ դիրքորոշումները համահունչ են: Մենք բազմիցս շեշտել ենք, որ ԼՂ ժողովուրդը եվրոպական ընտանիքի մաս է, նույն արժեքների կրողը: Հայաստանը մշտապես շեշտել է ԼՂ իշխանությունների հետ ուղիղ շփումների անհրաժեշտությունը»:

Վան Ռոմպոյը իր գործընկերոջ նման, իր հերթին, ևս կարևորեց հակամարտության կարգավորման գործում առաջընթացը. «Հայտնի է, որ ԵՄ-ն ցանկանում է առաջընթաց տեսնել Լեռնային Ղարաբաղի հակամարտության կարգավորման հարցում, որը շարունակում է մնալ ԵՄ արտաքին քաղաքականության առաջնահերթություններից մեկը: Առաջընթացը սկզբունքային կարևորություն ունի: Ուստի այդ կապակցությամբ, ԵՄ-ն կրկին հայտնում է իր աջակցության մասին Մադրիդյան սկզբունքներին և Հայաստանին ու Ադրբեջանին կոչ է անում ակտիվացնել իրենց ջանքերն այդ սկզբունքների համաձայնեցման ուղղությամբ, որը խաղաղության հիմք կդառնա»:

Բացի այդ, ԵՄ նախագահն անդրադարձավ նաև այս փուլում կողմերի միջև վստահությունն ամրապնդող քայլերի անհրաժեշտության խնդրին. «Շփման գծում լարվածության մեծացումը անհանգստության պատճառ է և վկայում է հրադադարի համաձայնագրի պահպանման և վստահության համապատասխան միջոցների կարևորությունը»:

Ընտրություններ. գալիք ընտրությունները բարեփոխումների լուրջ փուլ են

Բրյուսելյան հանդիպումների հաջորդ կարևորագույն թեման Հայաստանում իրականացվող ներքին բարեփոխումների հարցն էր: Իրենց հայտարարություններում և նախագահ Սարգսյանը, և Եվրահանձնաժողովի նախագահ Բարոզուն, և ԵՄ խորհրդի նախագահ վան Ռոմպոյն անդրադարձան Հայաստանի ներքին բարեփոխումների թեմային, գոհունակություն արտահայտեցին մինչև այժմ իրականացված աշխատանքների ու դրանց արդյունքների առնչությամբ, կարևորեցին դրանց շարունակականությունը` հատկապես կենտրոնանալով Հայաստանում կայանալիք ընտրությունների վրա:

Եվրահանձնաժողովի նախագահի հետ հանդիպումից հետո Սերժ Սարգսյանը հայտնեց, որ քննարկման ընթացքում անդրադարձել են Հայաստանում անցկացվելիք խորհրդարանական ընտրություններին: «Նշեցի, որ Հայաստանի իշխանությունները իրոք վճռական են 2012թ. մայիսին կայանալիք խորհրդարանական ընտրությունները կազմակերպել և անցկացնել միջազգային չափանիշներին համապատասխան: Մենք հաստատակամ ենք նոր թափ հաղորդելու մեր երկրում ընթացող համապարփակ բարեփոխումներին: Այս համատեքստում ազատ և արդար ընտրությունների անցկացումն առանցքային նշանակություն ունի»,- հանդիպման մասին պատմեց երկրի ղեկավարը:

Իսկ Ժոզե Մանուել բարոզուն հայտնեց, որ իր համար հաճելի է ՀՀ նախագահի այդ հանձնառությունը կրկին լսելը: «Հաջորդ խորհրդարանական և նախագահական ընտրությունները լուրջ փուլ են Հայաստանի բարեփոխումների ճանապարհին: Ես ուրախ եմ նախագահի այն հանձնառության առնչությամբ, որ այդ ընտրությունները կանցնեն միջազգային ժողովրդավարական չափորոշիչներին համապատասխան: Այդ հարցում Դուք կարող եք ակնկալել մեր աջակցությունը»,- նշեց նա:

Արձագանքը գրեթե նույնն էր նաև ԵՄ նախագահի դեպքում. «Ես ուրախ էի լսել, որ Դուք վերստին հաստատեցիք ձեր հանձնառությունը` անել ամեն ինչ, որպեսզի մայիսին կայանալիք խորհրդարանական ընտրությունները և հաջորդ տարի կայանալիք նախագահական ընտրությունները անցնեն միջազգային ժողովրդավարական չափորոշիչներին համապատասխան»:

Եվրոպական կառույցների ներկայացուցիչների հետ բոլոր հանդիպումներում երկուստեք նշվեց, որ Հայաստանում բարեփոխումների թեման երկկողմ օրակարգի կարևոր բաղկացուցիչն է, և լայնածավալ բարեփոխումները շարունակվելու են: Այս պարագայում Հայաստանն ավելի մեծ աջակցություն է ակնկալում եվրոպացի գործընկերներից, իսկ վերջիններս ավելի շոշափելի արդյունքներ: ինչպես նշեց Բարոզուն` ակնկալիքները ժողովրդավարական ինստիտուտների ամրապնդման, դատական իշխանության անկախության, մարդու իրավունքների և ազատությունների ու բազմակարծության ոլորտներում են:

Ի ամփոփումն ՀՀ նախագահի հետ ունեցած քննարկումների, Եվրահանձնաժողովի նախագահ Ժոզե Մանուել Բարոզուն նշեց. «Նախագահին ուղղված իմ ուղերձը այսօր շատ պարզ է. մենք լիովին աջակցում ենք նախագահի ձեռնարկած բարեփոխումներին ու արդիականացման օրակարգին, և նախկինի պես հավատարիմ ենք Հայաստանի հետ համագործակցության խորացմանը»: