Ձեր վստահելի աղբյուրը

Forbes ամսագիրը հրապարակել է աշխարհի ամենահարուստ մարդկանց ցանկը: Վարկանիշային աղյուսակում ընդգրկվել է 1226 միլիարդատեր, որոնց ընդհանուր հարստությունը կազմում է 4,6 տրիլիոն դոլար: Ցուցակում են աշխարհի 58 երկրների ներկայացուցիչներ, այդ թվում առաջին անգամ Պերուից, Մարոկոյին և Վրաստանից:

Վարկանիշային աղյուսակի 425 միլիարդատեր ներկայացնում է միայն Միացյալ Նահանգները, 96 և 95-ական, համապատասխանաբար, Ռուսաստանն ու Չինաստանը

Վարկանիշային աղյուսակում, ինչպես և նախորդ տարի, առաջին հորիզոնականը զբաղեցնում է հեռահաղորդակցման ոլորտի մագնատ, մեքսիկացի միլիարդատեր Կարլոս Սլիմ Էլուն, ում կարողությունն այս տարի նվազել է 5 միլիարդ դոլարով և կազմել 69 միլիարդ դոլար: Երկրորդ տեղում է Microsoft կորպորացիայի հիմնադիր տնօրեն Բիլլ Գեյթսը՝ 61 միլիարդ դոլար կարողությամբ, երրորդում՝ ամերիկացի ներդրող Ուորեն Բաֆֆետը՝ 44 միլիարդ դոլարով:

Առաջին տասնյակում տեղ են զբաղեցրել նաև ֆրանսիական LVMH ընկերության տնօրեն Բեռնար Արնոն (37,5միլիարդ), «Զառա» ապրանքանիշի խանութների ցանցի՝ Inditex Group կորպորացիայի հիմնադիր Ամանսիո Օրտեգան (37,5միլիարդ), ամերիկյան Oracle ընկերության հիմնադիր Լոուրեն Էլիսոնը (36 մլրդ. դոլար), լեռնաարդյունաբերության ոլորտի մագնատ բրազիլացի Հայկ Բատիստան (30 միլիրադ դոլար), Aldi սուպերմարկետների ցանցի հիմնադիր գերմանացի Կարլ Ալբրեխտը (25,4 մլրդ դոլար) և այլոք:

Վարկանիշային աղյուսակի 20-րդ հորիզոնականում է Նյու-Յորքի քաղաքապետ Մայքլ Բլումբերգը՝ 22 միլիարդ դոլար կարողությամբ, իսկ Ֆեյսբուք սոցիալական ցանցի հիմնադիր Մարկ Ցուկենբերգը ավելացրել է իր ունեցվածքը 3,5 միլիարդով և 17,5 միլիրադ դոլար կարողությամբ զբաղեցրել է աղյուսակի 35-րդ հորիզոնականը:

Հատկանշական է, որ Ռուսաստանի Դաշնության մեծահարուստներից և ոչ մեկ այս տարի տեղ չի զբաղեցրել աղյուսակի առաջին քսանյակում: ՌԴ ամենահարուստ անձն այս տարի ձեռնարկատեր Ալիշեր Ուսմանովն է, ում կարողութունը գնահատվել է 18,1 միլիարդ դոլար գտնվում է 28-րդ հորիզոնականում:

Հայազգի մեծահարուստներից ամերիկահայ բարերար, գործարար Քըրք Քըրքորյանը 3,3 միլիարդ դոլար կարողությամբ 344-րդ տեղում է, իսկ արգենտինահայ գործարար Էդուարդո Էռնեկյանը 1,8 միլիարդով 719-րդ հորիզոնականում:
Ռուսաստանաբնակ հայազգի միլիարդատերերից ցուցակում ընդգրկված են «Ռոսգոսստրախ» ապահովագրական ընկերության գլխավոր տնօրեն Դանիլ Խաչատուրովը՝ 634-րդ հորիզոնականում` 2 միլիարդ դոլար կարողությամբ:

«Տաշիր գրուպ» ընկերության նախագահ, գործարար Սամվել Կարապետյանը՝ 1,6 միլիարդ դոլար կարողությամբ 804-րդ հորիզոնականում է, իսկ ծագումով հայ գործարար Սերգեյ Սարկիսովը՝ 1015- րդ տեղում 1,2 միլիարդ դոլար կարողությամբ: