Ձեր վստահելի աղբյուրը

ՀՀԿ 13-րդ համագումարում ՀՀ նախագահ, Հայաստանի Հանրապետական կուսակցության նախագահ Սերժ Սարգսյանի ելույթի վերաբերյալ Panorama.am-ը զրուցեց ՀՀԿ մամլո խոսնակ Էդուարդ Շարմազանովի հետ:

- Պարոն Շարմազանով, ինչպե՞ս կգնահատեք նախագահ Սարգսյանի ելույթը:
-Ասեմ, որ նախագահ Սարգսյանի ելույթի իմ ընկալումը` որպես Հանրապետական կուսակցության անդամի, հետևյալն է. այն նախևառաջ ռեֆորմատոր նախագահի ելույթ էր, մի մարդու ելույթ, ով պատրաստ է բարեփոխումների, և այդ բարեփոխունմներն սկսվում են իրենից և իր կողմից ղեկավարվող քաղաքական ուժից:

- Ի՞նչ կարևոր ուղերձներ կառանձնացնեիք:
-Առաջինը, որ մենք պետք է կարողանանք որոշ դեպքերում նաև վիրահատական միջամտության գնալ: Արտաքին քաղաքականության ոլորտում շատ հստակ մեխեր խփվեցին, որ պետք է կարողանալ շարունակել նախաձեռնող քաղաքականությունը, և որ Հանրապետական կուսակցությունն է այն առաջնորդը, որը տանում է առաջ թե´ Ցեղասպանության դատապարտումը և թե´ Արցախի խնդրի կարգավորումը:

- Ներքին քաղաքականության առումո՞վ ինչ կասեք:
Ինչ վերաբերում է ներքին քաղաքականությանը, որոշակի կարծրատիպեր կոտրելու շատ հստակ շեշտադրումներ հնչեցին: Նախևառաջ նախագահը շատ կարևորեց լրատվամիջոցների ազատ աշխատանքը և նշեց, որ մենք շատ ինտենսիվ պայքարելու ենք այն ուժերի դեմ, որոնք կխոչընդոտեն լրատվամիջոցների ազատ աշխատանքին:

Երկրորդը` հստակ կոչ հնչեց, որ եթե նախկինում ՀՀԿ-ն անում էր ամեն ինչ, որ պետության ու պետական ինստիտուտների հիմքերը ամրապնդվեն, ապա առաջիկա հինգ տարիներին մեր խնդիրը պետք է լինի այն, որ յուրաքանչյուր քաղաքացի իր վրա զգա իր ընտանիքի կենսամակարդակի, ինչպես նաև իր ազատությունների, իր հնարավորությունների հետ կապված փոփոխությունները:

Հաջորդը` կոռուպցիայի դեմ պայքարում մենք պետք է լինենք շատ հետևողական: Նաև շատ եմ կարևորում նախագահի նշած այն փաստը, որ մենք պետք է կարողանանք սիրել մեր երկիրը և գործով պետք է սիրենք: Նույնիսկ ես կավելացնեի նժդեհի հետևյալ խոսքերը. «Հոգու հիվանդությամբ են տառապում նրանք, ովքեր հոգնում են սեփական հայրենիքից»:

- Իսկ ծրագրային առումո՞վ ինչ կարևոր դրվագներ կառանձնացնեք:
Բնականաբար, խոսվեց նաև արվածի և չարվածի մասին: Մենք հստակ փաստերով տեսանք, որ այս հինգ տարիների ընթացքում գրեթե չի եղել ոլորտ, որտեղ Հանրապետականը առաջընթաց չի արձանագրել: Եվ հռետորական հարց հնչեց` կարո՞ղ էինք ավելին: Կարող ենք ասել, որ` իհա´րկե, կարող էինք: Բայց կարո՞ղ էր հակառակը լինել: Կարծում եմ, այո´: Ճգնաժամային շրջանում մենք արձանագրեցինք լուրջ բարեփոխումներ: Բայց կարևորն այն է, որ մենք ունենք նախագահ, մենք ունենք քաղաքական ուժ, որը կլինի ժողովրդավարական բարեփոխումների առաջամարտիկը և որը հավատում է, որ ինքը կարող է գնալ ընտրությունների: Իսկ առանց հավատի այս աշխարհում ոչինչ չի ստեղծվում: Աստված հավատով է ստեղծել մեզ և մենք պետք է հավատով առաջ շարժվենք:

- Իսկ ո՞ր կուսակցություններն են հրավիրված եղել համագումարին:
Համագումարին հրավիրված են եղել ՀՅԴ, «Բարգավաճ Հայաստան», ՕԵԿ, «Ազգային Միաբանությաւն», ՍԻՄ, ԱԻՄ կուսակցությունները:

- «Ժառանգություն» կուսակցությունը չի՞ հրավիրվել:
-«Ժառանգությունը» երբեք չի հրավիրվել մեր համագումարներին: Իսկ ինչո՞ւ պետք է հրավիրվեր:

- Իսկ ինչո՞ւ, ասենք, ՍԻՄ-ը հրավիրվել է, կամ` Արտաշես Գեղամյանը և Խոսրով Հարությունյանը: Նրանց ներկայությունը արդյո՞ք խոսում է այն մասին, որ նրանք ընդգրկվելու են ՀՀԿ համամասնական ցուցակում:
-Ձեր մատնանշած անձինք վերջին շրջանում պաշտպանել են գործող քաղաքական ուժի կողմից իրականացվող քաղաքականությունը: Իսկ համամասնական ցուցակի հետ կապված հարցերը կքննարկենք քիչ ավելի ուշ: