Ձեր վստահելի աղբյուրը

«Վերջին մի քանի շաբաթների ընթացքում ես եղել եմ ՀՀ բոլոր մարզերում՝ Շիրակից մինչև Սյունիք, Գյումիրից մինչև Մեղրի, Ագարակ հանդիպել եմ բազմաթիվ մեր քաղաքացիների հետ և հիմնական հարցադրումները, որոնք հնչում են հիմնականում հետևյալն են: Այո´, իհարկե, վերջին մի քանի տարիների ընթացքում մենք ունեցել ենք լրջագույն ձեռքբերումներ և´ մեր պետականության ամրապնդման, և´ սոցիալական, տնտեսական բնագավառներում, սակայն կան խնդիրներ, որոնց լուծման ուշացումը կարող է ի չիք դարձնել մեր բոլոր ձեռքբերումները, և դա մեր քաղաքացիների, պաշտոնատար անձանց ներքին նկարագրի խնդիրն է, և սա է հիմնական հարցադրումը, որին ի պատասխան և կառուցված էր ՀՀ նախագահի ողջ զեկույցը ՀՀԿ 13-րդ համագումարում»,- այս մասին Panorama.am-ի հետ զրույցում ասաց ԱԺ պատգամավոր, ՀՀԿ գործադիր մարմնի անդամ Գագիկ Մինասյանը:

«Այստեղ կա մի նախադասություն, կարծում եմ, որը հիմնարար նշանակություն ունի ողջ զեկույցի համար: ՀՀ նախագահը շեշտում է՝ հուսանացել է պատմական պահը, երբ Հայաստանի ժողովուրդը, մենք բոլորս պիտի գործով ցույց տանք, թե ինչն է մեզ համար հոգեհարազատ՝ անցյալից եկող հոռի բարքերը, որոնց իներցիան շարունակում է մեր կենցաղում, թե արդի քաղաքական նվաճումները: Ես կարծում եմ, որ այդ հարցադրումն է, որ հոգեհարազատ է այսօր բոլորին՝ շարքային քաղաքացուց մինչև կուսակցական, պետական ամենաբարձր պաշտոնյային: Եվ դրա պատասխանը միանշանակ է՝ մենք պետք է առաջ գնանք, և առաջ գնանք ավելի առաջանցիկ տեմպերով, որովհետև հակառակ պարագայում ոչ միայն մեր նախկին ձեռքբերումները, այլև սովորական նախկին հունով առաջընթացը մեզ որևէ էական հաջողություն չի կարող խոստանալ: Եվ սա է, որ դրված է այսօր, մեր բոլորի առաջ: Երբ ասում եմ բոլորը՝ նկատի ունեմ ոչ միայն կուսակցականներին, այլև նկատի ունեմ ողջ հանրությանը: Մենք պետք է հավատանք ու փոխվենք, բայց չափազանց ճիշտ է նաև այն պնդումը զեկույցում, որ հավատքը ինքնին լինել չի կարող: Այդ հավատքը պետք է սնուցվի ամենօրյա գործերով, ամենօրյա հաջողություններով, կատարված խոստումներով: Եվ սա հենց երկրորդ քայլն է, որն ասվում է զեկույցում, որը ցույց է տալիս, որ սին խոստումները, որոնցով շռայլում են իրենց ելույթները, մեր օպպոնենտներն երկար կյանք չեն կարող ունենալ: Ստի խոսքը կարճ է»,- ասաց Գ. Մինասյանը:

Նրա խոսքերով, ՀՀԿ-ն խոսում, պնդում և իրականացնում է իր խոստումները և ինչպես իր բոլոր նախկին խոստումները, ի հեճուկս համաշխարհային ֆինանսական ճգնաժամի, կուսակցությունն իրականացրել է:

«Այս համագումարում հնչած պատգամները ևս կիրականացնենք: Մենք իսկապես առաջանցիկ աճի խնդիր ունենք: Եվ առանց հավատի մեր ուժերի, մեր ճշմարտացիության մեջ, այդ առաջընթացը չենք կարող իրականացնել: Ես կարծում եմ, որ առաջիկան ցույց կտա, այս կանախատեսումների իրավացիությունը»,- նշեց պատգամավորը:

Ինչ վերաբերվում է արտաքին քաղաքականությանը, ապա ըստ բանախոսի՝ հայ-թուրքական հարաբերություններին, և´ մասնավորապես Ցեղասպանության միջազգային ճանաչման և´ իհարկե Ղարաբաղի խնդրում շատերը ՀՀԿ-ին մեղադրում էին պարտվողականության մեջ, սակայն կյանքը ցույց տվեց ճիշտ հակառակը:

«Հայ-թուրքական հարբերությունների իմաստով մենք իսկապես հասել ենք լուրջ հաջողությունների: Ողջ միջազգային հանրությունը միակարծիք է այն հարցում, որ երկկողմ չկարգավորված վիճակի պատճառը հենց Թուրքիան է: Երկրորդը՝ մենք հասել ենք նրան, որ Թուրքիայի ողջ առաջադեմ հատվածն է հավատում ու ամեն ապրիլի 24-ին պահանջում է իրենց իշխանություններից՝ ճանաչել Հայոց ցեղասպանությունը: Միայն մեր ճշգրիտ հաշվարկված արտաքին քաղաքականությունը թույլ տվեց հասնելու այս արդյունքին, որովհետև ակնհայտ է, որ եթե նույնիսկ ողջ աշխարհը ճանաչի ցեղասպանության փաստը, միայն Թուրքիայի ճանաչումով մենք կարող ենք իրականացնել մեր նպատակաները, իսկ Ցեսղապանության ճանաչումը մեր ազգային անվտանգության դոկտրինի կարևորագույն դրույթներից մեկն է»,- հավելեց Գ. Մինասյանը:

Ինչ վերաբերում է Արցախին, ապա պատգամավորի խոսքերով, չափազանց ֆունդամենտալ նախադասություն է հնչել նախագահի շուրթերից՝ Արցախը եղել է կա ու լինելու է հայկական, և Հայաստանի քաղաքականությունը Արցախի հարցում աներկբա է:

«Մենք պետք է հասնենք նրան և այդ ճանապարհին ենք, որպեսզի միջազգային հանրությունը ճանաչի Արցախի ինքորոշման իրավունքի իրացումը: Եվ այս ընթացքը կասեցնել հնարավոր չի: Եվ մեր նախորդ ձեռքբերումները դրա գրավականն են: Ես կարծում եմ, որ երկու բնագավառում՝ մեր արտաքին քաղքականության հիմնական բնագավառներում էլ, մենք ունենք անուրանալի ձեռբերումներ, և դրանց խորացումն առաջիկայի խնդիր է և այդ խնդիրը համոզված եմ՝ պատվով կիրականացնենք»,- եզրափակեց նա: