Ձեր վստահելի աղբյուրը

Մարտի 10-ին կայացած ՀՀԿ համագումարին Արաբկիրի նախկին թաղապետ Հովիկ Շահինյանը չէր մասնակցում: Պատճառների և իր հետագա անելիքների մասին Panorama.am-ը զրուցել է նրա հետ:

-Դուք ներկա չէիք Հանրապետական կուսակցության հաշվետու համագումարին, ինչու՞:
-Տեխնիկական պատճառներով:

-Կմասնավորեցնե՞ք, պարոն Շահինյան:
-Բացակայում էի:

-Իսկ հրավիրե՞լ էին Ձեզ:
-Այո, իհարկե, ես պատվիրակ էի և եթե ներկա լինեի, բնականաբար, պիտի քվեարկեի նաև:

-Հարգելի՞ էր Ձեր բացակայությունը:
-Երկրորդ տարբերակ չէր կարող լինել:

-Կարծիք կա, թե համագումարից Ձեր, ինչպես նաև այլոց, օրինակ Լևոն Սարգսյանի, Մանվել Ղազարյանի, Մանվել Տեր-Առաքելյանի, բացակայությունը կուսակցությունից նեղացած լինելու հետ է կապված: Ինչպե՞ս կմեկնաբանեք:
-Ձեր թվարկած անուններից ում, որ ես ճանաչում եմ, անհնար է, որ կարողանան նրանց նեղացնել կամ, ասենք, իրենք նեղանան կուսակցությունից: Ես դա բացառում եմ իմ մասով և նրանց մասով, ում ես ճանաչում եմ: Ի՞նչ է նշանակում նեղացած: Ինչի՞ց պիտի նեղանայի:

-Նախընտրական շրջանում կապված որոշ պայմանավորվածությունների հետ: Օրինակ, փետրվարին Դուք հայտարարեցիք մեծամասնականով առաջադրվելու ցանկության մասին, բայց օրեր անց հայտարարեցիք, որ վերանայել եք Ձեր որոշումը:
-Իմ չառաջադրվելու հետ կապված ասեմ հետևյալը: Մինչ իմ կողմից առաջադրվելու վերաբերյալ ցանկություն հայտնելը, պարզվեց կուսակցությունն ունեցել է նախնական պահմանավորվածություն ունի նույն ընտրատարածքում Արտակ Սարգսյանի թեկնածությունն առաջադրելու մասով: Եվ ես դա նորմալ եմ ընդունել: Եթե այդ պայմանավորվածությունն ընտրություններից երկու ամիս առաջ ձեռք բերվեր, այդ պարագայում ես կարող էի ինձ վատ զգալ, նեղանալ: Եթե արդեն կա պայմանավորվածություն, հիմա ինչ տարբերություն… Դրանք տակտիկական մոտեցումներ են, գլոբալ հարցեր չեն: Կուսակցությունում կքննարկվեն` ինչու ես չէ, այլ մեկ ուրիշը:

-Այսինքն կուսակցության այդ որոշումը Ձեզ չի խանգարի կուսակցության համար ակտիվ գործունեություն ծավալելու համար:
-Նման երևույթներն ինձ երբեք չեն խանգարել, քանի որ ես հստակ գիտեմ իմ ծրագրերը, իմ մոտեցումներն ու իմ անելիքները: Դրանք այն հանգամանքները չեն, որ կարող էին ազդել իմ տրամադրություների վրա, բացարձակապես:

- ՀՀԿ-ն դեռևս չի հրապարակել համամասնական ցուցակով և մեծամասնական ընտրակարգով առաջադրվող թեկնածուների անուները: Հաշվի առնելով այն, որ մեծամասնականով առաջադրվելու վերաբերյալ Ձեր հայտարարությունից հետո կուսակցությունը Ձեզ տեղեկացրել է նույն ընտրատարածքում մեկի այլ թեկնածուի առաջադրվելու պայմանավորվածության վերաբերյալ, հնարավո՞ր է որ Ձեր թեկնածությունն առաջադրվի համամասնական ցուցակով:
-Եթե քննարկվի, որոշեն, ուրեմն կլինեմ ՀՀԿ-ի համամասնական ցուցակով:

-Արդեն ուշ չէ՞ այդ քննարկումների համար, կուսակցական ցուցակներն արդեն առաջիկա օրերին պետք է ներկայացնել ԿԸՀ:
-Դե ինչ ասեմ` մի փոքր ուշ, մի փոքր շուտ: Գոյություն ունեն կուսակցության տակտիկական, ռազմավարական քայլեր, աշխատանքների կազմակերպման առավելագույն նպատակահարմարություն և այլն:

-Կարելի է ասել, որ Ձեր` ցուցակ ընդգրկվելու հարցը դեռ չի քննարկվել:
-Ես ինքս հարց չեմ բարձրացրել ցուցակում լինելու, ցանկություն է եղել մեծամասնականով առաջադրվելու, քանի որ այդ ընտրատարածքում ես ունեմ հաղթելու բոլոր շանսերը:

-Ասացիք, որ կուսակցությունը նախնական համաձայնություն ունի Արտակ Սարգսյանի հետ: Դա կարելի է ընկալել, այսպես ասած, «դաբրո»:
-Ոնց ուզում եք ընկալեք, եթե տվյալ կուսակցականը մի վեց ամիս, մեկ տարի կամ երկու տարի առաջ ցանկություն է հայտնել X ընտրատարածքում առաջադրվելու վերաբերյալ և սկսել է որոշակի հասարակական գործունեություն ծավալել, ակցիաներ և այլն (նայած ով ոնց է պատկերացնում դա), հետո փորձում է իր ծրագրերը համահունչ դարձնել կուսակցության մեծամասնական առաջադրվող թեկնածուի նախըտրական ծրագրերին և ներկայանալի դառնալ: Նկատելի է, որ այդ տարածքում որոշակի աշխատանքներ, իհարկե, տարվում են ու այդ թեկնածուին առաջադրում է Հանրապետական կուսակցությունը:

-Բայց ոչ Արտակ Սարգսյանը, ոչ էլ ՀՀԿ-ն դեռևս նրա առաջադրման մասին պաշտոնապես չեն հայտարարել:
-Գուցե Արտակը այդ մասին դեռ չի հայտարարել, բայց որ ես իմ առաջադրվելու վերաբերյալ կուսակցությունից պատասխան ստացել եմ, դա է եղել պատճառը, որ ես չեմ առաջադրվել: Ինձ կոնկրետ այդ մասին տեղեկացրել են կուսակցությունից:

-Դուք, փաստորեն,  հայտարարել էիք ձեր առաջադրվելու վերաբերյալ, մինչդեռ ձեր կուսակցությունն այդ ընտրատարածքի համար դեռ մեկ տարի առաջ ուներ նախատեսած մեկ այլ թեկնածու: Արդյոք դա չի՞ նշանակում, որ Դուք տեղյակ չեք կուսակցության որոշումների մասին: Դա չի՞ նշանակում, որ վերջին շրջանում կուսակցական գործերին ակտիվ մասնակցություն չունեք:
-Իսկ ինչու պետք է յուրաքանչյուր կուսակցական լիարժեք տիրապետի ներկուսակցական պայմանավորվածություներին կամ, ասենք, ինչ-որ համաձայնություններին: Այստեղ տարբեր խնդիրներ կան: Այսինքն` ամեն ոք, ով մտավ կուսակցություն, դուրս եկավ, պիտի ասուլիս տա՞, պատմի թե ինչի համար մտավ, ինչ խոսեց, հա՞:

-Պատրաստվու՞մ եք սատարել Արաբկիրում առաջադրվող ՀՀԿ-ի թեկնածուին:
-Այո, իհարկե: Թիվ 5 ընտրատարածում առաջադրված է կուսակցական, ով նաև իմ ընկերն է: Իսկ ինչ վերաբերում է 4-րդ ընտրատարածքոին, ես դա չեմ կարող, քանի որ այնտեղ առաջադրվելու է իմ կինը՝ Սաթիկ Սեյրանյանը: Բնական է, որ ես պետք է սատարեմ Սաթիկ Սեյրանյանի թեկնածությունը:

-Բայց Դուք նաև կուսակցական եք: Չե՞ք կարծում, որ Ձեր կապերն ու հնարավորությունները պետք է առաջին հերթին ծառայեցնեք ՀՀԿ-ի առաջադրած խնդիրների լուծմանը:
-Համենայնդեպս,  ես չգիտեմ որևէ կուսակցական, ով իր ընտանիքի անդամի առաջադրվելու դեպքում այլ թեկնածուի կպաշտպանի: Սաթիկ Սեյրանյանի առաջադրման վերաբերյալ որոշումը վերջնական է, եթե իմ առաջադրվելու պարագայում եղավ խանգարող հանգամանք, ապա ինքը լրիվ ազատ է:

-Փաստորեն, Դուք պետք է աշխատեք առավելագույն ձայներ ստանալ` մրցակցելով կուսակցի դեմ:
-Հա, ինչ խնդիր կա: Այստեղ ես որևէ խնդիր չեմ տեսնում: Սաթիկ Սեյրանյանն անկուսակցական է, հավանաբար կգտնվեն քաղաքական որոշ ուժեր, որ կսատարեն իրեն:

Նախորդող նորությունը` Ալբերտ Երիցյանը վերանայել է մեծամասնականով առաջադրվելու որոշումը