Ձեր վստահելի աղբյուրը

Հայաստանի բուհերում սովորող ավելի քան 200 ջավախքցի ու արցախցի ուսանողներն այսօր «Տաշիր» բարեգործական հիմնադրամի կողմից ստացան 200 հազարական դրամ կրթաթոշակ:
 
«Ընտրվել են այն ուսանողները, որոնք աչքի են ընկել իրենց առաջադիմությամբ: Ցուցակները մեզ տրվել է կրթության ու գիտության նախարարության կողմից, որի հիման վրա էլ մենք ընտրել ենք այս ուսանողներին: Սա ոչ թե աջակցություն է, այլ խրախուսանք»,- լրագրողներին ասաց Կարեն Կարապետյանի գրասենյակի ղեկավար Արտակ Ճաղարյանը: Ուսանողներին տրված կրթաթոշակների ընդհանուր գումարը կազմում է մոտ 120 հազար ԱՄՆ դոլար:

Արտակ Ճաղարյանի խոսքով, կրթական համակարգը միշտ էլ եղել է Կարեն Կարապետյանի ուշադրության կենտրոնում, քանի որ մրցունակ կադրեր ունենալու նախապայմանը բարձրակարգ կրթություն ապահովելն է:
 
«Խթանելով կրթության ոլորտի զարգացմանը, աջակցելով շնորհալի ուսանողներին` ներդրում ենք անում մեր ժողովրդի ապագայի կերտման գործում: Այսօրվա երիտասարդները վաղը ստանձնելու են կառավարման, պետության ու պետականության կառուցման պատասխանատվությունը»,- միջոցառման ժամանակ նշեց Ա. Ճաղարյանը:

ԿԳ նախարար Արմեն Աշոտյանն, իր հերթին, խնդրանք-պահանջով դիմեց ներկա ուսանողներին` շարունակել լավ սովորել, քանի որ կրթությունն է իրենց բարեկեցության ու ապագայում հաջողության հասնելու նախապայմանը: Նա խորհուրդ տվեց ուսումն ավարտելուց հետո անպայման վերադառնալ Ջավախք և ԼՂՀ ու գումարը ծախսել ոչ թե խրախճանքների ու զվարճանքների վրա, այլ` ուսման վարձերը վճարելու կամ ուսումնական համապատասխան պարագաներ ձեռք բերելու վրա: «Չմոռանաք, որ գումարը ուսումանական նպատակներով է տրված»,- ընդգծեց նա:

Ուսանողներից` Մանկավարժական համալսարանի կուլտուրայի բաժնում սովորող Բեթխեհեմ Արաբյանը, նախ շնորհակալություն հայտնեց այս նախաձեռնության համար, հատկապես այն բանի համար, որ ընտրվել են Ջավախքի ու Արցախի ներկայացուցիչները, այնուհետև վստահեցրեց, որ անձամբ ինքը կրթությունն ավարտելուց հետո վերադառնալու է իր բնակավայր:

Հիշեցնենք, որ ՀՀ ԿԳՆ ու «Տաշիր» բարեգործական հիմնադրամի միջև օրերս կնքված համաձայնագրով նախատեսվում է, որ հիմնադրամը մի քանի կրթական ծրագրեր է ֆինանսավորելու:

Լրագրողների հետ զրույցում Ա. Ճաղարյանը տեղեկացրեց, որ կրթական ծրագրերին աջակցությունը շարունակական են լինելու:

«Հաջորդ փուլով արդեն հիմնադրամն աջակցություն է ցուցաբերելու Հայաստանից, Ջավախքից ու Արցախից մոտ 200 մանկավարժների»,- նշեց նա` հավելելով, որ անցած երկու տասնամյակում Կարեն ու Սամվել Կարապետյանները բազմաթիվ ծրագրերով աջակցություն են ցուցաբերել տարբեր խմբերի, ում ստացած աջակցությունը բավարար չէ: Նրա խոսքով` քսան տարվա ընթացքում Կարապետյան եղբայրները 90 միլիոն դոլարի բարեգործական ծրագրեր են իրագործել: «Ցավոք, երբեմն արված գործերը շահարկումների տեղիք են տալիս ու փորձում ստվերել կատարված գործերը: Սակայն փաստ է, որ Կարեն ու Սամվել Կարապետյանների բարեգործական նախաձեռնությունները երբեք քաղաքական ենթատեքստ չեն ունցել: Չնայած շահարկումներին, ծրագրերը շարունակական են լինելու»,- վստահեցրեց Ա. Ճաղարյանը: