Ձեր վստահելի աղբյուրը

Մարտի 17-ին Դոնեցկի «Շախտյորն» իր մարզադաշտում հերթական հանդիպումը կանցկացնի Ուկրաինայի առաջնության շրջանակներում` հյուրընկալելով Օդեսայի «Չեռնոմորեցին», որը ներկայումս 10-րդ տեղում է և բավական լավ է սկսել մրցաշրջանի գարնանային հատվածը` տոնելով երկու հաղթանակ: Իսկ «Շախտյորը» Կիևի «Դինամոյի» հետ շարունակում է պայքարը երկրի չեմպիոնի կոչման համար:

Այսօր «Դոնբաս Արենա» է ժամանել «Շախտյորի» կիսապաշտպան Հենրիխ Մխիթարյանը և պատասխանել լրագրողների հարցերին: Այս մասին հայտնում է ակումբի պաշտոնական կայքը:

- Հենրիխ, առաջին շրջանում «Չեռնոմորեցի» հետ հանդիպումը բավական ծանր ստացվեց: Այն ավարտվեց ոչ-ոքի արդյունքով` 2:2: Ստացվում է, որ շաբաթ օրը «Շախտյորին» ծա՞նր հանդիպում է սպասվում:
- «Շախտյորի» համար հեշտ մրցակիցներ չկան, որովհետև բոլորը տրամադրվում են ոչ թե հարյուր, այլ երկու հարյուր և նույնիսկ երեք հարյուր տոկոսով: Ուստի մենք թուլանալու իրավունք չունենք: Չէ՞ որ ընդամենը 8 խաղ է մնացել, և պետք է ամեն ինչ անենք` յուրաքանչյուրում հաղթելու համար:

- «Չեռնոմորեցի» հետ առաջին շրջանի խաղից հետո ի՞նչ եզրակացություններ ես արել քեզ համար:
- Այդ հանդիպման վերջնամասում, հավանաբար, այնքան էլ կենտրոնացած չէինք, ուստի և գոլ բաց թողեցինք: Կարծում եմ` «Դոնբաս Արենայում» դա չի կրկնվի:

- «Չեռնոմորեցի» հետ այդ խաղում դու գոլի հեղինակ դարձար, բացի դա, Օդեսայի թիմի դարպասը գրավել ես նաև «Մետալուրգի» կազմում: Ինչ-որ գաղտնի՞ք կա:
- Չէ, ոչ մի գաղտնիք էլ չկա (ժպտում է): Հավանաբար, խաղերն այնպես են դասավորվում, որ ինձ հաջողվում է գոլ խփել «Չեռնոմորեցին»: Կարող եմ ասել, որ ինձ համար գոլեր ձևակերպելը մեծ պատիվ է: Նշանակություն չունի, թե որ խաղում: Կարևորն այն է, որ գնդակը հայտնվի ցանցում, և կարողանամ օգնել թիմին` հաղթելու:

- Ինչպե՞ս կբնութագրեիր մրցակցին: Որո՞նք են նրա ուժեղ և թույլ կողմերը:
- «Չեռնոմորեցի» խաղը դեռ չեմ ուսումնասիրել: Բայց, կարծում եմ, եթե վերջին երկու խաղում 6 միավոր է վաստակել, կարելի է եզրակացնել, որ գերազանց թիմ է, որում լավ կոլեկտիվ է հավաքվել: Օդեսացիները մինչև վերջ կպայքարեն մեզ հետ` միավորներ վաստակելու համար: Իսկ մենք ամեն ինչ պետք է անենք` նման բան թույլ չտալու համար:

- Որքանո՞վ ես լավ ճանաչում «Չեռնոմորեցի» կիսապաշտպաններին, որոնց դեմ, ամենայն հավանականությամբ, պետք է անձամբ գործես:
- Մի գոտում կենտրոնանալ չի կարելի: Խաղի ժամանակ կարող ես հայտնվել պաշտպանության աջ թևում, հենակետային կիսապաշտպանի դիրքում կամ հարձական գծում… Պետք է ուսումնասիրել մրցակցի խաղն ամբողջությամբ և բոլոր ֆուտբոլիստներին` ուժեղ և թույլ կողմերը գտնելու համար:

- Շատ է խոսվում պահերի իրացման մասին ինչպես «Դնեպրի», այնպես էլ «Իլյիչևեցի» հետ խաղից հետո: Կողքից թվում է, թե դա «Շախտյորի» ամենալուրջ խնդիրն է…
- Կարծում եմ` «Չեռնոմորեցի» հետ խաղում արդեն ամեն ինչ կարգին կլինի (ժպտում է): Կցանկանայի, որ երկրպագուներն օգնեն մեզ այդ խաղում, իսկ մենք ամեն ինչ կանենք` նրանց հաղթանակ պարգևելու համար:

- Հինգշաբթի տեղի կունենա Ուկրաինայի գավաթի խաղարկության վիճակահանությունը: Արդեն մտածո՞ւմ եք այդ մրցաշարի մասին, թե՞ թույլ մրցակիցներ են մնացել…
- Գավաթի խաղարկությունում թույլ մրցակիցներ չեն լինում: Յուրաքանչյուր սխալ կարող է ճակատագրական լինել ինչպես մեզ, այնպես էլ մրցակիցների համար: Բոլորն էլ լրջորեն տրամադրվում են հաղթանակի: Առավել ևս, որ քառորդ եզրափակչում միայն մեկ խաղ է նախատեսված, և հաղթողը կհայտնվի կիսաեզրափակչում:

- Միևնո՞ւյն է` ում հետ կխաղաք գավաթային մրցաշարում, թե, կապված վիճակահանության հետ, որոշակի նախապատվություններ կան:
- Որևէ նախապատվություն չունենք:

- Ժադսոնի հեռանալուց հետո դու վերադարձար քեզ համար սովորական` հարձակողական ոճի կիսապաշտպանի դիրք: Ուզո՞ւմ ես կրկին խաղալ հենակետային կիսապաշտպանի գոտում:
- Կխաղամ այնտեղ, որտեղ մարզիչը հարմար կհամարի, որտեղ թիմն ինձանից ավելի շատ օգուտ կստանա:

- Իսկ ինքդ քեզ որտե՞ղ ես ավելի լավ զգում:
- Հետ քաշված հարձակվողի դիրքում:

- Վերջին տուրերում ուկրաինական ֆուտբոլում շատ սկանդալներ գրանցվեցին: Ի՞նչ կարող ես ասել այդ մասին:
- Ես նայել եմ «Դնեպրի» ու «Վորսկլայի» խաղի հաշվետվությունը: Հավանաբար, ամենածիծաղելին այն դրվագն է, երբ դեղին քարտ է ստանում Կրավչենկոն: Կարելի է ասել` ոչ մի բանի համար: Նույնիսկ ինքը երևի չհասկացավ, թե ինչի համար զգուշացվեց: Ինձ համար նույնպես դա գաղտնիք է:

- Չե՞ս կարծում, որ ուկրաինական ֆուտբոլն ինչ-որ չափով քաղաքականացվել է:
- Եթե անկեղծ, քաղաքականությունից ոչինչ չեմ հասկանում (ծիծաղում է):

- Հենրիխ, դու մտար «Շախտյորի» պատմության մեջ` խփելով թիմի 1700-րդ գոլը «Դնեպրի» հետ խաղում: Ինչպիսի՞ զգացումներ առաջացրեց այդ իրադարձությունը:
- Շատ ուրախ էի, որ խփեցի այդ գոլը: Ինձ համար հաճելի է, որ անունս գրվում է «Շախտյորի» պատմության մեջ: Սա մեծ թիմ է, և շատ ուրախ կլինեմ, որ հաջողվի խփել նաև 1800-րդ գոլը, եթե նման հնարավորություն լինի, նաև 1900-րդը:

- Երկրպագուների սիրելին ես: Քվեարկությունների արդյունքում ճանաչվել ես ամսվա լավագույն խաղացող, Հայաստանի 2011 թ. լավագույն ֆուտբոլիստ: Խաղերից առաջ պատասխանատվությունն ուժե՞ղ է ճնշում:
- Ոչ, պատասխանատվությունն այդ առումով չի ճնշում, որովհետև լավագույնը ճանաչվելը հաճելի իրադարձություն է: Դա խաղերի և մարզումների համար լրացուցիչ մոտիվացիա է: Եթե դու պրոֆեսիոնալ ես, թուլանալու իրավունք չունես:

- Ինչպիսի տրամադրության մեջ է Լուիս Ադրիանոն, ով վերջին խաղում չիրացրեց գոլային մի շարք հնարավորություններ:
- Դե, սա ֆուտբոլ է: Բոլորն էլ նման իրավիճակներում լինում են: «Կարպատների» հետ խաղում ես, օրինակ, 4 լավ պահ ունեի, որոնք չիրացրեցի: Այնպիսի դիրքերից չկարողացա գրավել մրցակցի դարպասը, որ ինքս էլ զարմացած եմ: Ադրիանոյի պարագայում նույնն է: Հնարավոր է` սա սև շրջան է, բայց տա Աստված, որ շատ արագ հաղթահարի այդ փուլը և կրկին սկսի գոլեր խփել:

- Ընդհանրապես` ֆուտբոլիստները նման սայթաքումները երկա՞ր են վերապրում:
- Դա շատ ծանր է, հատկապես` հարձակվողի համար: