Ս.Սաֆարյան. ««Ժառանգությունը», ի տարբերություն ՀՀԿ-ի խնդիր չունի հորդորելու, որ իրեն հավատան»
Panorama.am-ը ներքաղաքական իրավիճակի, սպասվող զարգացումների ու ընդդիմության հնարավոր միավորման շուրջ զրուցել է «Ժառանգություն» խմբակցության ղեկավար Ստյոպա Սաֆարյանի հետ:
-Պարոն Սաֆարյան, ինչպիսի՞ն է Ձեր կարծիքով, նախընտրական իրավիճակը Հայաստանում:
-Նկատելի է, որ արդեն ընտրական կրքերը թափ են հավաքում: ՀՀԿ 13-րդ համագումարում նախագահ Սերժ Սարգսյանի ելույթը ընթերցելուց հետո տեսանելի են, թե նա ինչ ցածրության վրա դրեց մրցակցության նշաձողը և ինչպիսի անհանդուրժողականություն կար իրենց քննադատության ու քննադատողների հասցեին: Իսկ սա շատ էական է այն առումով, որ ՀՀԿ-ն քաղաքական դաշտի թե հիմնական դերակատարներից մեկն է, թե իշխող կուսակցությունը և բավականին լուրջ պատասխանատվություն ստանձնեց սուր ընտրապայքարի համար: Եվ տվյալ պարագայում իմ համար անհանգստացնող կարող է լինել, որ այս կերպ շարունակելու դեպքում հռետորաբանությունը պարզապես անզսպելի կլինի և կունենանք 2008թ-ի տհաճ նախընտրական մթնոլորտը:
Երկրորդ. իմ համար ցուցանիշ է նաև մրցակից կուսակցության` «Ժառանգության» դեմ (թեև ԵԺԿ-ում գործընկեր կուսակիցներ են) սև PR-ի փորձը, որ իրականացվեց մի անձի պատկանող լրատվամիջոցում, ով հրավիրված էր ՀՀԿ համագումարին և ում անունը շրջանառվում է ՀՀԿ ցուցակում լինելու առումով: Սա անհանգստացնում է այն առումով, որ որքան էլ չի բարձրաձայնվում, այնուամենայնիվ ՀՀԿ-ն ինքը չի բացառում կոմպրոմատների և որ ավելի զազրելի է` սև PR կոմպոնենտն այս նախընտրական շրջանում: Հետևաբար չեմ կարծում, որ մթնոլորտը կլինի անպիսին, որ ընտրողին հաճույք կպատճառի և թույլ կտա ընդամենը ընտրություն կատարել:
-Իսկ ինչպե՞ս կգնահատեք «Ժառանգության» դիրքերն այս մրցավազքում:
-«Ժառանգությունը» նախընտրական շրջան է մտնում առանց չափազանցության բավականին լավ ստարտային պայմաններով և դրա պատճառը զուտ մեր հետևողական աշխատանքն է այս չորս տարիների ընթացքում, որը ոչ մի պահի չթուլացավ: Եվ ես վստահորեն կարող եմ ձևակերպել, որ մեր կուսակցությունը եղել է բնակչության «շտապ օգնությունը»: Եթե համեմատելու լինենք 2007թ-ի իրավիճակի հետ, իհարկե այն անհամեմատելի է` ունենք ճանաչված թիմ, հանրությանը հայտնի առաջնորդ, ունենք նաև կատարված աշխատանք, որի հաշվետվությունը պետք է ներկայացնենք այս ընտրությունների ժամանակ: Եվ մենք, ի տարբերությունը ՀՀԿ-ի, խնդիր չունենք հորդորելու, որ մեզ հավատան :
-Գանք «Ժառանգության» ու «Ազատ դեմոկրատների» հնարավոր միավորմանը: Ի վերջո, որքանո՞վ կարող է այս միավորումը դրական ազդել «Ժառանգության» վարկանիշի վրա:
-Անկախ տարատեսակ մեկնաբանություններից ակնհայտ է, որ հասարակության զգալի շերտերի համար այն ողջունելի է: Եվ եթե անգամ «Ազատ դեմոկրատների» հետ մեր համագործակցությունը վարկանիշի առումով ոչինչ չավելացնի, հասարակության մեջ կա մի հատված, որը ցանկանում է տեսնել ընդդիմադիր բոլոր խաղացողների միավորումը: Այդպիսին էր նաև 2008թ-ի հասարակական պահանջարկը, ժողովուրդը շատ դեպքերում ասում էր, որ գիտակցում էր, թե որքան մեծ էր տարբերությունը «Ժառանգության» և Լևոն Տեր-Պետրոսյանի թիմի միջև` արտաքին քաղաքականությունից մինչև ներքին քաղաքականությանը վերաբերող հարցերի հարթությունում: Բայց հանուն երկրում դրական փոփոխությունների ու իշխանափոխության հնարավոր համարում էին դա: Հասարակական պահանջը շատ հետաքրքիր էր ձևակերպել խնդիրը և այդպիսի պահանջ եղել է բոլոր ընտրությունների ժամանակ ` 1996-ին, 2003-ին և 2008-ին. միավորման էֆեկտն է ավելի շատ կարևորվում ընտրողի կողմից: Թեև հասկանալի է, որ նման միավորումը չողջունողներն էլ շատ կլինեն:
-Իսկ Ձեր գնահատմամբ` «Ազատ դեմոկրատները» ամբողջովին ազատվե՞լ են տեր-պետրոսյանական թիմ լինելու պիտակից:
-Բարդ հարց է… հանրային ընկալումների մեջ գուցե կա նաև այդ պահը, որովհետև նրանք երկար տարիներ եղել են ՀՀՇ ղեկավար կազմը: Բայց ես մի ճշգրտում կուզեի մտցնել` դա այն ժամանակներն են, երբ անգամ ՀՀՇ-ի ներսում կար անտեսանելի կոնֆլիկտ հենց այդ թևի և Լ.Տեր-Պետրոսյանի միջև: Ավելին` այդ թիմից շատերը, որոնք այդքան էլ բարձր պաշտոններ չեն զբաղեցրել Տեր-Պետրոսյանի օրոք, այնուամենայնիվ նրա պաշտոնաթողությունից հետո ստանձնեցին ՀՀՇ-ի քննադատության ծանր բեռը: Իհարկե, ստերեոտիպերի առումով կարող է լինել նման գնահատական, բայց շատ ավելի կարևոր է իրականությունը, որը շատ ավելի բազմաշերտ է ու բարդ, քան ուղղակի այդ պարզունակ գնահատականը: Ի վերջո` բոլորին կարելի է ասել ՀՀՇ-ական, որովհետև նույն տրամաբանությամբ նույն Ռոբերտ Քոչարյանին ու Սերժ Սարգսյանին էլ անվանում են ՀՀՇ-ական շրջանի գործիչներ:
-Վերջնական որոշումը` կմիավորվեք թե ոչ խոստացվել է մարտի 18-ին: Իսկ մինչ այդ ի՞նչ նախադրյալներ ունենք:
-Կարծում եմ այդ խնդրի լուծումը մեծապես կախված է կողմերի իրատեսությունից, իսկապես շահագրգռության աստիճանից ու ճշգրիտ մոտեցումից: Կարելի է շատ բան ցանկանալ ու ակնկալել, բայց պետք է լինել իրատես ու շատ ճշգրիտ մոտենալ խնդրին ու դրա լուծումներին: Ես ամենևին չեմ ցանկանա բացել այն, ինչ ես եմ տեսնում տվյալ պարագայում, որովհետև ցանկացած մանրուք էական է` հաղթահարել 5 տոկոս, թե 7 տոկոս և նմանատիպ այլ հարցեր: Դրանք բոլորն էլ էական են:
Թե ինչպիսին կլինի երկու կողմերի վերաբերմունքն այս ամենին ցույց կտա ժամանակը: Բայց գոնե ես գիտեմ ու հիշում եմ մեզ համար երկուստեք ընդունելի բանաձևը, որ անկախ արդյունքից` միևնույն է «Ժառանգությունն» ու «Ազատ դեմոկրատները» դիտարկելու են միմյանց որպես համախոհներ, գործընկերներ: Գոնե մեր ներսում ավելորդ ու անհարկի մեծ սպասումներ չունենք ու նաև չենք կարևորել հապճեպ որոշումների կայացումը ի վնաս հասարակության: Ավելի լավ է չլինի որևէ համագործակցություն, բայց լինի մի բան, որը մեկ ամիս հետո ուղղակի հիասթափեցնի ողջ ընտրազանգվածին: Հետևաբար գոնե այս առումով չափազանց զգուշավոր ենք և չափազանց լուրջ ենք մոտենում խնդրին` մի կողմ թողնելով մամուլում հրապարակվող ու իրականության հետ կապ չունեցող «ամուսնության ու ապահարզանի» վերաբերյալ գնահատականները:
Լրահոս
Տեսանյութեր
ԱՄՆ-ում հրդեհների հետևանքով մոխրացել է Սահակ-Մեսրոպ հայ քրիստոնյա վարժարանը
