Ձեր վստահելի աղբյուրը

«Հայաստանը գտնվում է տնտեսական և քաղաքական զարգացումների այնպիսի փուլում, որ ԵՄ-ն հնարավոր է համարում Հայաստանի հետ սկսել Խորը և համապարփակ ազատ առևտրի շուրջ բանակցությունները»: Այս մասին այսօր լրագրողների հետ հանդիպման ժամանակ ասաց ՀՀ ԱԺ պատգամավոր Կարեն Ճշմարիտյանը՝ անդրադառնալով Հայաստանի ԵՄ-ի հետ խորը և համապարփակ ազատ առևտրի համաձայնագրի բանակցությունների գործընթացին:

Նա նշեց, որ ՀՀ-ԵՄ միջև ասոցացման մասին համաձայնագրի ամենակարևոր մասը կազմում է հենց այդ ազատ առևտրի մասին համաձայնագիրը: «Ամենակարևոր իրադարձությունն այն է, որ Հայաստանը բարեփոխումների իրականացման արդյունքում հասել է այն մակարդակի, որ ԵՄ-ն պատրաստ է Հայաստանի հետ սկսել այդ բանակցությունները»,- ասաց Կ.Ճշմարիտյանը:

Կ.Ճշմարիտյանը անդրադառնալով այդ համաձայնագրի տնտեսական մասին, նշեց, որ Հայաստանի համար ԵՄ-ն հանդիսանում է արտաքին առևտրի առաջին գործընկերը, ինչպես նաև՝ Հայաստանի տնտեսությունում կարևոր ներդնողներից մեկը: Միևնույն ժամանակ, ըստ նրա, Հայաստանի համար բացվում է ազատ առևտրի հնարավորություն ԵՄ 500 միլիոնանոց մի շուկայում, որտեղ տարածքների միջև զարգացումը բավականին հավասարաչափ է, որտեղ մեկ շնչին բաժին ընկնող ՀՆԱ-ն կազմում է 30-40 հազար դոլար, ինչպես նաև ապրանքների և ծառայությունների նկատմամբ պահանջները գտնվում են բավականին բարձր մակարդակի վրա:

Այսպիսով, ըստ Կ.Ճշմարիտյանի, սպառման մեծ շուկան կխթանի Հայաստանի տնտեսական զարգացումը ոչ միայն քանակական, այլ որակական առումով, քանի որ Եվրոպա կարող են առաքվել միայն որակյալ ապրանքներ, ինչը կխթանի նոր հզորությունների ու տեխնոլոգիաների ներմուծումն ու մրցակցությունը: Նրա խոսքերով՝ կզարգանա նաև կրթական ոլորտը, քանի որ ձեռնարկություններին հարկավոր կլինեն որակավորում ունեցող աշխատակիցներ: «Այսինքն՝ սա կխթանի Հայաստանում զարգացնելու գիտելիքի վրա հիմնված տնտեսություն»,- ասաց պատգամավորը՝ հավելելով, որ սա մի շղթա է, որն ապահովելու է երկրի հետագա՝ ավելի արագ և որակյալ առաջընթացը:

Կ. Ճշմարիտյանն անդրադառնալով ՀՀ և ԵՄ-ի միջև գոյություն ունեցող ինտեգրացիոն գործընթացներին, նշեց, որ Հայաստանի համար ԵՄ-ի հետ տնտեսական կապերի խորացումը կբերի նրան, որ մեր երկիրն ավելի հասկանալի կլինի այլ տնտեսական գործընկերների համար`օրենսդրության իմաստով, ինչպես նաև միջազգային տնտեսական ինտեգրման իմաստով:

Պատգամավորն այս գործընթացում կարևորեց նաև ՀՀ նախագահի քաղաքական կամքն և աջակցությունն այդ գործընթացներին:

Նշվեց նաև, որ վերջին երկիրը, որի հետ կնքվել է ազատ առևտրի պայմանագիր, եղել է Կորեան, իսկ ընդհանուր առմամբ մոտ 10 երկիր ունի նման համաձայնագիր: Ըստ Կ. Ճշմարիտյանի` համաձայնագրի կնքման շուրջ բանակցությունները տևում են միջինը 2-3 տարի: