Ձեր վստահելի աղբյուրը

Ղարաբաղյան հիմնահարցի կարգավորման գործընթացում առաջընթաց չի արձանագրվում այն պատճառով, որ Ադրբեջանը հետ է կանգնում բանակցությունների ժամանակ ձեռք բերված պայմանավորվածություններից: Այս մասին այսօր ԳԴՀ ԱԳ նախարար Գիդո Վեսթերվելլեի հանդիպումից հետո ասուլիսի ժամանակ հայտարարեց ՀՀ ԱԳ նախարար Էդվարդ Նալբանդյանը, պատասխանելով գերմանացի լրագրողի հարցին, թե ինչի Ղարաբաղյան հիմնահարցի կարգավորման գործընթացում առաջընթաց չի արձանագրվում:

Նախարար Նալբանդյանը հիշեցրեց, որ Սոչիում այս տարվա հունվարին կայացած Ռուսաստանի, Հայաստանի և Ադրբեջանի նախագահների հանդիպմանը կարևոր հայտարարություն է արվել, այն մասին, թե ինչ քայլեր պետք է ձեռնարկվեն մոտ ապագայում Ղարաբաղյան կարգավորման գործընթացում առաջընթացի ուղղությամբ:

«Այսպիսի հայտարարություններ եղել են բազմիցս, մինչև Սոչիի հանդիպումը` 1 տարի առաջ մարտ ամսին նախագահներն անդրադարձան բազմաթիվ կետերի: Դրանք չիրականացան այն պատճառով, որ Ադրբեջանը մերժեց փաստորեն այն, ինչի մասին պայմանավորվել են: Մասնավորապես` պայմանավորվածություն էր ձեռք բերվել շփման գծում միջադեպերի հետաքննության մեխանիզմներ ստեղծելու վերաբերյալ: Մեկ տարվա ընթացքում Ադրբեջանն ամեն ինչ արեց, որ այդպիսի մեխանիզմ չստեղծվի», -ասաց ԱԳ նախարարը:

Նա հիշեցրեց, որ համապատասխան առաջարկներ ներկայացվել են ԵԱՀԿ Մինսկի խմբի համանախագահների կողմից դեռ 2011 թվականի ապրիլին, և Հայաստանը հայտնել էր իր պատրաստակամությունը: «Երկրորդ անգամ եռանախագահների առաջարկով Հայաստանը ևս մեկ անգամ դրական պատասխան տվեց հոկտեմբեր ամսին: Ադրբեջանը մինչ այսօր այդպիսի պատասխան չի տվել, ավելին` դեկտեմբեր ամսին, երբ քննարկվում էր ԵԱՀԿ ընդհանուր բյուջեն, նա սպառնացել է, որ կօգտագործի վետոյի իրավունքը, եթե որևէ մի հատկացում կատարվի այդ մեխանիզմների ստեղծմանը: Սա օրինակներից մեկն է, թե ինչու առաջընթաց չի կարող արձանագրվել, քանի որ պայմանավորվում ենք մեկ բան, բայց Ադրբեջանը անում է այլ բան», - ասաց Է.Նալբանդյանը:

Նախարարի խոսքով` Կազանում, Սոչիում, այլ գագաթնաժողովներում Հայաստանի և Ադրբեջանի նախագահների հանդիպումներից առաջ նախապատրաստական աշխատանքներն ուղղված են եղել, որ կողմերը համաձայնության գան ինչ-որ սկզբունքների շուրջ: «Ամեն անգամ, երբ ինչ որ համաձայնությունների ենք եկել, Ադրբեջանը գագաթնաժողովին եկել և ասել է «այո, ես կարող եմ համաձայնվել, բայց ունեմ տասը փոփոխություն», այսինքն` հետ է կանգնել պայմանավորվածություններից», - ասաց նա:

Արտաքին քաղաքականության գերատեսչության ղեկավարը նաև անհիմն անվանեց Բաքվից հնչող այն հայտարարությունները, թե առաջընթացի բացակայությունը պայմանավորված է ԵԱՀԿ Մինսկի խմբի համանախագահող երկրների կամ դեսպանների անարդյունավետ առաքելությունից: Նա հիշեցրեց, որ միայն ՌԴ նախագահ Դմիտրի Մեդվեդևի նախաձեռնությամբ վերջին 2-3 տարիների ընթացքում նախագահների կամ արտգործնախարարների մակարդակով տեղի է ունեցել շուրջ 10 հանդիպում, իսկ խմբի եռանախագահները բազմիցս են եղել Բաքվում, Ստեփանակերտում և Երևանում:

«Նույնիսկ Սոչիում Ադրբեջանի նախագահը բարձր է գնահատել եռանախագահների աշխատանքը, երբ Հայաստանի և Ադրբեջանի ղեկավարները հույս հայտնեցին, որ նույն ձևաչափով և նույն մանդատով եռանախագահները կշարունակեն իրենց առաքելությունը` մինչև տարծաշրջանում խաղաղություն հաստատվի: Բայց Սոչիի հանդիպումից օրեր անց, երբ նախագահն ասում է մեկ բան, տարբեր այլ մակարդակներուվ Ադրբեջանից հնչում է քննադատություն եռանախագահների հասցեին: Այս ցանկը կարելի է շարունակել», -եզրափակեց ՀՀ արտգործնախարարը: