Ձեր վստահելի աղբյուրը

Հյուսիսային համալսարանի ռեկտոր Բորիս Մակիչյանն ուզում է իր թեկնածությունն առաջադրել թիվ 10 ընտրատարածքում՝ մրցելու գործարարներ Խաչատուր Սուքիասյանի և Գարեգին Նուշիկյանի հետ:

Հիշեցնենք, որ այս ընտրատարածքում Խաչատուր Սուքիասյանի թեկնածությունն առաջադրել է և կպաշտպանի ՀԱԿ-ը, իսկ ՀՀԿ-ն առաջադրել է ՀՀ գլլխավոր դատախազ Աղվան Հովսեփյանի խնամի Գարեգին Նուշիկյանի թեկնածությունը:

Կենտրոնի մտավորականության վրա հույս դրած ռեկտորին չի վախեցնում իր մրցակիցների ուժեղ լինելը.

«Սուպեգործարարներ են իմ մրցակիցները և նրանք շատ ուժեղ են, բայց ինձ հաճելի է մրցել հենց ուժեղների հետ, թեկուզ պայքարի մեջ պարտվել, ինչու` ոչ:

Հայաստանն էլ է փոքր պետություն, բայց մրցում է չէ՞ ուժեղ պետությունների հետ: Մեծ գործերը նաև զոհեր են պահանջում, թող ես նաև զոհ գնամ, բայց համենայնդեպս որոշակի արդյունք ես այստեղ էլ կարձանագրեմ»:

Սուպերգործարարների հետ իր ուժերը չափող ռեկտորը՝ չնայած անասելի ոգևորությանը, փաստորեն պատրաստ է նաև նահանջել.

«Առայժմ ունեմ մտադրություն և նեղ «կռուգներում» եմ քննարկել մեծամասնականով ինքնառաջադրվելուս մասին: Բայց հավանական է դնեմ և հանեմ, հավանական է դնեմ ու կեսից հետ վերցնեմ, հնարավոր է նաև չառաջադրվեմ առհասարակ»:

Հարցրինք՝ իսկ ինչի՞ց հետո է պատրաստ փոխել որոշումը, ինչը՞ կազդի ռեկտորի որոշման վրա, ասաց.

«Ձեր ճնշումը (նկատի ունի լրագրողներին), իմ տղաների ճնշումը, նրանք ինձ անընդհատ ճնշում են, որ ես հետ կանգնեմ իմ որոշումից, հիմա էլ իրենց մայրն է միացել իրենց, բայց ես շա՜տ-շա՜տ եմ ուզում պատգամավոր դառնամ»:

Փաստորեն ցանկացածի ճնշմանը չդիմացող պատգամավորության թեկնածուն հայտարարում է իր առաջադրման մասին՝ ոչ թե այն պատճառով, որ երազում է պատգամավոր դառալ, այլ որովհետև ունի այլ սպասելիքներ: Պարոն Մակիչյանը
Panorama.am-ի հետ զրույցում խոստովանեց, որ ինքնառաջադրվելու գաղափարից հրաժարվելու պարագայում կսատարի թեկնածուներից մեկին:

«Սուքիասյանի հետ ես հարաբերվում եմ, նա լավ տպավորություն է թողել ինձ վրա, նա ծանոթ է ինձ: Հաշվի առնելով ոչ թե կուսակցական, այլ անձնական մոտեցումները՝ միգուցե կսատարեմ իրեն», -ասաց ռեկտորը` անկեղծանալով, թե սպասում է, որ մրցակից թեկնածուներն իրեն կհանդիպեն և նրանցից մեկն արդեն իր մոտ «դեսպանորդ է գործուղել»:

Լոռեցուն բնորոշ միամտությամբ արած խոստովանությունից հետո պարոն Մակիչյանն շտապեց հավաստիացնել, որ թիվ 10 ընտրատարածքում առաջադրվելը պայմանավորված չէ այնտեղ առաջադրված բիզնեսմեն թեկնածուներով.

«Ասեմ, մեր տունն էդտեղ է, մեր համալսարանը նաև, ես չեմ ուզում օտար տեղ լինեմ: Մեր թաղն ա, կենտրոնը ավելի շատ մտավորականների բնակավայրն է և իմ ընտրողը հենց մտավորականն է, միգուցե նրանք իմ ձայնը լսեն: Գիտելիքի նկատմամբ հասարակաան ընկալումը հասունացնելու, կրթական համակարգը առաջ մղելու մտահոգություններն են դրդել ինձ, որպեսզի ինքնառաջադրվեմ: Ես ուզում եմ որպեսզի մենք գիտելիք արտահանենք»:

Մեր այն դիտարկմանը, թե ինչո՞ւ այդ մտահոգությունները ռեկտորը չի փորձել ասենք ՀՀԿ-ի հետ ունեցած իր լավագույն կապերի միջոցով ներկայացնել խորհրդարան, ասաց.

«Ազիզ, միջնորդավորվածն այլ է, բոլորովին այլ է, երբ դու դրա ասելու իրավունքն ունես: Իհարկե, Դուք ճիշտ եք, Շարմազանովն իմ լավագույն հայրենակիցն է, իմ լավ բարեկամը, շատ լավ հարաբերությունների մեջ եմ նաև Տարոն Մարգարյանի հետ: Բայց համամասնական ցուցակում իմ լինելը իրենք պիտի առաջարկեին: Հավանաբար վերջին շրջանում ես մի քիչ պասիվ եմ եղել, գուցե իրենց մոտ չեմ տպավորվել կամ ինձ չեն արժևորել, իմ գնահատականը չեն իմացել այնպես, ինչպես ես եմ ինձ գնահատում: Գուցե նաև ես եմ սուբյեկտիվ, չգիտեմ: Բայց ես անուղղակի կերպով ակնարկել եմ, նախագահին այս ընթացքում հանդիպել եմ և չեմ խնդրել»:

ՀՀԿ-ականների հետ փայլուն կապեր ունեցող ռեկտորը խոստովանեց, որ

«Զղջում ու ափսոսում է, որ այս ընթացքում բացահայտ չի արտահայտել իր քաղաքական դիրքորոշումը, որպեսզի անդամագրվի կուսակցության շարքերը.
Ափսոսում եմ, շատ եմ ափսոսում, դրա համար էլ, որոշել եմ մի 120 տարի ապրեմ, որ հասցնեմ, էն ժամանակ ուշ չի լինի կարծում եմ»:

Հարցրինք՝ Շուշան Պետրոսյանի քաղաքական դաշտ մտնելն է ռեկտորի մոտ ափսոսելու առիթ տվել, ասաց.

«Շուշանը փոքր է, որ ես նրանից ընդօրինակեմ, ընդհանրապես ես Շուշանին որպես լավ երգչուհի եմ ընդունում, նա ինձ համար մտավորականության ներկայացուցիչ չէ, նա շատ փոքր է, որ ես իրեն փորձեմ ընդօրինակել, կամ հետևել: Իմ առավելությունն իմ մտավորական լինելն է, իմ ոլորտւում առանձահատկություններին տիրապետելը:

Ես վստահ եմ՝ ոլորտն առաջ մղելու խնդիրներով մտահոգ, ինձ պես երկրորդը չկա, այդ հարցում ես չեմ տեսնում ինձ մրցակից, նույնսիկ ԿԳ նախարար Արմեն Աշոտյանին: Նա շատ գրագետ է, արագ աճում է, կարող ուժ է, բայց համակարգի իմացության և փորձի իմաստով հաստատ իմ փորձն ավելին է, քան իրենը»: