Ձեր վստահելի աղբյուրը

Այսօր աշխատանքային հերթական խորհրդակցության ժամանակ Երևանի քաղաքապետ Տարոն Մարգարյանին զեկուցվել է, որ նախադպրոցական ուսումնական հաստատություններ հաճախող երեխաների անվտանգությունն ապահովելու նպատակով համապատասխան կառույցների մասնագետների հետ կազմակերպվել են քննարկումներ և ներկայացվել են մի շարք առաջարկություններ:

Քաղաքապետարանի հասարակայնության հետ կապերի վարչության հաղորդմամբ, անդրադառնալով քաղաքապետարանի թեժ գծի հեռախոսահամարով ծնողների կողմից հնչած անհանգստություններին կապված դպրոցներում ավարտական միջոցառումների նպատակով դրամահավաքության հնարավոր դեպքերի մասին`քաղաքապետը հանձնարարել է հետևողական աշխատանք տանել դրանք բացառելու ուղղությամբ:

«Մեզ համար շատ կարևոր է երեխաների կրթության հարցը: Դպրոցներում դրամահավաքության կամ դրամահավաքության փորձի յուրաքանչյուր դեպք խստագույն կերպով կպատժվի և առաջին հերթին պատասխանատվություն կկրեն դպրոցների տնօրեններն ու համապատասխան անձինք»,-նշել է Տարոն Մարգարյանը:

Ըստ աղբյուրի, մայրաքաղաքի հանրակրթական դպրոցներում և նախադպրոցական ուսումնական հաստատություններում ՀՀ դրոշները նորերով փոխարինելու, ինչպես նաև անհրաժեշտության դեպքում հենասյուների տեղադրման հարցի հետ կապված` հանրակրթության վարչության պետը զեկուցել է նաև, որ դրանք ամբողջությամբ հաշվառված են և շուտով այդ աշխատանքները կմեկնարկեն: