Ձեր վստահելի աղբյուրը

ԵԱՀԿ Մինսկի խմբի համանախագահ Ռոբերտ Բրադկեն «Ազատություն» ռադիոկայանի կենտրոնական ծառայությանը տված հարցազրույցի ժամանակ խոսել է ԼՂ հակամարտության Մինսկի խմբի միջնորդական առաքելությունից, գնահատելով միջնորդների 20-ամյա գործունեության ձեռքբերումներն ու հակամարտության լուծման հեռանկարները:

Պատասխանելով հարցին, թե որոնք են եղել Մինսկի խմբի 20-ամյա միջնորդական գործունեության ձեռքբերումները, Բրադկեն ասել է. «Կարծում եմ, Մինսկի խումբն արձանագրել է երեք կարևոր ձեռքբերում: Առաջին հերթին, այն դարձել է որպես կայունության գործոն` թուլացնելով երկկողմ լարվածությունը...: Երկորդ ձեռքբերումը՝ դա կողմերի միջև հաղորդակցության ալիքի ձևավորումն է եղել: Կողմերը հնարավորություն չունեն անմիջականորեն խոսել միմյանց հետ և երբ մենք մեկնում ենք տարածաշրջան կամ հանդիպում ենք նախագահներին տարածաշրջանից դուրս, լսում ենք նրանց տեսակետներն ու փոխանցում հակառակ կողմին այնպես, որպեսզի դա օգնի հասկանալու փոխադարձ մոտեցումները: Երրորդ ձեռքբերումը, որը մեր միջնորդական լիազորության մասն է, այն է, որ այս ժամանակահատվածում մենք կարողացել ենք բանակցությունների համար անհրաժեշտ ընդհանուր հիմք ստեղծել: Վերջին 5 տարիների ընթացքում, մասնավորապես, մշակել ենք շրջանակային փաստաթուղթ, որը կոչվում է Հիմնարար սկզբունքներ: Ծանր աշխատանք է տարվել կողմերի հետ այս ուղղությամբ և մենք դեռևս հաջողություն չենք արձանագրել»:

Խոսելով Մինսկի խմբի գործունեության արդյունավետությունից, Բրադկեն ասել է. «Չեմ կարծում, թե խաղաղ համաձայնագրի ձեռքբերման մեր անկարողությունը կայանում է ԵԱՀԿ Մինսկի խմբի համանախագահների ձևաչափի մեջ: Խնդիրն այն է, որ դեռևս առկա են բարդ հարցեր: Կողմերի միջև տարաձայնությունները մեծ են և, անկեղծ ասեմ, կա վստահության պակաս: Ձևաչափի փոփոխությունը չի լուծի առկա խնդիրներից և ոչ մեկը»,-ասել է ամերիկացի համանախագահը, ընդգծելով, թե նոր ձևաչափի վերաբերյալ հեռանկարներ գծելու և գործընթացը նորից սկսելու փոխարեն անհրաժեշտ է առաջ շարժվել ընթացիկ աշխատանքի ուղղությամբ:

Բրադկեն ընդգծել է, թե հակամարտության ստատուս քվով անընդունելի է. «Մենք չենք կարող 20 տարի հետո հետ նայել և տեսնել նույն իրավիճակն, ինչ առկա է այսօր»,- ասել է Բրադկեն ու հավելել. «Կարևոր հանգամանքներից է նաև այն, որ կողմերը, հնարավոր է, այսօր ավելի մոտ են համաձայնության հասնելուն, քան պատկերացնում են: Նրանք չեն նկատում դա վստահության բացակայության պատճառով»:

Ամերիկացի համանախագահը վերջում նշել է, թե ցանկացած խաղաղ գործընթացում սկզբունքային նշանակություն ունի այն, որ կողմերը միմյանց ընդունեն որպես գործընկերներ և հստակ պատկերացնեն, որ մի կողմը չի կարող առաջընթաց արձանագրել, մինչև չօժանդակի հակառակ կողմից նույն առաջընթացին հասնելու համար: