Ձեր վստահելի աղբյուրը

Երեկ հայտնի դարձավ, որ ՀՀԿ անդամ ֆուտբոլի ֆեդերացիայի նախագահ Ռուբեն Հայրապետյանը, չնայած իր ցանկությանն ու կուսակցության որոշմանը, այդուհանդերձ առաջադրելու է իր թեկնածությունը թիվ 1 ընտրատարածքում: Ինչպես հայտնի է, ընդամենն օրեր առաջ Ռուբեն Հայրապետյանը պաշտոնապես հայտարարեց, որ ՀՀԿ-ն ընդառաջել է իր ցանկությանն ու որոշում է կայացրել ոչ մեծամասնականով և ոչ էլ համամասնականով առաջիկա խորհրդարանական ընտրություններին իր թեկնածությունը չառաջադրել: Որոշումը վերանայելու դրդապատճառների մասին Panorama.am-ը զրուցել է Ռուբեն Հայրապետյանի հետ:

Նախօրեին տեղեկություն էր տարածվել, թե Ռուբեն Հայրապետյանի առաջադրվելու որոշումը կապված է Հովիկ Աբրահամյանի` ՀՀԿ ցուցակի երկրորդ համարում լինելու հետ: Այս կապակցությամբ, Ռուբեն Հայրապետյանն ասաց. «Իրականում որոշումս վերանայելը պայմանավորված չէ ինչ-որ մեկով կամ իրավիճակով: Հայտարարությունիցս օրեր անց որոշեցի, որ ես էլ եմ առաջադրվում՝ օգտվելով իմ քաղաքացիական իրավունքից: Ոչ մի իրավիճակ չի փոխվել այս ընթացքում: Կրկնում եմ դա եղել է բացառապես իմ անձով պայմանավորված որոշում: Պարզապես ՀԱԿ-ին ծառայող որոշ լրատվամիջոցներ փորձեցին օգտվել իրավիճակից և շահարկել դա:

Նշեմ, որ ՀՀԿ-ում, ի տարբերություն ՀԱԿ-ի, որևէ կուսակցական չի տխրում ցուցակի ինչ-որ տեղի համար: Հանրապետականները միասին են, միահամուռ, և ես որպես կուսակցական, հարգում եմ մեր կուսակցության համամասնական ցուցակի առաջինից մինչև վերջին համարը զբաղեցնողներին, և պարտավոր եմ ընդունել կուսակցության ԳՄ որոշումը: Մեզ մոտ չկա նման բան, չկա որևէ խնդիր: Պարզապես ոմանք փորձում են անձնավորել իմ որոշումը՝ վերագրելով ինչ որ մեկին:

Հովիկ Աբրահամյանն իմ կուսակցական գործընկերն է և երբևէ մտքովս չի անցել մտածեմ, թե Հովիկ Աբրրահամյանը ցուցակում որ տեղն է զբաղեցնելու: Համենայն դեպս, նա որ տեղում էլ լիներ, ինձ համար շատ ավելի ընդունելի է, քան գուցե որևէ այլ մարդու: Եթե ես որևէ բան եմ ունենում ասելու, կարծիք եմ հայտնում, վստահ եղեք, որ հաստատ չեմ հայտնի մի միջավայրում, կամ մի մարդու մոտ, որ դա հետո ՀԱԿ-ին ծառայող որոշ լրատվամիջոցում հրապարակվի: Նման բան չի կարող լինել: Եվ այդ այս անսկզբունքային բամբասանքները, որ փորձում են հաճախ հասարակությանը թյուրիմացության մեջ գցել, դրանց պատճառով է, որ ապացուցելու համար որոշեցի կրկին առաջադրվել»,- հավելեց նա:

Ճշտող հարցին` սեփական ցանկության հակառակ առաջադրումը, փաստորեն, միայն լրատվամիջոցին կամ ՀԱԿ-ին ինչ որ բան ապացուցելու համա՞ր է, Ռուբեն Հայրապետյանը պատասխանեց. «Այո, ՀԱԿ-ի խայտառակ գործելաոճի՝ անհիմն ենթադրություններով մարդկանց թյուրիմացության մեջ գցելու համար»:

ՀՀԿ ցուցակում Հովիկ Աբրահամյանի տեղի մասին, ըստ Ռուբեն Հայրապետյանի, ինքը վաղուց է իմացել». «Դա ոչ թե կանխատեսելի էր, այլ ես գիտեի դրա մասին մինչև ցուցակի հրապարակման պահը և շա՜տ վաղուց: Երբ որոշ մարդիկ իմացել են Արգամիչի երկրորդ տեղում լինելու մասին ցուցակի հրապարակվելուց հետո, ես դրա մասին գիտեի առնվազն 20 օր առաջ»:

Անդրադառնալով ՀՀԿ-ական թեկնածուներին` Ռուբեն Հայրապետյանը վստահեցրեց, որ կուսակցության ցուցակում առկա մարդիկ բոլորն էլ իրեն հարազատ և ընդունելի մարդիկ են: Ինչ վերաբերում է տեղերի բաշխվածությանը, իր խոսքով` ինքն անտարբեր է. «Ես անգամ չգիտեմ թե ով որ տեղն է զբաղեցնում: Կուսակցության գործադիր մարմինը որոշել է և դա ինձ համար միանշանակ ընդունելի է»:

Ամփոփելով` Ռուբեն Հայրապետյանը նշեց, որ իր այս որոշումը վերջնական է և ինքը պատրաստ է ողջ օրը արդյունավետ աշխատել. «Որոշումն իմն է, ուստի ես պատրաստ եմ աշխատել 24 ժամ: Եթե լրագրողներն ինձ մի քիչ հանգիստ թողնեն, ես շատ ավելի օգտակար կլինեմ իմ աշխատանքում, Ֆուտբոլի զարգացմանն ավելի լավ կծառայեմ՝ քան պատկերացնում եք»:

Նախորդող նորությունները` Ռ. Հայրապետյան. Առնետները առաջինն են փախնում տախտակամածից
Ռուբեն Հայրապետյանը օրենսդիրում լինելու փոխարեն նոր բիզնեսներ կձեռնարկի