Ձեր վստահելի աղբյուրը

«Հին Էրիվան» ռեստորանային համալիրի պատին երեկ փակցված էր ռեստորանային համալիրի վաճառքի մասին պաստառ: Իսկ դա նշանակում է, որ ռեստորանի սեփականատեր ՀՀԿ-ական Մանվել Տեր-Առաքելյանն ի զորու չի եղել, ինչպես ինքն էր ասում, «հաղթել իրեն հետապնդող մի խումբ մարդկանց, որոնք ամեն գնով փորձում են տիրանալ» «ատդաչայով» աշխատող ռեստորանին:
Հիշեցնենք, որ Հյուսիսային պողոտայի վրա գտնվող ռեստորանի սեփականատերը դեռ անցած տարվանից վարկային պարտավորություները չկատարելու պատճառով դատական վեճի մեջ է «Յունիբանկի» հետ, ինչը շարունակ նորանոր դրսևորումներ է ստանում դատական տարբեր հայցերի միջոցով:

Մանվել Տեր-Առաքելյանի խոսքով սակայն իրավիճակի փրկությունը ոչ թե այն է, որ ռեստորանը վաճառի, որպեսզի մարի բանկին կուտակած պարտքերը, այլև վաճառի, որպեսզի գնի բանկի բաժնետոմսերը: «Իմ մոտ պակասում է ճիշտ այնքան գումար, որքան որ շենքիս արժեքն է, որպեսզի ես գնեմ «Յունիբանկը»,-հայտարարել է Մանվել Տեր-Առաքելյանը: Հին Էրիվանի սեփականատերը վստահ է, որ շուտով կհայտարարեն բանկի վաճառքի մասին և վստահ է, որ հենց ինքը կարող է դառնալ դրա գնորդը. «Օգտվելով առիթից ուզում եմ մի բան հայտարարել, որ մենք աշխատանքային խմբով որոշում ենք կայացրել՝ գնել Յունիբանկը»,-Panorama.am-ի հետ զրույցում հայտարարեց ռեստորանի սեփականատերը:

-Ի՞նչ է նշանակում գնել Յունիբանկը:
-Մենք շատ կոչեր արեցինք, որ Յունիբանկի գործադիր տնօրենը կամ վարչության նախագահը պետք է հրաժարական տա 6-րդ վարչություն դիմելուց հետո, քանի որ ինձ տարավ 6-րդ վարչություն, բայց… Մենք էլ վերջնական որոշում կայացրինք, որ եթե նա հրաժարական չի տալիս, ուրեմն պետք է գնել բանկը և Վարդան Աթայանին էլ հեռացնել աշխատանքից:

-Կարծում եք կարո՞ղ եք գնել բանկը, ու՞մ փոխերով:
-Եթե լավ առաջարկություն լինի, բնականաբար, կվաճառվի այդ բանկը, կօգնեն ինձ այդ հարցում, վստահ եմ:

-Դուք Ձեր խնդրի լուծումը տեսնում ե՞ք միայն այդ ճանապարհով:
-Այո, ես միայն հիմա հասկացա, որ խնդիրի լուծումը կայանում է նրանում, որ պետք է ընդհանուր փաթեթը գնել և Վարդան Աթայանին դուրս հրավիրել այդ բանկի շենքից ու զրկել լծակներից:

-Եվ Դուք դա իրատեսակա՞ն եք համարում: Ովքե՞ր են Ձեզ օգնողները:
-Ինձ օգնելու ոչ խնդիր չկա: Այդ ռեսուրսները մենք ունենք: Մենք ասելով նկատի ունեմ ինձ՝ իմ գործընկերների հետ միասին: Բնականաբար, ես այդ ամեն իմ ուսերի վրա միայնակ տանել չեմ կարող: Դրսից ունեմ շատ լավ գործընկերներ, որոնք որ ազգությամբ հայ են, բայց ապրում, գործում են արտասահմանում: Մենք քննարկել ենք և գտնում ենք, որ իրավիճակից ելնելու համար պետք է բանկը գնենք: Մոտակա ժամանակներս պատաստվում ենք այդ առաջարկն անել պաշտոնապես:

-Այնուամենայնիվ, բանկի հետ կապված Ձեր գործերն ի՞նչ փուլում են:
-Բանկի հետ կապված իրենք մտել են դատարան սնանկության հայցով, և սնանկ է փաստորեն «Հին Էրիվան» հոլիդինգը, այսինքն մի կազմակերպություն, որը համարվում է հաջողակ, որտեղ այսօր ցանկացած զբոսաշրջիկ մտնում է և շարունակում է իր զբոսանքը: Գիտեք, ցանկացած մարդ, ով պետական այցով գալիս է Հայաստան, առաջինը մտնում է «Հին Էրիվան», այսօր այդ կազմակերպությանը ճանաչում են սնա՞նկ:
Ոչ, իրականում մեխանիկորեն տանում են սնանկության, որպեսզի տիրանան շենքին, մեզ հետապնդում են, ու դա ընդամենը մի քանի հոգանոց խումբ է: Ես ուզում եմ հայտարարել, որ դա իրենց չի հաջողվելու, որովհետև սնանկության ոչ մի նշույլ առիթ չկա անգամ: Իմ բիզնեսը հաջողակ բիզնես է և ես իմաստով ուզում եմ հայտարարել, որ շինծու գործեր են ստեղծել: 8 դատական հայցն են հիմա իմ դեմ ստեղծել՝ դռնապահիս դեմ, մենեջերիս դեմ, խոհարարի դեմ են հայց ստեղծել: Եվ ուզում են շինծու միտումնավոր մարդու ներվային համակարգի վրա ազդելով շենքից մեզ վտարեն:

-Դրական տեղաշարժ չե՞ն եղել Ձեր հարցազրույցներից ու հրավիրած միտինգներից հետո, պարոն Տեր Առաքելյան:
-Ոչ: Հոկտմեբերի 29-ին մենք բանկի դիմաց 100 հոգով միտինգ արեցինք՝ սահմանադրության համաձայն, և ես հայտարարեցի, որ ես պատրաստ եմ բանկային մեկ օրվա ընթացքում գումարն ամբողջությամբ մուծել: Եվ այսօր էլ հայտարարում եմ, որ պատրաստ եմ գումարը մուծել, իրենք չեն գալիս ինձ հետ բանակցելու, քանի որ պարզ է՝ գումարը պետք չէ իրենց, շինծու է ստեղծված այս ամբողջ իրավիճակը, քանզի իրենց ցնակությունը շենքին տիրանալն է: Դրա համար էլ հայտարարում եմ, ես ի վիճակի եմ ու կգնեմ «Յունիբանկը», դա է խնդրի միակ լուծումը:

Նախորդող նորությունը` «Հին Էրիվանը» որպես ՀՀԿ շտա՞բ. հարցազրույց ՀՀԿ-ական Մանվել Տեր-Առաքելյանի հետ