Ձեր վստահելի աղբյուրը

Լարիսա Ալավերդյանի` Ժառանգության ցուցակում  41-րդ՝ ոչ անցողիկ տեղը զբաղեցնելու մասին տեղեկատվության հրապարակումից հետո վերջինս  միանգամից մի քանի հետաքրքիր առաջարկ է ստացել: «Ժառանգության» ցուցակով խորհրդարան չգնալու համար փորձառու պատգամավորն այնքան էլ չի տխրել. «Չեմ տխրել, քանի  որ ԱԺ ամբիոնը փոխել եմ մեկ այլ ամբիոնի հետ...կփոխվի  նաև շրջապատս»:

ԱԺ պատգամավոր Լարիսա Ալավերդյանը հաստատեց մեր ունեցած տեղեկությունն այն մասին, որ նախկին վարչապետ,  Հայ-Ռուսական (Սլավոնական) Համալսարանի ռեկտոր  Արմեն Դարբինյանից վերոնշյալ  համալսարանում աշխատելու առաջարկ է ստացել:

«Ես, իհարկե, համաձայնությունս տվել եմ, մեծ պատիվ եմ համարում Արմեն Դարբինյանի հրավերը: Վերջապես ես կփոխեմ շրջապատս»,- Panorama.am-ի հետ զրույցում ասաց Լարիսա Ալավերդյանը և ավելացրեց,- «ամբիոնը կոչվում է մարդու իրավունքների պաշտպանության ամբիոն: Միակ բուհն է, որն ունենալու է մարդու իրավունքների ամբիոն: Դա Հայաստանում առաջինն է լինելու ... ես սիրում եմ նոր ճանապարհներ, նոր դռներ բացել»:

Լարիսա Ալավերդյանը հաստատեց նաև, որ աշխատանքի առաջարկներ է ստացել այն բանից հետո, երբ պարզվել է, որ խորհրդարան գնալու շանսեր չունի:

«Այո, առաջարկներ ստացել եմ ցուցակի հրապարակումից կարելի է ասել, անմիջապես հետո՝ ժամեր էլ չի անցել: Բայց հիմա չէի ուզենա «կոնկուրսի» առումով այդ մասին խոսել: Եղել են, համենայնդեպս, առաջարկություններ, որոնք ինձ համար վերին աստիճանի նախընտրելի են»:

Հիասթափությունների պատճառո՞վ է ընդունել համալսարանում աշխատելու առաջարկը հարցին` տիկին Ալավերդյանն այսպես արձագանքեց.

«Ոչ, ես ոչ թե հիասթափություններ, այլ լիարժեք կամք ունեմ շարունակելու ակտիվությունս այն դաշտում, որտեղ,  որ մշակույթը ավելի բարձր է և որտեղ ես խնդիրներ եմ դրել, հասել եմ և ուզում եմ լուծել»:

«Ժառանգության» ցուցակի և առհասարակ ՀՀՇ-ական թիմի հետ կուսակցության մերձեցման պատճառով դժգոհություններ ունենալու վերաբերյալ ժառանգության խմբակցության քարտուղար Լարիսա Ալավերդյանն ասաց, թե ինքն իր դիրքորոշումն սկզբանե անկեղծորեն հայտնել է. «Ես շատ պարզ եմ արտահայտվել, ես դա ասել եմ ի սկզբանե: Իմ խնդիրը հետևյալն էր. ես ասել եմ՝ այս անգամ ևս «Ժառանգությունը» պետք է գնա խորհրդարան միայն քաղաքացիական հասարակության ներկայացուցիչների հետ, մինչև անգամ կուսակցությունների առումով: Ասել են՝  իսկ օրինակ ու՞մ հետ: Ես ասել եմ, որ տվյալ դեպքում պետք է գնալ քաղաքացիական հասարակության հետ, որովհետև դա է ծրագրային կետը»:

Հետաքրքրվեցինք, թե արդյո՞ք հասարակական և խորհրդարանական ակտիվ գործունեություն ծավալած կինը չի փոշմանի հետագայում առաջարկների մեջ համալսարանական աշխատանքը նախընտրելու համար, ասաց.

«Ոչ ընդհանրապես ես չունեմ ափսոսելու առիթ, որ խորհրդարանական գործունեություն այլևս չեմ ծավալի: Ես երբեք չեմ ափսոսում ոչ արածիս համար և ոչ էլ այն բանի, որ փոխում եմ ընտրությունս: Իսկ տվյալ դեպքում գերադասում եմ դրական լիցքերը՝ միջավայրի առումով: Կշարունակեմ ակտիվությունս հասարակական նախաձեռնություններում, համագործակցությունս ՊՆ-ի հետ: Չեմ կարծում, որ ՊՆ-ն համագործակցում էր, որովհետև ես պատգամավոր էի: «Ընդեմ իրավաբանական կամայականության» ՀԿ-ն հետևողական զբաղվել է պատանդների, զինգերիների և անհայտ կորածների հարցով: Այնպես որ`  ինձ, որպես այդ ՀԿ-ի տնօրենի, չեմ կարծում, թե այլևս չեն ընդգրկի հետագա աշխատանքներում»:

Ամփոփելով զրույցը՝ Լարիսա Ալավերդյանը հույս հայտնեց, որ 5-րդ գումարման ԱԺ-ում ևս կլինեն իր պես ակտիվ և նախաձեռնող կին գործիչներ, մանավանդ, որ նրանց թիվն այս անգամ էականորեն մեծ է.

«Խորհրդարանում միշտ կարիք կա ակտիվության, մանավանդ, երբ նա դրսևորում է նպատակադրում և սկզբունքներ քաղաքականության մեջ: Հուսանք, որ անպայման կլինեն այդպիսի կանայք, եթե այս մեկում չլինի, մյուս խմբակցությունում կլինի հաստատ»: