Ձեր վստահելի աղբյուրը

«Մարդը ինքը դժգոհ է, որ կուսակցության համամասնական ցուցակում 36-րդ տեղում է հայտնվել, նա դեռ կուսակցությունից դուրս չի եկել, որքան գիտեմ, պարզապես ինչպես ինքն է ասել, վիրավորվել է իր համարից», -Panorama.am-ի թղթակցի հետ զրույցում հայտարարեց «Օրինաց երկիր» կուսակցության փոխնախագահ Հեղինե Բիշարյանը` մեկնաբանելով ՕԵԿ մամլո խոսնակ Սուսաննա Աբրահամյանի` խոսնակի պաշտոնից ազատվելը և ՕԵԿ-ից դուրս գալու մտադրությունը:

Բիշարյանի հավաստմամբ, ՕԵԿ-ից ուրիշ նեղացածներ չկան, և «Սուսաննան էլ չպետք է այդպես վարվեր»:

Երևանի Շենգավիթ և Էրեբունի վարչական շրջաններն ընդգրկող թիվ 12 ընտրատարածքում «Օրինաց երկիր» կուսակցությունն առաջադրել է Ռուբեն Մասումյանի, որը հայտնի է Բենզին Ռուբո մականունով, թեկնածությունը: Վերջինի եղբայրը` Ռաֆայել Մասումյանը կալանավորված է ու ՊԵԿ նախագահ Գագիկ Խաչատրյանի դեմ մահափորձ իրականացնելու համար դատապարտվել է 11 տարի ազատազրկման: Կենտրոն և Նորք Մարաշ վարչական շրջանների ընդհանուր իրավասության դատարանը նախորդ տարվա հոկտեմբերի 14-ին ապացուցված էր համարել ազատամարտիկներից կազմված խմբի, որի մեջ է նաև Ռաֆայել Մասումյանը, կողմից Գագիկ Խաչատրյանի (2009թ. մայիսի 23-ի) և մի քանի անձանց նկատմամբ մահափորձեր իրականացնելու մեղադրանքը: Իսկ այս տարի փետրվարի 9-ին Քրեական գործերով Վերաքննիչ դատարանը դա հաստատեց: Դրանից հետո Բենզին Ռուբոն դուրս եկավ ԲՀԿ շարքերից:

Հաշվի առնելով այս հանգամանքները, Բիշարյանից հետաքրքրվեցինք ինչո՞վ է պայմանավորված այս ընտրատարածքում Բենզին Ռուբոյի առաջադրումը, նա պատասխանեց. «Ման եկեք բոլոր թեկնածուներին, գտեք հնարավոր բոլոր խնդիրները և դրեք մեկ հարթակի վրա, հետո հարցրեք»:

Երևանի Շենգավիթ և Էրեբունի վարչական շրջանների մյուս մասն ընդգրկող թիվ 11 ընտրատարածքում ՕԵԿ-ն առաջադրել էր ու պաշտպանում էր Տրանսպորտի և կապի նախկին նախարար Էդուարդ Մադաթյանի (Խուճուճ Էդո) թեկնածությունը: Սակայն պարզվեց, որ նա վերջին հինգ տարում Հայաստանում մշտապես չի բնակվել և ոստիկանության անձնագրային ու վիզաների վարչությունը մերժեց բնակության վայրի տեղեկանք տրամադրել: Բիշարյանից հետաքրքրվեցինք, ՕԵԿ-ում տեղյակ չէ՞ին, որ Մադաթյանը Հայաստանից բացակա է եղել երկար ժամանակով, ՕԵԿ փոխնախագահը պատասխանեց կարճ. «Ոչ, տեղյակ չենք եղել»:

Երբ հայտարարվեց, որ Խուճուճ Էդոյի թեկնածությունն անհնար է գրանցել նույն տեղեկանքի պատճառով, այս ընտրատարածքում վերջին պահին առաջադրման փաստաթղթեր ներկայացրեց ՕԵԿ փոխնախագահ, ԱԺ պատգամավոր Հեղինե Բիշարյանը:
Տիկին Բիշարյանը մի անգամ արդեն իր բախտը փորձել է այս ընտրատարածքում, սակայն`ապարդյուն. 2007-ի խորհրդարանական ընտրություններում թիվ 11-ում Բիշարյանը պարտվեց իր հակառակորդ Գրիգորի Մարգարյանին (Բելաջիոյի Գրիշ), որին պաշտպանում էր Հանրապետական կուսակցությունը:

Այս անգամ, Բիշարյանն այս ընտրատարածքից իր` պատգամավոր ընտրվելու հավանականությունը 100 տոկոս է համարում, քանի որ ունի բարեկամներ, հարազատներ, որոնք կընտրեն իրեն:

«Ես թիվ 11-ում ծնվել, մեծացել, ապրել եմ, դպրոց եմ գնացել, այնտեղ իմ հայրական ընտանիքն է, հարազատ ու բարեկամներիս ընտանիքներն են, որտեղ ես 2007-ին նույնպես առաջադրվել էի, բայց ինչ-ինչ պատճառներով իմ հաղթանակը հնարավոր չեղավ, բայց այս անգամ վճռական եմ ու վստահ եմ, որ այս անգամ ես եմ հաղթելու», -Panorama.am-ի հետ զրույցում ասաց նա:

Նախընտրական քարոզարշավի ժամանակ, որը մեկնարկելու է ապրիլի 8-ից, Բիշարյանը կմասնակցի և ընդհանուր կուսակցության, և մեծամասնականով իր քարոզարշավին: «Հստակ պատկերացնում եմ, որպես փոխնախագահ իմ պարտականությունները, իմ գործառույթները, կազմակերպչական որևէ խնդիր չունեմ, թե ընտրարաշավին մասնակցելու, թե մեծամասնականով իմ աշխատանքները կատարելու փորձը մեծ է: Ես հստակ պատկերացնում եմ իմ անելիքը», -ասաց նա:

Թիվ 12 ընտրատարածքում առաջադրվել են «Ժառանգություն»-ից Անահիտ Բախշյանը, «Բարգավաճ Հայաստան»-ից` Լյովա Խաչատրյանը, Ռուբեն Մասումյանը, ՀՅԴ-ից` Կառլեն Գևորգյանը, իսկ Հայ Ազգային կոնգրեսն էլ այստեղ կպաշտպանի Լևոն Տեր-Պետրոսյանի եղբոր որդու` Տիգրան Տեր-Պետրոսյանի թեկնածությունը:

Թիվ 11 ընտրատարածքում առաջադրվել են երեք անկուսակցականներ. Նրանցից երկուսին ոչ մի կուսակցություն չի առաջադրել` Մանվել Եղիազարյանը, Կարեն Սմբատյանը, իսկ անկուսակցական Գրիգոր Մարգարյանին (Բելաջիոյի Գրիշ) թիվ 11-ում այս անգամ կպաշտպանի ԲՀԿ-ն, ՕԵԿ-ից Հեղինե Բիշարյանն է, իսկ ՀԱԿ-ը կպաշտպանի Արշակ Բանուչյանին: