Ձեր վստահելի աղբյուրը

Արժույթի միջազգային հիմնադրամի (ԱՄՀ) առաքելությունը` Մարկ Հորթոնի գլխավորությամբ, մարտի 14-27-ը այցելել է Երևան` «Երկարաձգվող ֆինանսավորման» (EFF) և «Երկարաձգվող վարկավորման» (ECF) ծրագրերի չորրորդ ամփոփիչ ստուգման շուրջ քննարկումներ ծավալելու նպատակով:

Այցի եզրափակման հետ կապված այսօր լրագրողների հետ հանդիպեցին Մարկ Հորթոնը և Հայաստանում Արժույթի միջազգային հիմնադրամի մշտական ներկայացուցիչ Գիլյերմո Տոլոսան: Վերջինս ասուլիսը սկսեց հայերենով և բավականին վարժ ընթերցեց ԱՄՀ առաքելության Հայաստան կատարած այցի եզրափակման հայտարարությունը:

Ըստ հայտարարության` չնայած պակաս սատարող արտաքին միջավայրին` ընդհանուր մակրոտնտեսական պայմանները Հայաստանում շարունակել են բարելավվել: Ենթադրվում է, որ 2011թ-ին տնտեսությունն աճել է 4.4%-ով` պայմանավորված արդյունաբերության և ծառայությունների ոլորտների աճով: Բացի այդ, նախորդ տարվա նույն ժամանակահատվածի համեմատ զգալի չափավորվել է գնաճը` փետրվարին կազմելով 4%-ից ցածր, ինչին օժանդակել է կայուն դրամավարկային միջավայրը: Հարկաբյուջետային ճշգրտումը շարունակելու, ինչպես նաև արտահանման և դրամական փոխանցումների զգալի աճի շնորհիվ, զսպվել են արտաքին անհավասարակշռությունները, սակայն արտաքին ընթացիկ հաշվի պակասուրդը համեմատաբար մեծ է, իսկ խոցելիությունների կրճատման համար պահանջում է լրացուցիչ ճշգրտում:

Նշվեց նաև, որ 2011թ-ի երկրորդ կիսամյակում քաղաքականության իրականացումը եղել է ծրագրին համահունչ, ընդ որում`2011թ-ի վերջի դրությամբ ապահովվել են բոլոր քանակական կատարողական չափանիշները: Հարկաբյուջետային իրավիճակը զգալի ամրապնդվել է. ընդհանուր պակասուրդը 2011թ-ին զգալի նվազել է 2010-ի արձանագրված շուրջ 5 տոկոսից:

Իր հերթին Մարկ Հորթոնը ավելացրեց, որ թույլ արտաքին միջավայրի ֆոնի վրա, աճի կանխատեսումը, 2012-ին իջեցվել է մինչև 3.8%, ընդ որում ռիսկերը շեղված են դեպի նվազում: Միջազգային գների նկատմամբ հետագա ճնշումների բացակայության սպասումների լույսի ներքո ակնկալվում է, որ գնաճը կպահպանվի Կնետրոնական բանկի նպատակադրած ցուցանիշի շուրջը: Ըստ նրա` միջնաժամկետում հարկաբյուջետային կոնսոդիլացումը շարունակելու, իշխանությունների կողմից արտահանման աճի և գործարար միջավայրի այլ բարելավումների վրա ողջունելի կենտրոնացման, զգալի դրամական փոխանցումների և փոխարժեքի ճկունության պայմաններում ակնկալվում է, որ ընթացիկ հաշվի պակասուրդը կշարունակի նվազել:

«Առաքելությունն իշխանությունների հետ համաձայնություններ է ձեռք բերել 2012թ-ի քաղաքականության կառուցվածքի վերաբերյալ, որը կարող է հիմք հանդիսանալ եռամյա «Երկարաձգվող ֆինանսավորման» (EFF) և «Երկարաձգվող վարկավորման» (ECF) ծրագրերի չորրորդ ամփոփիչ ստուգումն ավարտելու համար: Ըստ նախնական ժամանակացույցի նախատեսում է, որ ԱՄՀ գործադիր խորհուրդը այս տարվա մայիսին քննության կառնի ստուգումն ավարտելու հարցը: Հաստատման դեպքում ԱՄՀ-ն կտրամադրի վարկի` 56 մլն ԱՄՆ դոլար գումարով չորրորդ չափաբաժինը` ծրագրի շրջանակում տրամադրված գումարը հասցնելով շուրջ 279 մլն դոլարի», -ասաց Մարկ Հորթոնը: