Ձեր վստահելի աղբյուրը

Բելառուսում արտադրված «Ստեկլովիդնոյե տելո» դեղի մաքսային ձևակերպումների վերաբերյալ տեղեկություններ մաքսային ձևակերպումների ավտոմատացված համակարգում չեն հայտնաբերվել: Այս մասին Panorama.am-ին հայտնեցին Պետական եկամուտների կոմիտեի տեղեկատվության և հասարակայնության հետ կապերի բաժնից:

Հիշեցնենք, որ օրեր առաջ ՀՀ դեղարտադրողների ու ներմուծողների (ԴԱՆ) միության տնօրեն Սամվել Զաքարյանը լրագրողների հետ հանդիպմանը հայտարարել էր, որ հայաստանյան շուկայում հայտնաբերվել են կեղծ դեղեր՝ այդ թվում «Ստեկլովիդնոյե տելո» դեղամիջոցը, որն արտադրվում է Բելառուսում` Ադրբեջանի համար: Այն Հայաստանում վաճառվում է ադրբեջաներեն գրությամբ ներդիրով:

ՊԵԿ-ից Panorama.am-ը հետաքրքրվել էր, թե որ երկրից, ինչ ընկերության կողմից, երբվանից ու ինչ խմբաքանակով է ներկրվել տվյալ դեղամիջոցը: Փաստորեն ՊԵԿ-ը նման տվյալների չի տիրապետում, սակայն վստահեցնում է, որ արբեջանական ծագման ապրանքների մաքսային ձևակերպումներ ՀՀ-ում չեն իրականացվել, «չնայած, որ ՀՀ գործող օրենսդրության համապատասխան որևէ սահմանափակում չկա ադրբեջանական ծագման ապրանքների ՀՀ-ում մաքսային ձևակերպումների համար»:

«Ձեր կողմից նշված դեպքի վերաբերյալ ՀՀ մաքսային մարմիններին ավելի հստակ տեղեկությունների տրամադրման դեպքում, մեր կողմից քննության կառնվեն ներկայացված փաստերը և սահմանված կարգով կիրականացվեն համապատասխան միջոցառումներ մաքսային կանոնների խախտման դեպքերի հայտնաբերման նպատակով, իսկ դրանց առկայության դեպքում կիրականացվեն մաքսային մարմինների իրավասության մեջ գտնվող լրացուցիչ այլ միջոցառումներ նման դեպքերի կանխարգելման ուղղությամբ»,-խոստանում են կոմիտեից:

Կարծում ենք՝ այստեղ անելիք ունեն և Առողջապահության նախարարությունը, և հիշյալ միությունը, որը հայտնաբերել է կեղծ դեղեր շուկայում:

Պետական եկամուտների կոմիտեից բացատրում են. «Համաձայն միջազգայնորեն ընդունված կարգի, ապրանքների և մասնավորապես դեղերի հայտարարագրումն իրականացվում է ըստ դրանց միջազգայնորեն կիրառվող ծածկագրերի և ընդհանրական նկարագրերի:

Նշենք նաև, որ մեկ խմբաքանակով ՀՀ ներմուծվող տարբեր երկրների արտադրության բազմանուն դեղերի հայտարարագրման ժամանակ դրանք խմբավորվում են ըստ ծագման երկրի և ըստ ԱՏԳ ԱԱ ծածկագրի` հայտարարագրման պարզեցման և ժամկետների կրճատման, ինչպես նաև հայտարարատուներին ավելորդ վարչարարական բարդություններից ձերբազատելու նպատակով և այս պարագայում, տեղեկատվական բազաներում բոլոր ապրանքների իրենց բոլոր տվյալներով (օրինակ` ապրանքների շատ մեծ քանակության առևտրական անվանումների, դեղաչափերի, ներդիրի գրառումների) ընդգրկումը անհնար է, հետևապես, շատ անգամ ոչ դյուրին է դառնում կոնկրետ անվանումով դեղի ՀՀ տեղափոխման վերաբերյալ հստակ տեղեկությունների հայտնաբերումը տեղեկատվական բազաներում»:

ՊԵԿ-ից նաև տեղեկացրեցին, որ ՀՀ կառավարության 20 սեպտեմբերի 2000 թվականի N 581 որոշման պահանջներին համապատասխան` Հայաստանի Հանրապետություն դեղերը և (կամ) դեղանյութերը կարող են ներմուծվել Հայաստանի Հանրապետության առողջապահության նախարարության կողմից տրված ներմուծման հավաստագրի հիման վրա, որը տրվում է փաստաթղթային և (կամ) լաբորատոր փորձաքննությունների հիման վրա:
ՀՀ կառավարության վերոհիշյալ որոշմամբ սահմանված փորձաքննության գործընթացում ներարառված է նաև ներմուծվող դեղի և Հայաստանի Հանրապետությունում գրանցված դեղի ներդիր թերթիկների միջև բովանդակային կամ լեզվական տարբերությունների հայտնաբերումը, ինչը ներառված չէ մաքսային մարմինների գործառույթներում:
«Վերոհիշյալ պահանջները չեն վերաբերվում Հայաստանի Հանրապետություն ներմուծվող և Հայաստանի Հանրապետությունից արտահանվող այն դեղերի և դեղանյութերի վրա, որոնք նախատեսված են արտասահման մեկնող կամ արտասահմանից ժամանող անձի բուժման կուրսի կամ անձնական օգտագործման համար և չեն գերազանցում «10 անվանում, յուրաքանչյուրից` երեքական սպառողական փաթեթ» քանակը, եթե փաստաթղթերով հիմնավորված չէ բուժման կուրսի համար անհրաժեշտ ավելի մեծ քանակը»,-ասված է ՊԵԿ պատասխանում:

Շուկայում կեղծ դեղերի շրջանառության վերաբերյալ Panorama.am-ը մեկնաբանություն ու պարզաբանում է խնդրել նաև առողջապահության նախարարությունից: Այդ գերատեսչությունից խոստացել են պարզաբանում տալ այսօր: