Ձեր վստահելի աղբյուրը

Օրերս Վարդան Օսկանյանն իրեն բնորոշ ոճով` անորոշ, մշուշոտ ու երկիմաստ արտահայտություններով, հակասական դատողություններով լեցուն հարցազրույց է տվել «Ազատություն» ռադիոկայանին, որի ունկնդրումից կարելի է ենթադրել, որ նախկին արտգործնախարարը հարվածում է իրեն գրկաբաց ընդունած կուսակցությանը` «Բարգավաճ Հայաստան»-ին: Այս հետևությանը կարելի է գալ ընդամենը մի քանի ցիտատներ նշելով ու դրանք առկա իրականության հետ համեմատելով:

«Ճիշտ է` «Բարգավաճ Հայաստան» կուսակցությունը, որին ես անդամակցել եմ, դեռևս համարվում է կոալիցիայի անդամ, բայց եկեք անկեղծ լինենք, այդ կոալիցիան ձևական կոալիցիա է եղել, որովհետև իշխող կուսակցությունը բացարձակ մեծամասնություն է ունեցել և, փաստորեն, այս 4-5 տարիների ընթացքում արել է այն, ինչ ցանկացել է և երբեք իր գործընկերոջ` «Բարգավաճ Հայաստան»-ի կամ նույնիսկ ՕԵԿ-ի ձայների կարիքը խորհրդարանում չի զգացել»,- հայտարարել է Վարդան Օսկանյանը:

Նախկին արտգործնախարարն, ըստ էության, կասկածի տակ է դնում ԲՀԿ լիդերների ու անդամների ողջամտությունն ու քաղաքական կամքը, քանի որ, ըստ նրա` վերջիններս համաձայնել են կոալիցիա ստեղծել՝ առանց «հասկանալու», որ այն ձևական է, ու իրենք ոչ մի դերակատարում չեն ունենալու: Ինչո՞ւ է պարոն Օսկանյանը կասկածի տակ դնում ՀՀԿ-ԲՀԿ քաղաքական համագործակցության արդեն մեծ փորձը: Ի՞նչ է, չի՞ հասկանում, որ իր հայտարարությամբ տպավորություն է ստեղծում, թե ԲՀԿ-ն 4-5 տարի շարունակ ինքնախաբեությամբ է զբաղվել ու նաև՝ խաբել իր ընտրողներին:

Ասել, թե Վարդան Օսկանյանը նոր մարդ է քաղաքականության մեջ, կոփված չէ և դրանով է բացատրվում ասվածը, թերևս չի կարելի: Նա չի կարող չհասկանալ, որ ԲՀԿ քաղաքական կամք է ունեցել պատասխանատվություն վերցնելու, ինչն ի դեպ ֆիքսված է համապատասխան փաստաթղթերում: Թե՞ դրանք էլ են ձևական եղել՝ պրն Օսկանյան:
Կամ ի՞նչ է նշանակում «ձայների կարիքը խորհրդարանում չի զգացել»: Պարոն Օսկանյան, Դուք ուսումնասիրե՞լ եք արդյոք ԱԺ ԲՀԿ խմբակցության քվեարկությունների վիճակագրությունը, ուսումնասիրե՞լ եք ԲՀԿ-ական գործիչների խորհրդարանական գործունեության ողջ սպեկտրը: Արդյոք այդ ուսումնասիրությունների երևում է արդյոք, որ կոալիցիան ձևական է եղել:

«Այսօր ՀՀԿ-ն բացարձակ գերիշխող դիրք ունի և պատասխանատվությունը ամբողջությամբ այդ կուսակցության վրա է»,- հայտարարել է Վարդան Օսկանյանն ու ընդգծում. «Ես կարծում եմ, որ այս չորս տարիներին կառավարությունը սխալ ճանապարհով է տարել երկիրը»: Քաղաքական պատասխանատվության հարցում նախկին արտգործնախարարի անձնական ընկալումներն, իհարկե, առանձին խոսակցության թեմա են: Բայց, այնուամենայնիվ երբ նման հայտարարություն է արվում, արդյոք կարելի է ենթադրել, որ գնահատականը հիմնված է նաև կառավարության ԲՀԿ-ական անդամների գործունեության արդյունքների վրա ու նաև դա է հուշում, թե իբր, կոալիցիան ձևական է եղել:

Վարդան Օսկանյանի պատկերացմամբ, հավանաբար, «ձևական» կոալիցայի ծրագրում առկա առանձին դրույթներ ԲՀԿ նախընտրական ծրագրից վերցվել ու կառավարության ծրագիր մտցվել են «մի ուժի պարտադրանքով» ու հենց այդ ուժն էլ «առանց գործընկերոջ կարծիքը հարցնելու» նախարարական պորտֆելներ է առանձնացրել ԲՀԿ-ի համար և վստահեցրել, որ որևէ գործունեության համար պատասխանատվություն սահմանված չէ:

Կամ, եթե համարենք, որ կոալիցիան ձևական է եղել, ապա, ըստ Օսկանյանի, ինչո՞ւ է ԲՀԿ-ն տարիներ շարունակ մաս կազմել դրան: Նախկին արտգործնախարարի պատասխանն այս հարցին առավել քան ուշագրավ է. «Ես չեմ ուզենա մեկնաբանել մի բան, որին մասնակցություն չեմ ունեցել»: Նրա կարծիքով, գալիք խորհրդարանական ընտրությունները նոր որակի խորհրդարան ունենալու հնարավորություն են, որի արդյունքում հնարավոր կլինի «արդեն իսկական կոալիցիաներ կազմել, մեկից ավել ուժեր երկրի ապագայի նկատմամբ պատասխանատվություն կվերցնեն, որոշումները կլինեն կոնսենսուսային, մի կուսակցության կարծիքը չի պարտադրվի»: Այս վերջինն, ըստ ամենայնի, առկա իրավիճակի ախտորոշումն է: Եթե այդպես է, կնշանակի պարոն Օսկանյանը բավականին անմեղ ձևով թերագնահատում է իր իսկ կուսակցությանը` տպավորություն ստեղծելով, որ այն կոալիցիայի մեջ է պարտադրանքի արդյունքում, իսկ որոշումներն էլ նրա հետ չեն համաձայնեցվում:

ԲՀԿ պատասխանատուները մտածե՞լ են արդյոք, որ անզգույշ այս արտահայտություններով պարոն Օսկանյանը հարցականի տակ է դնում իրենց քաղաքական գործունեության, գործողությունների ու որոշումների ադեկվատությունը, դրանց մտածված ու պատասխանատու լինելու հանգամանքը: Եթե մտածել են, երևի թե, ճիշտ կլինի նաև բարձրաձայնել այդ մասին: Հակառակ դեպքում` նախընտրական քարոզչության շրջան է սկսվում և հնարավոր է վարդան Օսկանյանի հրապարակային այս հայտարարություններն օգտագործվեն հենց ԲՀԿ-ի դեմ:

Հ.Գ. Հարկ է նատել, որ ԲՀԿ-ից արձագանք հետևել է: Վարդան Վարդանյանը, ով գլխավորում է կուսակցության նախընտրական շտաբը, մեկնաբանելով վերը ներկայացվածը, զարմացել էր. «Ի՞նչ ձևական` կոալիցիայի հետ կապված ոչ մի խնդիր չի եղել»: Բայց ինչպես Վարդան Օսկանյանի, այնպես էլ Վարդան Վարդանյանի կարծիքներն անձնական են և չեն արտացոլում կուսակցության պաշտոնական մոտեցումը:



Նախորդիվ` Վ.Վարդանյան. «Իհարկե ոչ, ի՞նչ ձևական` կոալիցիայի հետ կապված ոչ մի խնդիր չի եղել»

Զոհրաբյանը Օսկանյանի մեկնաբանության մասին. «Ոչնչից տեղյակ չեմ»