Ձեր վստահելի աղբյուրը

Բաքվում կայացած «Եվրանեսթ»-ի լիագումար նիստի, հայկական պատվիրակության լիագումար նիստի մասնակցության և Ադրբեջանի նախագահի հնչեցրած ելույթի առնչությամբ Panorama.am-ը զրուցեց ԱԺ նախագահ Սամվել Նիկոյանի հետ:

-Պարոն Նիկոյան, մինչ պատվիրակության Բաքու մեկնելը խոսակցություններ կային, որ, այնուամենայնիվ, հայկական կողմը չի մեկնի Բաքու: Ինչո՞ւ, ի վերջո որոշվեց, որ հայկական կողմը պետք է մասնակցի լիագումար նիստի աշխատանքներին:
-Մինչ պատվիրակության Բաքու մեկնելը, ես՝ որպես ԱԺ նախագահ, երկու անգամ այդ առնչությամբ խորհրդակցություն եմ հրավիրել, որին մասնակցել են խորհրդարանական բոլոր խմբակցությունների ղեկավարները: Ընդհանուր քննարկումների արդյունքում որոշեցվեց, որ Բաքու մեկնելը ճիշտ է: Ավելին՝ որոշվեց, որ պատվիրակությունը Բաքու կմեկնի ամբողջական կազմով ու առավել ակտիվությամբ կներգրավվի «Եվրանեսթ»-ի աշխատանքներում:

-«Եվրանեսթ»-ի ԽՎ-ի լիագումար նիստում Ադրբեջանի նախագահը Հայաստանի և առհասարակ, հայերի հասցեին հանդես եկավ բավականին կոշտ որակումներով: Արդյո՞ք հայկական կողմի համար նման ելույթը սպասելի էր:
-Այն, որ ադրբեջանական կողմը հաճախ է հանդես գալիս նման հայտարարություններով որևէ մեկի համար անսովոր չէր: Իսկապես, մենք սպասում էինք, որ նմանատիպ ելույթներ կհնչեին, սակայն, անկեղծ ասած չէինք սպասում, որ դա անձամբ կանի այդ երկրի նախագահը:

Ակնհայտ է, որ Ադրբեջանի նախագահն իր այդ ելույթով ոչ միայն վարկաբեկեց իր անձն, այլ նաև իր երկիրը: Մեր եվրոպացի գործընկերները ևս մեկ անգամ համոզվեցին, որ Ադրբեջանում ամենաբարձր մակարդակով այլատյացություն է քարոզվում, իսկ այդ երկրի ղեկավարի մոտ բացակայում է բարձրաստիճան պաշտոնյային հատուկ վարվելակերպը:

Ես համոզված եմ, որ Ադրբեջանում ևս նախագահ Ալիևի վարքագիծը միանշանակ չի ընդունվում ու հասարակությունը գիտակցում է, որ այդ մարդն ուղղակի վարկաբեկում է իրենց պետությունը:

Ադրբեջանում արդեն գիտակցում են, որ երկրի նախագահն օգտագործելով իր երկրի նավթային պաշարներն, այն ուղղակի ծառայեցնում է սեփական, կլանային շահերին:

-Տպավորություն կա, որ միջազգային հանրությունը Ալիևի ելույթները չնկատելու է տալիս…
-Տարօրինակն այն է, որ պատերազմի քարոզչության ու պատերազմի վերսկսման մասին խոսում է մի մարդ, ով առհասարակ պատկերացում չունի, թե ինչ է պատերազմը, մարդ, ով պատերազմի տարիներին նույնիսկ բացակայել է երկրից: Հերոսի կերպարով խոսում է մի մարդ, ով իր երկրի համար դժվարի պահերին չի եղել իր ժողովրդի կողքին: Ու սա այն դեպքում, որ Հայաստանի նախագահը, ով պատերազմի տարիներին մարտադաշտում էր և շարքային զինվորից հասել է ՀՀ զինված ուժերի գերագույն գլխավոր հրամանատարի պաշտոնին, մշտապես խոսում է ԼՂ հիմնախնդիրը խաղաղ, բանակցությունների ճանապարհով լուծելու օգտին՝ այն համարելով լուծման միակ ու արդյունավետ ուղի:

Դա է պատճառը, որ հայկական կողմի մոտեցումները համահունչ են միջազգային հանրության մոտեցումներին, իսկ Հայաստանը որպես գործընկեր ընկալելի ու վստահելի երկիր է: