Ձեր վստահելի աղբյուրը

Այս տարի բուհական ընդունելության քննությունների անցկացման կարգում կատարվել են մի շարք փոփոխություններ, որոնց հիմնական նպատակն է օգնել դիմորդներին: Այս մասին Panorama.am-ի հետ զրույցում ասաց Հայաստանի կառավարության աշխատակազմի Գնահատման և թեստավորման կենտրոնի մամուլի խոսնակ Գայանե Մանուկյանը:

Նախ, ի տարբերություն նախորդ տարիների, երբ օգոստոսի 6-ին էին փակցվում ցուցակները, թե ով է ընտրվել, որ ֆակուլտետը, այս տարի կփակցվեն հուլիսի 15-ին, ինչը հնարավորություն կտա արական սեռի դիմորդներին նախքան զորակոչվելը իմանալ՝ ինչ համակարգով են ընդունվել . եթե անվճար են՝ կօգտվեն տարեկետման հնարավորությունից, իսկ եթե ոչ՝ արդեն իսկ ուսանող դարձած կզորակոչվեն բանակ ու նրանց տեղը կմնա:

Այս տարի, ի տարբերություն նախորդ տարիների, երբ փակցվեն ընդունվածների ցուցակները, մրցույթից դուրս մնացած, բայց դրական միավորներ ստացած դիմորդները հնարավորություն կունենան մասնակցել թափուր տեղերի համար մրցույթին։

Մեկ այլ փոփոխության համաձայն, եթե դիմորդն ատեստատում որևէ առարկայից չունի ավարտական քննության գնահատական, ընդունելության ժամանակ արդեն կարող է հիմք ընդունվել դպրոցի տարեկան գնահատականը, ինչը օգնում է նրանց, ովքեր ցանկանում են տարիներ անց երկրորդ մասնագիտությունը ստանալ, նաև այն շրջանավարտ դիմորդներին, ովքեր ցանկություն ունեն ուսումը շարունակելու Ագրարային, Ճարտարագիտական կամ այլ համալսարաններում, որտեղ երկու աստղանիշով առարկաներ են նշված:

Մեկ այլ փոփոխության համաձայն (ԱԺ ՀՅԴ խմբակցության առաջարկով), 8 տարի շարունակ սահմանամերձ, նաև բարձրլեռնային բնակավայրերում ապրող դիմորդը բուհերի ընդունելությանը մասնակցելու են առանձին մրցույթով: Դրական գնահատական ստանալու դեպքում նրանք ընդգրկվում են անվճար ուսուցման համակարգում։
Փոփոխություններից մեկի համաձայն, ռուսերենը համալրվել է օտար լեզուների ցանկում: Այդ փոփոխության հետևանքով ռուսերեն քննություն հանձնողների թիվն ավելացել է շուրջ 200-ով:
Գ. Մանուկյանը հիշեցրեց, որ դիմորդներն իրենց մասնագիտական հայտերը բուհերում լրացնելու են մայիսի 5-ից հունիս 1-ը ներառյալ: Հիշեցրեց նաև, որ դիմորդը հնարավորություն ունի մասնակցել 2 անվճար և 8 վճարովի մասնագիտությունների մրցույթին:

Հիշեցնենք, որ ԳԹԿ-ն մարտի 15-ին ավարտվել է միասնական և կենտրոնացված քննությունների հայտագրման գործընթացը և այժմ ընթանում է տվյալների ճշգրտման փուլը։ Դիմորդներն իրենց հայտերում կարող են փոփոխությունները կատարել մինչև ապրիլի 10-ը։ Նախնական տվյալների համաձայն, միասնական և կենտրոնացված քննություններին մասնակցելու դիմում- հայտ են ներկայացրել 18 հազար 100 դիմորդ: