Ձեր վստահելի աղբյուրը

«Հայաստանի խորհրդարանական ընտրությունների շրջանակներում երկրի օլիգարխիայի համար շատ վտանգավոր իրավիճակ է ստեղծվել», - այսօր ասուլիսի ժամանակ կարծիք հայտնեց քաղաքագետ Աշոտ Մանուչարյանը:

Ըստ բանախոսի, քաղաքական դաշտում ներկա պահին ճեղքվածք է առաջացել, որը խաթարել է ընտրություններից սպասված արդյունքները: «Եթե 10 օր առաջ կարելի էր ասել, որ ամեն ինչ կանխորոշված է և պարզ է, թե ամեն մի ուժ ձայների քանի տոկոս կստանա և թե թելադրող համակարգը որն է, ապա այժմ իրավիճակը փոխվեց», - ասաց նա` հավելելով, որ այսօր Հայաստանը կախվածության մեջ է հայտնվել դրսի հիմնական խաղացողներից` Արևմուտքից և Ռուսաստանից:

«Հայաստանի ներքին դաշտում կա ԱՄՆ և Մեծ Բրիտանիայի համատեղ քաղաքականությունը և դրան փորձում է դիմակայել Ռուսաստանը: Ընտրական գործընթացը, ենթադրվում էր, որ անցնում է Արևմուտքի կանխորոշված սցենարով, համաձայն որի Հայաստանում սկզբից սպասվում էին համապատասխան ուժերի հաղթանակ, ապա` վրացական սցենարով զարգացումներ», - ասաց նա:

Ըստ Ա.Մանուչարյանի` «ռուսաստանամետ» ճամբարում այսօր խաղացողներն են «Բարգավաճ Հայաստանը», Դաշնակցությունը և Հայ ազգային կոնգրեսի մի մասը, իսկ «Հանրապետական կուսակցությունը դարձել է անգլո-ամերիկյան սցենարի իրականացնողը»: Բանախոսի կարծիքով` քաղաքական դաշտի նման վերադասավորման արդյունքում վտանգավոր իրավիճակ է ստեղծվել միմիայն տեղական օլիգարխիայի համար:

«Եթե ամեն ինչ գնար անգլո-ամերիկյան սցենարով, օլիգարխները չպետք է մասնակցեին ընտրություններին և գործող համակարգը կամաց - կամաց կվերանար Հայաստանում: Ընտրությունները մի կողմից պետք է լինեին արդար, և Հանրապետական կուսակցությունը կստանար մոտ 70 տոկոս: Սակայն այս սցենարի հովանավորները տեղեկացրեցին իրենց արտաքին հովանավորներին, որ կամ պետք է խախտումներ լինեն, կամ պարտվելու են: Այդ պատճառով առաջարկվեց երրորդ տարբերակ, որ օլիգարխները մասնակցեն», - պարզաբանեց նա:

Ըստ քաղաքագետի, թեև օլիգարխները կան ցուցակում և անցնելու են խորհրդարան, միևնույն է` արդյունքը նույնն է լինելու: «Հայրենական օլիգարխիան զոհաբերվելու է: Եթե հաղթի անգլո-ամերիկյան թևը, ըստ ծրագրի` ընտրություններից հետո օլիգարխները կչեզոքացվեն, ոմանց` մղելու են տնտեսական հատված: Իսկ եթե հաղթի «ռուսական» թևը, ապա մեկ է, նրանց ճնշող մեծամասնությունը պետք է պատժվի Հանրապետական դրոշի տակ գնալու և համակարգին դեմ գործելու համար», -նշեց Աշոտ Մանուչարյանը:

Բանախոսի կարծիքով` փրկվելու համար օլիգարխիան մի ճանապարհ ունի: «Եթե օլիգարխները իրենց հարստությունը վերածեն երկրի զարգացմանը նպաստող տեխնոլոգիաների, ապա մարդիկ և իշխանությունները կմտածեն, որ նրանք կարող են նաև օգուտ բերել, և նրանց չեն զոհաբերի, իսկ հակառակ դեպքում` օլիգարխիան դաժան պարտություն է կրելու», - նշեց բանախոսը:
Ա.Մանուչարյանի կարծիքով` Հայաստանում օլիգարխիային սպառնացող վտանգը բխում է նրանից, որ կապիտալի համաշխարհային համակարգը փորձում է չեզոքացնել նրա դեմ հասարակության ընբոստությունը և «զոհաբերում է տեղական օլիգարխիան»: