Ձեր վստահելի աղբյուրը

Ինչպես աշխարհի շատ երկրներում, այնպես էլ Հայաստանում սրտանոթային հիվանդությունների տարածվածությունը և դրանով պայմանավորված մահացությունը խորացող խնդիր են: Այս մասին այսօր լրագրողների հետ հանդիպման ժամանակ ասաց ՀՀ առողջապահության նախարարության հանրային առողջության բաժնի պետ Ալեքսանդր Բազարչյանը՝ հավելելով, որ Հայաստանի բնակչության շրջանում մահացության կառուցվածքում սրտանոթային հիվանդությունները զբաղեցնում են առաջին տեղը՝ 50%:

Նրա խոսքերով՝ հատկապես սրտամկանի սուր ինֆարկտի ցուցանիշը  շարունակում է բարձր մնալ մեր երկրում: Ըստ նրա՝ այդ հիվանդությունների զարգացմանը նպաստում են մի շարք գործոններ, ինչպիսիք են ավելորդ քաշը, ծխախոտի և ալկոհոլի օգտագործումը, ֆիզիկական թերակտիվությունը և այլն:

«Էրեբունի» բժշկական կենտրոնի անհետաձգելի սրտաբանության բաժնի վարիչ, բժշկական գիտությունների թեկնածու, դոցենտ Համլետ Հայրապետյանը նշեց, որ սրտամկանի ինֆարկտի դեպքերը վերջին տարիներին չի կարելի ասել ավելացել են, իսկ կլինիկաների ծանրաբեռնվածության պատճառը, ըստ նրա, այն է, որ վերջին շրջանում հիվանդները ավելի շատ են բժիշկների դիմում: Հ.Հայրապետյանի խոսքերով՝ սրտանոթային հիվանդությունների հիմնական պատճառը կապված է տվյալ երկրում առկա սոցիալական հիմնախնդիրների հետ: Ըստ նրա՝ օրինակ սկանդինավյան երկրներում հիվանդության մակարդակը բավականին ցածր է: Իսկ Հայաստանում, հատկապես վերջին երկու տասնամյակնների ընթացքում սրտամկանի ինֆարկտի և սրտանոթային հիվանդությունների ավելացումը, սրտաբանը բնական է համարում:

Սակայն, Հ.Հայրապետյանի խոսքերով, հիվանդության զարգացմանը նպաստում է նաև մեր ապրելակերպը, մասնավորապես՝ ոչ ճիշտ սննդակարգը, ռեժիմով չսնվելը, շարժունակության պակասը և այլն: Նա միաժամանակ նշեց, որ վերջին տարիներին նվազել է սրտամկանի ինֆարկտից հիվանդանոցային մահացությունը, դա նաև կապված է Հայաստանում բուժման նորագույն մեթոդների ներդրման հետ:

Հարցին, թե սրտի վիրահատության գների բարձրացման պատճառով շատերը վիրահատվելու հնարավորություն չունեն և այս հարցում ինչ քայլեր պետք է ձեռնարկի պետությունը, Հ.Հայրապետյանը նշեց, որ մեր երկիրը պատրաստ չէ ֆինանսավորել սրտի վիրահատությունների բոլոր ծախսերը:

Նա միաժամանակ նշեց, որ սրտի վիրահատության գները չեն բարձրացել: «Ապահովագրության ներդրման միջոցով հնարավոր կլինի վճարել վիրահատման ծախսերը: Գոյություն ունի պետական պատվերով բուժում, սակայն երբ անհրաժեշտություն է առաջանում կատարել վիրահատություն, պետությունը դեռևս ի վիճակի չէ այն ֆինանսավորել»,- ասաց Հ.Հայրապետյանը՝ հավելելով, որ ապահովագրական գործակալությունը պետք է ապահովի վիրահատության գումարը:

Այդուհանդերձ նա համաձայնեց, որ կան դեպքեր, երբ ֆինանսական միջոցների բացակայության պատճառով հիվանդները չեն վիրահատվում: Ըստ նրա՝ «դա բժշկի լուծելիք խնդիրը չէ, բժիշկը պատրաստ է կատարել իր աշխատանքը. դա պետության խնդիրն է, քանի որ դրանք բավականին ծախսատար վիրահատություններ են»: