Ձեր վստահելի աղբյուրը

Մարտի 20-ից ապրիլի 7-ը «Հասարակական-քաղաքական հետազոտությունների կենտրոնի» կողմից անցկացված սոցհարցման արդյունքներով առաջատարն է Հայաստանի Հանրապետական կուսակցությունը:

Ինչպես այսօր ասուլիսի ժամանակ տեղեկացրեց կենտրոնի համակարգող Կարեն Վարդանյանը, խորհրդարանական ընտրությունների հետ կապված հարցումներն իրականացվել են Երևանում և ՀՀ բոլոր մարզերում, մասնակցել է 1320 մարդ: Բանախոսը շեշտեց, որ հարցվածներից ոչ մեկը կուսակցական պատկանելություն չունի:

Ըստ սոցհարցման արդյունքների, հարցվածների 61%-ը կարևորում է ընտրությունը որպես կարևոր իրադարձություն, սակայն արդար ընտրություններին հավատում է միայն 32%-ը: 2012 թվականի ԱԺ ընտրություններին պատրաստվում է մասնակցել 32 %-ը, նշել է, որ չի մասնակցի` 41%-ը, մասնակցության մասին դեռ չի որոշել հարցվածների 21%-ը:
«Որ կուսակցությանը ձայն կտաք, եթե ընտրությունները լինեն այս շաբաթ» հարցին հարցվածների 24%-ը պատասխանել է ՀՀԿ, 22%-ը` ԲՀԿ, 16%-ը` ՕԵԿ, 14%-ը` ՀՅԴ, 11%-ը` ՀԱԿ, 5%-ը` Ժառանգություն, իսկ այլ կուսակցություններին պատրաստ էր ձայն տալ հարցվածների 8%-ը:

Հարցին, թե ինչ սկզբունքով են ընտրում կուսակցություններին, հարցվածների մեծամասնությունը` 31%-ը նշել է, որ քվեարկելիս հաշվի է առնում կուսակցության լիդերի նկատմամբ համակրանքը, 28%-ը` կատարած աշխատանքները, 11%-ը` նախընտրական ծրագիրը, 8%-ը` գաղափարախոսությունը: Հարցվածներից 8%-ը պատրաստ է ընտրել քաղաքական ուժին գումարի կամ խոստումի դիմաց, 7%-ը` ինչ-որ մեկի խնդրանքով:

Հարցին, թե ինչպես են վերաբերվում քաղաքական կուսակցությունների ներկայացված համամասնական ցուցակներին, հարցվածների 47%-ը պատասխանել է, թե փոփոխություն չի տեսնում, իսկ 41%-ը` վատ է վերաբերվում:
Սոցիալական ոլորտում արդյունավետ գործունեությամբ, ըստ հարցվածների, աչքի է ընկել ԲՀԿ-ն, իսկ արտաքին քաղաքականության ոլորտում` ՀՀԿ-ն:

Իսկ ինչ վերաբերում է կուսակցությունների առաջնորդներին, ապա համաձայն հարցման արդյունքնեերի, հարցվածների 20 %-ը կարծում է, որ խարիզմատիկ քաղաքական գործիչ է Գագիկ Ծառուկյանը, 19 %-ը ՝ Սերժ Սարգսյանը, 17 %-ը ՝ Արթուր Բաղդասարյանը, 15 %-ը ՝ Րաֆֆի Հովհաննիսյանը, 14 %-ը ՝ Լևոն Տեր-Պետրոսյանը և 11 %-ն էլ` Վահան Հովհաննիսյանը:
Կարեն Վարդանյանը նաև տեղեկացրեց, որ հարցվածների մեծ մասը` 64%-ը տեղյակ է, թե ով է ընտրվել մեծամասնական ընտրակարգով պատգամավոր, բայց 76%-ը գտնում է, որ բավարար կերպով ընտրատարածքի շահերը ԱԺ-ում չեն ներկայացվում: Նոր պատգամավորից 54 %-ն ակնկալում է կենցաղային հարցերի լուծում, 32%-ը` ընտրատարածքի խնդիրների բարձրացում ԱԺ-ում, 9%-ը` ակտիվ օրենսդրական գործունեություն:

Բանախոսը նշեց, որ հարցվածների 30%-ը կարծում է, որ Հայաստանի համար առաջնահերթ խնդիր է սոցիալական արդարությունը, իսկ 8 տոկոսը` Արցախի հիմնահարցը:

Հարցումների մասնակիցները նշել են նաև, որ քաղաքական բնույթի տեղեկություններ ստանում են հեռուստացույցի միջոցով, սակայն վստահում են տպագիր մամուլին:

«Մենք չենք երաշխավորում, որ այս հարցման արդյունքները բացարձակ ճշմարտություններ են: Այս պատկերը կարող է կտրուկ փոփոխվել քարոզարշավի ընթացքում»,- ներկայացնելով հարցման արդյունքները` ասաց Վարդանյանը: