Ձեր վստահելի աղբյուրը

«Հայոց Արծիվներ» հասարակական կազմակերպության նախագահ Խաչիկ Ասրյանը հայտարարել է, որ պատրաստ է բանավիճել Հայ Ազգային կոնգրեսի անդամ, պատգամավորության թեկնածու Նիկոլ Փաշինյանի հետ: Ընդդիմադիր թեկնածուին ուղղված առաջարկի մասին Panorama.am-ը զրուցել է Խաչիկ Ասրյանի հետ:

-Երեկ «Արմնյուզ»-ի եթերում հայտարարվեց, որ դուք պատրաստ եք բանավիճել Նիկոլ Փաշինյանի հետ: Պարոն Ասրյան, լա՞վ եք մտածել:
-Շուրջ 20 օր հետևելով Նիկոլ Փաշինյանի հեռուստաբանավիճելու մոլուցքին` այսպես ասած, հատկապես նրա հայտարարություններին և ավելին, տեսնելով Հայ Ազգային կոնգրեսի ողորմելի, թույլ քարոզարշավը, այո, ցանկություն եմ հայտնել ու հիմա էլ ես եմ հրավիրում Նիկոլ Փաշինյանին հեռուստաբանավեճի` ցանկացած օր, ցանկացած տեղ, ցանկացած ժամի: Բայց կուզեի, որ այս հրավերը քաղաքական դաշտում արտառոց իրադարձություն չհամարվեր:

-Սոցիալական ցանցերում այդ բանավեճըն արդեն հավակնում է դարի բանավեճ համարվել:
-(ծիծաղում է-թղթ.) Ավելի շատ հետևելով Փաշինյանի` անընդհատ Սամվել Ալեքսանյանին, Ռուբեն Հայրապետյանին բանավիճելու հրավերներին, ավելի շատ տեսնելով, իհարկե, ՀԱԿ-ի շատ թույլ քարոզարշավը, ես, կարծում եմ,  ու վստահ եմ, որ շատ ճիշտ հրավեր եմ ուղղում Նիկոլ Փաշինյանին հետուստաբանավեճի: Իսկ թե կցանկանա ընդունել Փաշինյանը առաջարկը, նրա խնդիրն է: Նա կարող է ընդունել, կարող է` ոչ: Դա նրա սահմանադրական իրավունքն է:

-Քանի որ դուք եք պատրաստակամություն հայտնել բանավիճելու Նիկոլ Փաշինյանի հետ, ինչի՞ շուրջ եք պատրաստվում խոսել նրա հետ:
-Հիմնական թեման լինելու է Ազգային ժողովի ընտրություններ-2012: Հիմանկան թեման դա է: Ես ուրիշ այլ թեմաներ չունեմ բանավիճելու:

-Ռուբեն Հայրապետյանը հայտարարել էր, որ Նիկոլ Փաշինյանը «ՀՀՇ-ի Գևորիկի կալիբրի» գործիչ է և նրա համար վիրավորական է նրա հետ նստել բանավեճի: Դուք վիրավորական չե՞ք համարում դա:
-Անկեղծ ասեմ, չեմ լսել` Ռուբեն Հայրապետյանը ինչ է հայտարարել: Բայց, եթե ես մարդուն հրավիրում եմ հեռուստաբանավեճի, բնական է, ինձ համար վիրավորական չէ:

-Պրն Ասրյան, դուք որպես ՀՀԿ համամասնական ցուցակում ընդգրկված թեկնածո՞ւ եք Փաշինյանին հրավիրում հեռուստաբանավեճի, թե՞ որպես կազմակերպության նախագահ:
-Ես նրան հրավիրում եմ բանավեճի որպես «Հայոց Արծիվներ» հայրենասիրական շարժման առաջնորդ:

-Այդ հրավերը, այսինքն, չեք համաձայնեցրել Հանրապետական կուսակցության հետ
-Իհարկե` ոչ:

-Ի՞նչ պատասխան եք ակնկալում Փաշինյանից
-Այդ պատասխանը կարող է լինել դրական, կարող է լինել բացասական: Նա կարող է ընդունել հրավերը, կարող է չընդունել: Ոչ մի արտառոց բան չի լինի, եթե նա չընդունի, կամ ընդունի:

-Ի դեպ, պարոն Ասրյան, դուք վերջնաժամկետ էիք տվել Արդբեջանի նախագահ Իլհամ Ալիևին, այդ ժամկետը կարծես թե ավարտվել է…
-Ուզում եմ ևս մեկ անգամ նշել, որ «Հայոց Արծիվները» ի դեմս ինձ, Իլհամ Ալիևին շատ կոշտ պատասխան տվեց վերջերս «Եվրանեսթ»-ի վեհաժողովում նրա արտահայտությունների համար: Ուզում եմ մեկ անգամ ևս հիշեցնել, որ առաջինը ես «Հայոց Արծիվներ»-ի կողմից նրան 5 օր ժամանակ էի տվել`  ներողություն խնդրելու հայ ժողովրդից, «ֆաշիստ» որակման համար: Եթե այդ օրերի ընթացքում նա չխնդրեր, ուրեմն նշանակում է, որ նա շատ ուժեղ, դուխով տղա էր, իսկ եթե նա ուժեղ դուխով տղա էր, պետք է պատերազմ հայտարարեր Հայաստանի Հանրապետությանը, և եթե դա էլ չաներ, իսկ տվյալ դեպքում դա էլ չի արել, ըստ իս, մեր բոլորի այդ թվում նաև մոլորակի ժողովուրդներին Իլհամ Ալիևը մեկ անգամ ևս ցույց տվեց իր վախկոտությունը և հարեմում պարող պարուհիներին հատուկ բնավորությունը: