Ձեր վստահելի աղբյուրը

Սոցիոլոգիական հետազոտությունների համաշխարհային առաջատար GALLUP International association-ի կողմից իրականացված հարցման արդյունքներով` խորհրդարանական ընտրություններում անցողիկ շեմը հաղթահարում են հինգ կուսակցություններ:

Հետազոտության ընթացքում, հարցման ենթարկված ՀՀ քաղաքացիները` «ո՞ր կուսակցությանը կընտրեիք, եթե խորհրդարանական ընտրությունները կայանային առաջիկա կիրակի» հարցին պատասխանել են հետևյալ կերպ. Հայաստանի Հանրապետական կուսակցություն` 34%, «Բարգավաճ Հայաստան» կուսակցություն` 28%, Հայ ազգային կոնգրես` 9%, «Օրինաց երկիր» կուսակցություն` 6%, Հայ Յեղափոխական Դաշնակցություն` 5%: Ընտրարշավի մասնակից մյուս կուսակցություններից «Ժառանգություն»-ը ստացել է հարցման մասնակիցներից 3%-ի, իսկ Կոմունիստական կուսակցությունը` 2%-ի աջակցությունը: 10%-ը չի պատրաստվում ձայն տալ կուսակցություններից որևէ մեկին, իսկ 3%-ը հարցին չի պատասխանել:

Հարկ է նկատել, որ նույն հարցի շրջանակներում հարցման մասնակիցները պատասխանել են նաև մեկ այլ հարցի` «ո՞ր կուսակցությանը կընտրեիք, եթե որևէ պատճառով ձեր առաջին ընտրությունը հնարավոր չլիներ»: Այս պարագայում բոլորին դեմ տրամադրվածների թիվը կտրուկ աճել է. 31%-ը պատասխանել է, որ որևէ մեկին ձայն չէր տա: Աճել է նաև չկողմնորոշվածների թիվը` 8%:
Ինչ վերաբերում է կուսակցություններին, ապա հարցվածների շրջանում «երկրորդ ձայն»-ի ամենամեծ սեգմենտն ունի ԲՀԿ-ն` 22%, նրան հետևում է ՀՀԿ-ն` 17%, ՕԵԿ-ի ու «Ժառանգության» ցուցանիշը 6% է, ՀՅԴ-ինը` 5%: ՀԱԿ-ը, ՀԴԿ-ն ու ՀԿԿ-ն` 2%-ական տոկոս «երկրորդ ձայն» ունեն: Հարցվածների 0.5%-ը պատրաստ է իր «երկրորդ ձայն»-ը տալ «Միավորված հայեր» կուսակցությանը: Գրեթե նույնքան մարդ էլ մտադիր է քվեարկել այլ կուսակցությունների օգտին:

«Գելափ»-ի հետազոտության հեղինակները հայաստանցի ընտրողներից հետաքրքրվել են նաև, թե որ կուսակցությանն ընդհանրապես ձայն չէին տա: Այս դեպքում առաջատարը ՀԱԿ-ն է: Հարցման մասնակիցների 36%-ը նշել է, որ ոչ մի դեպքում այդ ուժին ձայն չի տա: Ցուցանիշով երկրորդը ՕԵԿ-ն է` 12%, երրորդը ՀՀԿ-ն` 11%: Նրանց հաջորդում են «Ժառանգություն»-ը` 9%, ՀՅԴ-ն ու ՀԿԿ-ն` 7%, ՄՀԿ-ն ու ԲՀԿ-ն` 5%: ՀԴԿ-ի ցուցանիշը մերժողական էլեկտորատի առումով նվազագույնն է` 4%:
Հարցման մասնակիցներից 12%-ը նշել է, որ «ոչ ոք», ինչը նշանակում է, որ նրանք որևէ մեկի դեմ մերժողաբար չեն տրամադրված: Իսկ 5%-ն այս հարցի շուրջ չի մտածել:

Բացի վերը նշվածից, հարցման մասնակիցները պատասխանել են նաև հարցին, թե` «ո՞ր քաղաքական կուսակցությունը կարող է առավել արդյունավետ աշխատել և լուծել Հայաստանի առջև ծառացած կարևորագույն խնդիրները»: Այս հարցի դեպքում ևս առաջատարը ՀՀԿ-ն է` 28% ցուցանիշով: Նրան հետևում են ԲՀԿ-ն` 25%-ը, ՀԱԿ-ը` 6%-ը: 4-ական տոկոսի մոտ վստահությունը ՀՅԴ-ի ու ՕԵԿ-ի կողմն է, 3%-ի մոտ «Ժառանգության»:
21%-ի կարծիքով` կուսակցություններից ոչ ոք արդյունավետ լինել չի կարող, իսկ 8%-ը չի կողմնորոշվել կամ հարցին չի պատասխանել:

Նախորդող լուրերը` Ստորագրվեց. Հայաստանում առաջին անգամ ընտրության օրը կանցկացվի էքզիտ փոլ
Gallup. Ընտրողների առավել մեծ աջակցությունն է վայելում 2 կուսակցություն` ՀՀԿ-ն ու ԲՀԿ-ն