Ձեր վստահելի աղբյուրը

Այն պահից հետո, երբ հայտնի դարձավ ՀՅԴ համամասնական ցուցակում ընդգրկված չէ Հրայր Կարապետյանը, որոշ շրջանակներում սկսեցին խոսել այն մասին, թե իբր Հրայր Կարապետյանն այլևս նախկին հուսալի գործընկերը չէ կուսակիցների համար: Ըստ որոշ տեղեկությունների՝ կուսակցականների շրջանում այդ վերաբերմունքն առավել ընդգծվեց ՀՅԴ-ի կոալիցիայից դուրս գալուց հետո, երբ ԱԺ պաշտպանության, ԱԱ և ՆԳ հարցերի մշտական հանձնաժողովի նախագահ Արթուր Աղաբեկյանի հրաժարականից հետո Հրայր Կարապետյանն արագ առաջ նետվեց թափուր մնացած աթոռի պարտականություններն ստանձնելու: Թե որքանով է այս հանգամանքը եղել կուսակցության՝ Հրայր Կարապետյանին խորհրդարան գնացող թիմից դուրս թողելու որոշման հիմքում, և արդյոք վերջինիս հանդեպ իրականում վերաբերմունք է փոխվել, Panorama.am-ի հետ զրույցում Հրայր Կարապետյանն այսպես պարզաբանեց. «Դրանք արհեստական ինչ-որ մեկնաբանություններ են, ոչ մի կապ չունեն իրականության հետ: Մեր կուսակցության մեջ դուրս գալը, ներս մտնելը, ինչ-որ պաշտոնից պաշտոն տեղափոխվելը կամայական չեն լինում, դրանք լինում են որոշումներով: Երբ որ ես փոխխոսնակի պաշտոնից հրաժարվեցի իմ ինչպես նաև կուսակցության որոշումով եղավ, երբ մենք կոլիցիայից դուրս եկանք: Երբ ես համաձայնվեցի գալ հանձնաժողովի նախագահ, նույնպես որոշման համաձայն եմ արել: Ընդհանրապես կուսակցական 23 տարվա գործունեության ընթաքում ես առաջնորդվել եմ կուսակցության որոշումներով, ինչպես դա արել են բոլոր դաշնակցականները: Այնպես որ, ես չեմ կարծում որ հաստատ նման խնդիր կա:

Եվ հետո խորհրդարան չգնալը դա իմ որոշումն է՝ կարելի է ասել կա նաև կուսակցության հետ համատեղ որոշում, որովհետև արդեն 9 տարի է՝ ես ԱԺ անդամ եմ, դրանից առաջ էլ 5 տարի եղել եմ Արագածոտնի մարզպետ և առիթ չեմ ունեցել զբաղվել կուսակցական գործունեությամբ:
Հիշեցնեմ, որ եղել եմ ՀՅԴ առաջին ներկայացված ներկայացուցիչներից մեկը այն ժամանակ, երբ Դաշնակցությունը վերադարձավ Հայաստան: 1998-ից մինչև հիմա առիթ չեմ ունեցել զբաղվել կուսակցական գործունեությամբ: Կարծում եմ՝ դրա կարիք կա, որը ոչ պակաս կարևոր է՝ քան ԱԺ-ում լինելը»:

Այդուհանդերձ, հնարավո՞ր է, կուսակցությունը դժգոհ է եղել Հրայր Կարապետյանի օրենսդրական աշխատանքից և միայն այդ պատճառով վերջինիս չի ընդգրկել համամասնական ցուցակում, հարցրինք. «Ընդհակառակը, կուսակցությունը գոհ պետք է լինի ինձնից, քանի որ կային օրենքեր, որոնք տարիներ ի վեր չէին անցնում, ընդ որում՝ հենց նույն դաշնակցության նախաձեռնած օրենքները, որոնք մենք անց ենք կացրել՝ կանոնակարգերը զինված ուժերի, որոնք մինչև այդ չկային և այլն և այլն: Ես կարծում եմ, որ կուսակցության գոհ լինելու չլինելու խնդիր չկա էստեղ: Այստեղ կա կուսակցության բնույթը փոխելու, աշատանքը փոխելու խնդիր:
Հետո ասեմ՝ ԱԺ-ում բոլոր պաշտոնները վարել եմ, բացի ԱԺ նախագահի պաշտոնից. եղել եմ և խմբակցության ղեկավար և շարքային պատգամավոր, և խմբակցության քարտուղար, հանձնաժողովի նախագահ, ԱԺ փոխխոսնակ, այնպես որ այն օրենսդրական գործունեությունը, որ ես կատարել եմ, իսկ ես շուրջ 2 տասնյակից ավելի օրենքների հեղինակ եմ, կարծում եմ, որ բավականաչափ է:

Մեր հարցին, թե ինչու կուսակցությունը հենց այսօր իր ուժի ու աշխատանքի կարիքն ունեցավ, ասաց. «Միշտ էլ կուսակցությանը փորձառու կուսակցականներ են պետք՝ թե կազմակերպչական, թե քարոզչական, թե քաղաքական գործերը առաջ տանելու համար: Ես կարծում եմ, որ այս հանգրվանում առնվազն իմ ուժերը, իմ փորձը պետք է կուսակցությանը և ես պատրաստ եմ այդ գործունեությունը ծավալել»:

Հրայր Կարապետյանը նաև նշեց, որ ՀՅԴ համամասնական ցուցակի վերաբերյալ իր կարծիքը դրական է միայն այն պատճառով, որ իրենց ցուցակում չկան այլ «կուսակցություններով դեգերածներ»:

«Այո, մեր կուսակցության ցուցակն ինձ բավարարում է, որովհետև մեր կուսակցության մեջ չկան մարդիկ, որոնք բազմաթիվ կուսակցություներ են փոխել», -նշեց Հրայր Կարապետյանը՝ մոռանալով, որ իրենց կուսակցության ցուցակում համենայն դեպս կան մարդիկ, որոնք միևնույն է ասոցացվում են ՀՀԿ-ի հետ:

Ի դեպ, մեր այն դիտարկմանը, թե իր համար որքանով է արդար և ընդունելի, երբ ՀՅԴ-ն ցուցակի անցողիկ տեղերում ընդգրկել է մեկին, ում եղբորը առաջադրել է մեծամասնական ընտրակարգով, այսինքն՝ նույն ուժը հովանավորել է (Ավշար ալկոյի սեփականատերերը), մի ընտանիքից երկու պատգամավորացուի՝ իրականում թիմից դուրս թողնելով ակտիվ օրեսիդրներին, պատասխանեց. «Մեր ցանկում Արամայիս Գրիգորյան է, եղբայրը՝ Արայիկ Գրիգորյանը, մեծամասնականով է: Նա ով որ մեր ցանկում է, եղել է գյուղնախարար և դարձյալ վատ չի աշխատել՝ հիմնականում մեր գնահատականին արժանի: Ով էլ լինի դաշնակցության ցանկում, նա կատարելու է Դաշնակցության որոշումները: Այս դեպքում Արամայիս Գրիգորյանի՝ ցանկում լինելը ես նորմալ եմ համարում: Հնարավոր է, որ նա իր ելույթներով շատ աչքի չի ընկել, սակայն գնահատականի է արժանի նրա գործնական հատկանիշները: Լիլթ Գալստյանը նույնպես բավական ակտիվ պատգամավոր է, և չեմ կարծում, որ նա լինի պատգամավոր թե ոչ, նա իր տեղը կունենա դաշնակցության քաղաքական գործունեության մեջ»: